قاراپايىم وتباسى قۇرىلىسى ەرەكشە ءۇي سالۋدا - الماتى
12 تامىز 10:15

قاراپايىم وتباسى قۇرىلىسى ەرەكشە ءۇي سالۋدا - الماتى

نۇر-سۇلتان.قازاقپارات - سوڭعى ۋاقىتتا الاتاۋ بوكتەرىنەن ەرتەگىدەگى سارايلارعا ۇقساس ءزاۋلىم ۇيلەر دە بوي كوتەرىپ كەلەدى. ولاردى سالىپ جاتقان ۇلكەن قۇرىلىس كومپانيالارى ەمەس، قاراپايىم عانا قالا تۇرعىندارى.

سىرتىنان قاراساڭ، كوز سۇيسىنەتىن كەرەمەت ۇيلەردىڭ بىرىندە ءبىزدىڭ تىلشىلەر بولىپ قايتقان ەدى. ادام بالاسىنىڭ قولىنان كەلمەيتىنى جوق. ەڭ باستىسى قىزىعۋشىلىق بولىپ جانە الدىنا قويعان ماقساتىنا جەتۋ ءۇشىن ايانىپ قالماۋ كەرەك، دەيدى الماتى قالاسىنىڭ تۇرعىنى ولگا شين. ماماندىعى قۇرىلىسشى بولماسا دا كۇيەۋى ەكەۋى بالالارىنا ەرتەگىدەگى سارايلارعا ۇقساس ءۇي تۇرعىزۋدى كوپتەن ارمانداپتى. سول ارماندارى جۇزەگە اسىپ، قازىر بۇل وتباسىنىڭ تۇرعىزىپ جاتقان ۇيىنە كوپشىلىك قىزىعا قارايدى ەكەن.

ولگا شين، قالا تۇرعىنى:

- ۋولت ديسنەيدىڭ مۋلتفيلمدەرىن تالاي كوردىك. سونداعى ءزاۋلىم سارايلاردى، جاسىل ساياباقتاردى كورىپ ارمانداۋشى ەدىم. مەنىڭدە بالالارىم وسىنداي ۇيدە تۇرسا دەپ. سول ماقساتقا جەتۋ ءۇشىن ەرىنگەن جوقپىن. ءتىپتى گەرمانيادا تۇراتىن قىزىما بارىپ ساۋلەت الەمىنىڭ بارلىق يىرىمدەرىن زەرتتەدىم. تىرنەكتەپ اقشا جيناپ، تاۋەكەل دەپ 2009 -جىلى قۇرىلىس جۇمىستارىن باستاپ كەتتىك.

4 قاباتتان تۇراتىن ەرتەگى سارايى سەكىلدى ءزاۋلىم ءۇيدىڭ سىرتقى جۇمىستارى بىتۋگە تاياعان. ەندى ىشكى جۇمىستارى باستالادى دەيدى. ءۇيدىڭ سىرتقى كەلبەتى عانا ەمەس اۋلاسى دا كوزدىڭ جاۋىن الادى. ءارتۇرلى جەمىس- جيدەكتەر، بالالاردىڭ ويىن الاڭى وسىنىڭ بارلىعى ءبىز كوگىلدىر ەكراننان كورىپ جۇرگەن ديسنەيلەندتىڭ ەرتەگىلەر ەلىنەن ەش كەم ەمەس.

ولگا شين، قالا تۇرعىنى:

- ءۇيدى سالامىز دەپ جۇرگەندە بالالارىمىز دا ەسەيىپ كەتتى. ەندى نەمەرەلەرىمىز قىزىقتايتىن بولادى. جالپى بولاشاقتا بۇل جەردى بالالار ورتالىعىنا اينالدىرۋ جوسپاردا بار. ءار قاباتىندا الەم حالىقتارىنىڭ ەرتەگىلەرىنەن كورىنىستەر جاساپ، وسىندا كەلگەن جاس ورەندەردى ەرەكشە كۇيگە بولەگىم كەلەدى. وتباسىمەن بىرگە ەرتەگىدەگى سارايدا تۇرۋدى ارمانداعان ولگا شين سول ماقساتىنا جەتۋگە ءبىر تابان جاقىن تۇر.

اۆتورلارى: جاندوس ايتباي ۇلى، ۆالەنتين لوبانوۆ

www.24.kz

جاڭالىقتار