باقىتگۇل حامەنوۆانىڭ ادۆوكاتى ايىپتالۋشىنى ءۇي قاماعىنا اۋىستىرۋدى سۇرادى
11 تامىز 16:45

باقىتگۇل حامەنوۆانىڭ ادۆوكاتى ايىپتالۋشىنى ءۇي قاماعىنا اۋىستىرۋدى سۇرادى

اتىراۋ. قازاقپارات - اتىراۋ وبلىسى اكىمىنىڭ ورىنباسارى باقىتگۇل حامەنوۆانىڭ ادۆوكاتى ايىپتالۋشىنى ءۇي قاماعىنا اۋىستىرۋدى سۇرادى، دەپ حابارلايدى قازاقپارات.

باقىتگۇل حامەنوۆانىڭ ادۆوكاتى يگور ۆرانچيەۆ سوتتان ءوز كليەنتىنىڭ بۇلتارتپاۋ شاراسىن وزگەرتۋدى، ونى تەرگەۋ يزولياتورىنان ءۇي قاماعىنا اۋىستىرۋدى سۇرادى. سونداي-اق، ايىپتالۋشى مەن ونىڭ اناسىنىڭ دەنساۋلىعىن ەسكەرۋدى، كامەلەتكە تولماعان بالالارىنىڭ بارىن العا تارتتى.

بۇل ءوتىنىشتى باسقا ايىپتالۋشىلاردىڭ ادۆوكاتتارى قولدادى. وزگە ايىپتالۋشىلار تاراپىنان ءوتىنىشحاتقا بايلانىستى نارازىلىق بولعان جوق.

اتىراۋ وبلىستىق پروكۋراتۋراسى باسقارماسىنىڭ پروكۋرورى، كىشى ادىلەت كەڭەسشىسى لاۋرا اسانوۆا سوتتان ءوتىنىشتى قاناعاتتاندىرۋدان باس تارتۋدى سۇرادى.

سوت ادۆوكاتتىڭ وتىنىشىنە قاتىستى ازىرگە ناقتى شەشىم شىعارعان جوق.

ەسكە سالا كەتەلىك، بۇگىن، 11-تامىزدا باقىتگۇل حامەنوۆا قاتىستى سوت ءوتىپ جاتىر.

باقىتگۇل حامەنوۆا مەن اقىلبەك رىسقاليەۆتىڭ ءىسى ق ر قىلمىستىق كودەكسىنىڭ 366-بابىنىڭ 3-بولىگىنىڭ 3-تارماعىمەن تەرگەلگەن. ال، «بالقىتۋ» ج ش س ديرەكتورى ءومىرتاي اداموۆ ق ر قىلمىستىق كودەكستىڭ 367-بابىنىڭ 2-بولىگىمەن تەرگەۋگە الىنعان.

باقىتگۇل حامەنوۆانىڭ ىسىنە قاتىستى ايىپتاۋ اكتىسى 55 بەتتى قۇراعان.

باقىتگۇل حامەنوۆا وزىنە تاعىلعان ايىپتى مويىنداعان جوق.

جاڭالىقتار