پەتروپاۆلدا كولىك جۇرگىزۋشىسى قالا كوشەلەرىمەن قاشىپ، جول پوليتسەيلەرىن ابىگەرگە سالدى

پەتروپاۆل. قازاقپارات - پەتروپاۆلدا كولىك جۇرگىزۋشىسى قاربالاس ۋاقىتتا كولىك قوزعالىسى كوپ قالا كوشەلەرىمەن قاشىپ، جول پوليتسەيلەرىن ابىگەرگە سالدى، دەپ حابارلايدى قازاقپارات ءتىلشىسى.

الەۋمەتتىك جەلىدە پاترۋلدىك پوليتسيا قۋعان، اق كولىك جۇرگىزۋشىسى قاشقان ۆيدەونىڭ جازباسى تارادى.

كينوداعىدان كەم تۇسپەيتىن قۋعىن بارىسىندا اق كولىكتىڭ يەسى بىرنەشە رەت جولدىڭ قارسى باعىتىنا شىعىپ كەتتى، ەكى جولاقتى كەسىپ ءوتتى، كولىك اعىنىنا قارسى ءجۇردى. ءوزىنىڭ عانا ەمەس، باسقالاردىڭ دەنساۋلىعى مەن ومىرىنە قاۋىپ ءتوندىردى. پوليتسەيلەر دە سوڭىنان قالماي، اقىرى قۇقىق بۇزۋشىنى ۇستاپ تىندى.

ءوڭىر پوليتسەيلەرى كوپشىلىكتىڭ قىزىعۋشىلىعىن تانىتقان بەينەجازباعا قاتىستى تۇسىنىك بەردى. وقيعا پەتروپاۆلدا كەشە بولعان ەكەن.

«10- تامىز كۇنى ساعات 18.27 مينۋت كەتكەندە پارتيزان-نازاربايەۆ كوشەلەرىنىڭ قيىلىسىندا پوليتسەيلەردىڭ نازارىنا ارتقى بامپەرى جوق «Toyota Corolla» كولىگى تۇسەدى. جاعدايدى ءبىلۋ ءۇشىن توقتاتقان ينسپەكتور كولىك جۇرگىزۋشىسىنەن سپيرتتىك ىشىمدىكتىڭ شىعىپ تۇرعانىن بايقاعان. ەر ادام بىردەن گازعا باسىپ، جولدا ءجۇرۋ ەرەجەلەرىن ورەسكەل بۇزىپ، پاترۋلدى پوليتسيا ەكيپاجىنان جاسىرىنباق بولدى.

قۋعىن بارىسىندا 30 جاستاعى جۇرگىزۋشى جامبىل كوشەسىندەگى عيماراتتاردىڭ ءبىرىنىڭ جانىندا ۇستالدى. قۇقىق بۇزۋشىنى ۇستاۋ كەزىندە جول قوزعالىسىنىڭ باسقا قاتىسۋشىلارى جانە ازاماتتار زارداپ شەككەن جوق. ەر ادام مەديتسينالىق كۋالاندىرۋدان وتۋدەن باس تارتتى. ال كولىگى مامانداندىرىلعان ايىپپۇل تۇراعىنا قويىلدى»، - دەلىنگەن س ق و پوليتسيا دەپارتامەنتى باسپا ءسوز قىزمەتى تاراتقان حابارلامادا.

پوليتسيا قىزمەتكەرلەرىنىڭ زاڭدى تالابىنا باعىنباعان، جولدا ءجۇرۋ ەرەجەسىن ورەسكەل بۇزعان كولىك جۇرگىزۋشىسىنە اكىمشىلىك حاتتاما تولتىرىلدى. جينالعان ماتەريال مامانداندىرىلعان اكىمشىلىك سوتقا جىبەرىلدى. ⠀⠀⠀⠀⠀

سوتتىڭ شەشىمى بويىنشا ەر ادام 20 كۇنگە اكىمشىلىك قاماۋعا الىندى، سونداي-اق 8 جىلعا كولىك جۇرگىزۋ قۇقىعىنان ايىرىلدى. ⠀⠀⠀