اۋرۋحاناداعى جۇكتى ايەلدىڭ ولىمىنە قاتىستى قىلمىستىق ءىس قوزعالدى
11 تامىز 20:29

اۋرۋحاناداعى جۇكتى ايەلدىڭ ولىمىنە قاتىستى قىلمىستىق ءىس قوزعالدى

اتىراۋ. قازاقپارات - اتىراۋ اۋرۋحاناسىنداعى جۇكتى ايەلدىڭ ولىمىنە قاتىستى قىلمىستىق ءىس قوزعالدى، دەپ حابارلايدى قازاقپارات ءتىلشىسى.

اتىراۋ وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، قىلمىستىق ءىس ق ر قىلمىستىق كودەكسىنىڭ 317-بابىمەن باستالعان.

«اۋرۋحانادا 1990-جىلعى جۇكتى ايەلدىڭ قايتىس بولۋ دەرەگىنە قاتىستى ق ر قىلمىستىق كودەكسىنىڭ 317-بابىمەن (مەديتسينا نەمەسە فارماتسيەۆتيكا جۇمىسكەرىنىڭ كاسىپتىك مىندەتتەرىن تيىسىنشە ورىنداماۋى) سوتقا دەيىنگى تەرگەۋ باستالدى. ءتيىستى ساراپتامالار تاعايىندالدى»، - دەپ ءمالىم ەتتى دەپارتامەنتتىڭ باسپا ءسوز قىزمەتىنەن.

وزگە اقپارات ق ر قىلمىستىق-پروتسەستىك كودەكسىنىڭ 201-بابىنا سايكەس جاريالاۋعا جاتپايدى.

بۇدان بۇرىن اتىراۋ اۋرۋحاناسىندا تۇسىك تاستاعان ايەل قايتىس بولعانىن جازعان ەدىك.

جەرگىلىكتى قوعام بەلسەندىسى نۇرلان جۋناسوۆتىڭ الەۋمەتتىك جەلىدە قالدىرعان جازباسىنا قاراعاندا، 32 جاستاعى جۇكتى ايەلدى اۋرۋحانادان شىعارىپ جىبەرگەن. ۇيىنە ورالعان ايەلدىڭ جاعدايى ناشارلاپ، اۋرۋحاناعا قايتا جەتكىزىلگەن. جۇكتى ايەل اۋرۋحانادا تۇسىك تاستاپ، كەيىن كوز جۇمعان. ءبىراق، 17 اپتالىق شاقالاقتىڭ دەنەسى ءمايىتحانادا 10 كۇن ساقتالعان. بۇل تۋرالى ايەلدىڭ كۇيەۋىنە دە، تۋىستارىنا دا ەشكىم حابار بەرمەگەن.

قايتىس بولعان ايەل كۇيەۋگە ءۇش جىل بۇرىن شىققان. ونىڭ وتباسىندا كامەلەتكە تولماعان ەكى بالا قالدى.

جاڭالىقتار