باقىتگۇل حامەنوۆا ءبىر اپتا بۇرىن وبلىس اكىمىنىڭ ورىنباسارى لاۋازىمىنان بوساتىلدى

اتىراۋ. قازاقپارات - باقىتگۇل حامەنوۆا ءبىر اپتا بۇرىن اتىراۋ وبلىسى اكىمىنىڭ ورىنباسارى لاۋازىمىنان بوساتىلعان، دەپ حابارلايدى قازاقپارات ءتىلشىسى.

وبلىس اكىمىنىڭ باسپا ءسوز قىزمەتى بۇل دەرەكتى راستادى.

باسپا ءسوز قىزمەتىنىڭ مالىمەتىنشە، اتىراۋ وبلىسىنىڭ اكىمى باقىتگۇل حامەنوۆانى اتقاراتىن لاۋازىمىنان بوستاۋ تۋرالى وكىمگە 2022 -جىلعى 3-تامىزدا قول قويىلعان.

«حامەنوۆا باقىتگۇل قايىرجان قىزى قازاقستان رەسپۋبليكاسىنىڭ 2015 -جىلعى 23-قاراشاداعى «قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭىنىڭ 59-بابىنىڭ 9-تارماقشاسىنا سايكەس مەملەكەتتىك ساياسي قىزمەتشىنى ول اتقاراتىن لاۋازىمعا تاعايىنداۋ (سايلاۋ) قۇقىعى بەرىلگەن لاۋازىمدى ادامنىڭ (ورگان) ءتيىستى شەشىمى بويىنشا ق ر پرەزيدەنتى اكىمشىلىگىنىڭ كەلىسىمىمەن وبلىس اكىمىنىڭ 2022 -جىلعى 3-تامىزداعى №267- وكىمىمەن اتقاراتىن لاۋازىمىنان بوساتىلدى»، - دەپ حابارلادى اكىمنىڭ باسپا ءسوز قىزمەتىنەن.

باقىتگۇل حامەنوۆا اتىراۋ وبلىسى اكىمىنىڭ ورىنباسارى لاۋازىمىنا 2020 -جىلعى 13-ناۋرىزدا تاعايىندالعان.

اتىراۋ وبلىسى اكىمىنىڭ ورىنباسارى قىزمەتىن اتقارعان باقىتگۇل حامەنوۆا اباي ەسكەرتكىشىن ورناتۋعا بولىنگەن قاراجاتتان پارا الدى دەگەن كۇدىكپەن ۇستالدى. ول بىلتىرعى جەلتوقسان ايىندا ۇستالىپ، تەرگەۋ يزولياتورىنا قاماۋعا الىندى.

بۇگىن، 11-تامىزدا اتىراۋداعى №2-قالالىق سوتتا باقىتگۇل حامەنوۆاعا قاتىستى وتىرىس ءوتىپ جاتىر.

باقىتگۇل حامەنوۆا مەن اقىلبەك رىسقالييەۆتىڭ ءىسى ق ر قىلمىستىق كودەكسىنىڭ 366-بابى 3-بولىگىنىڭ 3-تارماعىمەن تەرگەلگەن. ال، «بالقىتۋ» ج ش س ديرەكتورى ءومىرتاي اداموۆ قر قىلمىستىق كودەكسىنىڭ 367-بابى 2-بولىگىمەن تەرگەۋگە الىنعان.

سوتتا باقىتگۇل حامەنوۆا وزىنە تاعىلعان ايىپتى مويىنداعان جوق.

ال، ونىڭ ادۆوكاتى باقىتگۇل حامەنوۆانى ءۇي قاماعىنا اۋىستىرۋدى سۇرادى.

سوت ادۆوكاتتىڭ وتىنىشىنە قاتىستى ازىرگە ناقتى شەشىم شىعارعان جوق.