قانداي وقۋشىلار مەكتەپ فورماسى مەن وقۋ قۇرالدارىن تەگىن الادى؟

نۇر-سۇلتان. قازاقپارات - ءبىلىم مينيسترلىگى از قامتىلعان وتباسىلارعا مەكتەپ فورماسى مەن وقۋ قۇرالدارىن ساتىپ الۋعا بەرىلەتىن كومەك كولەمىن ۇلعايتۋ تۋرالى باستاما كوتەردى.

رەسمي مالىمەتتەرگە سايكەس، الەۋمەتتىك وسال ساناتتاعى 400 مىڭنان استام بالا مەملەكەت تاراپىنان قارجىلاي قولداۋعا يە بولادى.

«ەگەر بۇرىن بولىنگەن سوما 17-دەن 40 مىڭ تەڭگەگە دەيىن بولسا، بيىل ءبىلىم مينيسترلىگىنىڭ تالابى بويىنشا كومەك مولشەرى ەڭ تومەنگى كۇنكورىس دەڭگەيىنەن، ياعني 37389 تەڭگەدەن تومەن بولماۋى كەرەك»، - دەلىنگەن حابارلامادا.

جەرگىلىكتى اتقارۋشى ورگانداردىڭ ۇسىنىسىمەن كومەك كورسەتۋ مەحانيزمىنە وزگەرىستەر ەنگىزىلگەن. ەندى اقشا اتا- انالارعا بالالارىمەن بىرگە مەكتەپ فورماسىن، اياق كيىم مەن كەڭسە تاۋارلارىن ءوز بەتىنشە تاڭداۋى ءۇشىن بەرىلەدى. بۇعان دەيىن مۇنىڭ بارلىعىن اكىمدىكتەر ساتىپ الىپ، تاۋاردىڭ كولەمى مەن ساپاسىنا بايلانىستى ماسەلەلەر تۋىندايتىن.

«ۆسەوبۋچ» قورىنىڭ اياسىندا اتاۋلى الەۋمەتتىك كومەك الاتىن وتباسىلاردىڭ بالالارىنا، سونداي- اق ااك المايتىن، ءبىراق جان باسىنا شاققانداعى ورتاشا تابىسى ەڭ تومەنگى كۇنكورىس دەڭگەيىنەن تومەن وتباسىلاردىڭ بالالارىنا ماتەريالدىق كومەك كورسەتىلەدى. جاڭا وقۋ جىلى قارساڭىندا سونداي- اق جەتىم بالالار مەن اتا- اناسىنىڭ قامقورلىعىنسىز قالعان بالالار جانە ت. ب. قارجىلاي كومەك بەرىلەدى.

«مەكتەپتەردى قارجىلاندىرۋدى، ونىڭ ىشىندە وقۋشىلاردى قولداۋدى اكىمدىكتەر جۇزەگە اسىراتىندىقتان، بيىل ولار قارجىلاي كومەك الۋعا ءتيىستى بارلىق بالالارعا كەمىندە 37389 تەڭگە كولەمىندە قاراجات بولەدى. بۇل ەڭ تومەنگى سوما، ال بۇرىن سومالار ءارتۇرلى بولدى (17 مىڭ، 20 مىڭ جانە 25 مىڭ). بۇگىندە ەڭ تومەنگى مولشەردەن ارتىق قارجى بولەتىن جەرگىلىكتى اتقارۋشى ورگاندار دا بار. ءبىز بۇنى قۇپتايمىز. قاراجات كولەمىنىڭ ءوسۋى وسى كومەكتى الاتىن 418 مىڭنان استام بالاعا ءتيىمدى»، - دەدى وقۋ- اعارتۋ مينيسترلىگى بالالاردىڭ قۇقىقتارىن قورعاۋ كوميتەتى ءتوراعاسىنىڭ ورىنباسارى دۋلات جەكەبايەۆ.

ايتا كەتۋ كەرەك، بالالار جىلىندا رەسپۋبليكانىڭ ءبىلىم مينيسترلىگى «ۆسەوبۋچ» قورىنىڭ اياسىندا مەكتەپ وقۋشىلارىنا ماتەريالدىق كومەك كورسەتۋ ەرەجەلەرىنە وزگەرىستەر ەنگىزگەن بولاتىن.