سيفرلىق تاڭباسى جوق تەمەكى ونىمدەرى ءۇشىن ايىپپۇل سالىنادى
11 تامىز 18:56

سيفرلىق تاڭباسى جوق تەمەكى ونىمدەرى ءۇشىن ايىپپۇل سالىنادى

نۇر-سۇلتان. قازاقپارات - قازاقستاندا سيفرلىق تاڭباسى جوق تەمەكى ونىمدەرى ءۇشىن ايىپپۇل سالىنادى.

بۇل تۋرالى ق ر ق م مەملەكەتتىك كىرىستەر كوميتەتى ءمالىم ەتتى، دەپ حابارلايدى قازاقپارات.

قاعاز اكتسيزدىك ماركالاردىڭ كۇشى جويىلۋىنا بايلانىستى بيىلعى 1- قاڭتاردان باستاپ تەمەكى ونىمدەرى تەك سايكەستەندىرۋ قۇرالدارىمەن تاڭبالاناتىنى بەلگىلى.

اكىمشىلىك قۇقىق بۇزۋشىلىق تۋرالى كودەكستىڭ 283-بابىنا، ياعني «اكتسيزدىك ماركالار» تەرمينىن «سايكەستەندىرۋ قۇرالدارىنا» اۋىستىرۋ تۋرالى وزگەرىس 13- شىلدەدەن باستاپ كۇشىنە ەندى. ايتا كەتسەك، 11- شىلدە كۇنى مەملەكەت باسشىسى «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.

قازاقستان رەسپۋبليكاسى ۇكىمەتىنىڭ قاۋلىسىمەن مىندەتتى تاڭبالاۋعا جاتاتىن تەمەكى ونىمدەرى تۇرلەرىنىڭ ناقتى تىزبەسى (سيگارەتتەر، سيگاريللالار، سيگارالار، ستيكتەر، كاليان تەمەكىسى جانە ت. ب.) بەكىتىلدى.

قازاقستان رەسپۋبليكاسىنىڭ زاڭناماسىنا سايكەس، تەمەكى ونىمدەرىنىڭ اينالىمى سايكەستەندىرۋ قۇرالدارىمەن عانا مۇمكىن بولادى.

سونداي-اق، مەملەكەتتىك كىرىستەر كوميتەتى ەندى تەمەكى ونىمدەرىنىڭ بارلىق تۇرلەرىندە سيفرلىق تاڭبالاۋدىڭ (سايكەستەندىرۋ قۇرالدارىنىڭ) بولماعانى ءۇشىن ورگاندار تاراپىنان تاركىلەنە وتىرىپ، اكىمشىلىك جاۋاپكەرشىلىككە تارتىلاتىنىن ەسكە سالدى.

جىل باسىنان باستاپ ەل اۋماعىنا كونتراباندالىق جولمەن اكەلىنىپ، ساتىلماق بولعان تەمەكى ونىمدەرىنىڭ 22,5 ميلليون قورابى انىقتالىپ، تاركىلەنگەن. ماسەلەن، مەملەكەتتىك كىرىستەر كوميتەتى ءمالىم ەتكەندەي، قازاقستانعا تاڭبالانباعان 4 ميلليون قوراپتان استام تەمەكىنى كونتراباندالىق جولمەن اكەلۋگە تىرىسقاندار انىقتالدى.

بۇل رەتتە بيۋجەتكە تولەۋگە جاتاتىن كەدەندىك تولەمدەردىڭ، سالىقتاردىڭ جانە اكسيزدىڭ الدىن الا سوماسى - 1,2 ميلليارد تەڭگە دەپ باعالاندى.

جاڭالىقتار