قاراعاندى وبلىسىندا قار ارالاس بۇرشاق جاۋدى
11 تامىز 19:58

قاراعاندى وبلىسىندا قار ارالاس بۇرشاق جاۋدى

قاراعاندى. قازاقپارات - قاراعاندى وبلىسىنىڭ اقتوعاي اۋدانىندا قار ارالاس بۇرشاق جاۋدى.

سينوپتيكتەر جىل مەزگىلىنە ءتان ەمەس تابيعي قۇبىلىستىڭ وسى اۋدان ارقىلى وتكەن سۋىق فرونتتىڭ سالدارىنان بولعانىن ايتادى، دەپ حابارلايدى قازاقپارات ءتىلشىسى.

جاز مەزگىلىنە ءتان ەمەس تابيعي قۇبىلىستىڭ ۆيدەوسى الەۋمەتتىك جەلىلەردە جاريالاندى. روليك اۆتورلارى حابارلاعانداي، بۇرشاق اقتوعاي اۋدانىندا جاۋعان. بۇل اۋداندا «قازگيدرومەتتىڭ» بىرنەشە مەتەوستانتسياسى بار. الايدا، ماماندار بۇرشاق تۇرىندە جاۋىن-شاشىن بولعانى تۋرالى مالىمەت تىركەلمەگەنىن ايتادى. مەتەورولوگتار جاز ايلارىندا بولماۋى ءتيىس تابيعي قۇبىلىستى سۋىق فرونتتارمەن بايلانىستىرادى.

«كەشە، 10- تامىزدا قاراعاندى وبلىسى فرونتالدىق بولىمدەردىڭ ىقپالىندا بولدى. اقتوعاي اۋدانى ارقىلى ەكىنشى سۋىق فرونت ءوتتى. ادەتتە، وسىنداي فرونتتىڭ ىقپالىنان بۇرشاق جاۋۋى مۇمكىن. بۇگىنگى كۇنى بۇكىل قازاقستان بويىنشا، اسىرەسە ەلدىڭ سولتۇستىك بولىگىندە جاڭبىر، نايزاعاي جانە بۇرشاق جاۋۋى بولجانىپ وتىر. اقتوعاي اۋدانىندا قوس فرونت ءوتتى. سونىڭ سالدارىنان بۇرشاق جاۋدى»، - دەپ ءتۇسىندىردى «قازگيدرومەت» ر م ك قاراعاندى وبلىستىق فيليالىنىڭ ينجەنەر-سينوپتيگى ەلەنا ميحايلوۆا.

جاعدايعا جەرگىلىكتى اتقارۋشى ورگاندار دا تۇسىنىكتەمە بەردى. ولاردىڭ ايتۋىنشا، ەگىن شارۋاشىلىعىمەن اينالىساتىن شارۋا قوجالىقتارى تابيعي قۇبىلىستان زارداپ شەكپەگەن. بۇرشاق جاۋعان اۋىلدىڭ اۋماعىندا ەگىستىك القاپتارى جوق.

«اقتوعاي اۋدانى جيدەباي اۋىلدىق وكرۋگى جالاڭاش اۋىلىندا جاۋعان. اۋىلدىق وكرۋگ اكىمى مارات تولەپبەكوۆپەن وسى ماسەلە بويىنشا سويلەستىك، ەگىنگە جانە باسقا دا اۋىل شارۋاشىلىق ونىمدەرىنە زارداپ كەلمەگەندىگى تۋرالى حابارلايمىز»، - دەدى اقتوعاي اۋدانى ىشكى ساياسات ءبولىمىنىڭ باسشىسى التاي الىبايەۆ.

جاڭالىقتار