ب ۇ ۇ قازاقستاندا الەمدىك جانە ءداستۇرلى دىندەر ليدەرلەرىنىڭ سەزىن وتكىزۋدى قولدايدى
11 تامىز 21:57

ب ۇ ۇ قازاقستاندا الەمدىك جانە ءداستۇرلى دىندەر ليدەرلەرىنىڭ سەزىن وتكىزۋدى قولدايدى

نۇر-سۇلتان. قازاقپارات - قازاقستاننىڭ ءدىنارالىق جانە وركەنيەتارالىق ديالوگتى قالىپتاستىرىپ، ونى نىعايتۋعا قوسىپ وتىرعان ۇلەسى مەن وسى باعىتتاعى جۇمىسىنىڭ ماڭىزى جوعارى.

بۇل تۋرالى ب ۇ ۇ باس اسسامبلەياسى 76-سەسسياسىنىڭ ءتوراعاسى ابدۋللا شاحيد ق ر پارلامەنتى سەناتىنىڭ سپيكەرى ماۋلەن اشىمبايەۆ كەزدەسۋىندە ايتتى، دەپ حابارلايدى قازاقپارات پالاتانىڭ باسپا ءسوز قىزمەتىنە سىلتەمە جاساپ.

ماۋلەن اشىمبايەۆ 30 جىلدا قازاقستان مەن بىرىككەن ۇلتتار ۇيىمى اراسىندا تىعىز قارىم-قاتىناس ورناعانىن اتاپ ءوتتى. سونداي-اق، ول ب ۇ ۇ- مەن ىنتىماقتاستىق ەلىمىزدىڭ سىرتقى ساياساتتاعى نەگىزگى باسىمدىعى ەكەنىن تىلگە تيەك ەتتى.

«مەملەكەت باسشىسى تاراپىنان تۇراقتى دامۋ ماسەلەلەرىنە ايرىقشا ءمان بەرىلىپ كەلەدى. قازاقستاننىڭ ۇلتتىق باسىمدىقتارى ب ۇ ۇ- نىڭ 2030-جىلعا دەيىنگى تۇراقتى دامۋ ماقساتتارىمەن جانە باعدارلاماسىمەن تىعىز بايلانىستى. ۇيىم بەلگىلەگەن ماقساتتار ءبىزدىڭ ستراتەگيالىق قۇجاتتارمەن جانە باعدارلامالارمەن ينتەگراتسيالانعان»، - دەدى ماۋلەن اشىمبايەۆ.

سەنات سپيكەرى ب ۇ ۇ باس اسسامبلەياسى 76-سەسسياسىنىڭ ءتوراعاسىنا قازاقستاندا ەل پرەزيدەنتى قاسىم-جومارت توقايەۆتىڭ باستاماسىمەن جۇرگىزىلىپ جاتقان رەفورمالار تۋرالى دا ايتتى. كونستيتۋتسياعا وزگەرىستەر مەن تولىقتىرۋلار ەنگىزۋ بويىنشا وتكىزىلگەن رەفەرەندۋمنىڭ ناتيجەسى مەملەكەت باسشىسىنىڭ جاڭعىرۋ باعدارىن قولداعان كورسەتكىشتەردىڭ ءبىرى ەكەنى ءسوز بولدى.

ءوز كەزەگىندە ابدۋللا شاحيد قازاقستاندا جۇرگىزىلىپ جاتقان رەفورمالار دەر كەزىندە قولعا الىنعانىن جانە ولار ەلدىڭ ودان ءارى دامۋىنا ايتارلىقتاي ۇلەس قوساتىنىن اتاپ ءوتتى.

سونىمەن قاتار، سۇحباتتاسۋشىلار الداعى ۋاقىتتا قازاقستان استاناسىندا وتەتىن الەمدىك جانە ءداستۇرلى دىندەر ليدەرلەرىنىڭ VII سەزىنە توقتالدى. كەزدەسۋ بارىسىندا اتالعان فورۋمنىڭ الەمدىك دىندەر مەن حالىقتاردى جاقىنداستىرۋ جانە تولەرانتتىلىق يدەيالارىن ىلگەرىلەتۋ ىسىندە ماڭىزدى ءرول اتقاراتىنى ايتىلدى. سەزد حاتشىلىعىنىڭ باسشىسى ماۋلەن اشىمبايەۆ قاتىساتىنىن راستاعاندار قاتارىندا ب ۇ ۇ قۇرىلىمىنا كىرەتىن ب ۇ ۇ وركەنيەتتەر اليانسى مەن پارلامەنتارالىق وداق باسشىلارى دا بار ەكەنىن جەتكىزدى، سونداي-اق سەزد اياسىندا ب ۇ ۇ باس حاتشىسى انتونيۋ گۋتەرريش بەينەۇندەۋ جاسايدى دەپ كۇتىلەدى.

«سەزد قورىتىندىسى بويىنشا دەكلاراتسيا قابىلدانادى. قۇجاتتا الەمدىك جانە ءداستۇرلى دىندەر ليدەرلەرىن ۇزاق مەرزىمدى تۇراقتىلىق پەن بەيبىتشىلىككە قول جەتكىزۋ پروتسەسىنە بەلسەندى جۇمىلدىرۋعا قاتىستى ءبىرقاتار ماڭىزدى ەرەجەلەر قامتىلادى»، - دەدى ماۋلەن اشىمبايەۆ.

ءوز سوزىندە ابدۋللا شاحيد قازاقستاننىڭ ءدىنارالىق جانە وركەنيەتارالىق ديالوگتى قالىپتاستىرىپ، ونى نىعايتۋعا قوسىپ وتىرعان ۇلەسى مەن وسى باعىتتاعى جۇمىسىنىڭ ماڭىزىن جوعارى باعالادى. ول ب ۇ ۇ تاراپىنان سەزگە قولداۋ كورسەتىلگەنىن اتاپ ءوتىپ، قازىرگى تاڭدا ءدىن ليدەرلەرىنىڭ ءرولى الەمدى ودان ءارى دامىتۋ جانە جاھاندىق ديالوگ مادەنيەتىن نىعايتۋ ءۇشىن وتە ماڭىزدى ەكەنىنە نازار اۋداردى.

جاڭالىقتار