اقتوبەدە ءتۇن ورتاسىندا بالاسىن ۇمىتىپ كەتكەن انا تابىلدى

None
اقتوبە. قازاقپارات - اقتوبە قالاسىنىڭ تۇرعىنى كوشەدەگى ورىندىقتان بەس ايلىق بالانى تاۋىپ الدى. ونى اناسى ۇمىتىپ كەتكەن، دەپ حابارلايدى قازاقپارات ءتىلشىسى.

بۇگىن تۇنگى ساعات 1:00 شاماسىندا اقتوبە قالاسىنداعى №3-پوليتسيا ءبولىمىنىڭ كەزەكشى بولىمىنە تۇرعىن حابارلاسىپ، بەس ايلىق بالا كوتەرىپ اكەلدى. وبلىستىق پ د باسپا ءسوز قىزمەتىنىڭ حابارلاۋىنشا، ونى تۇرعىن قالاداعى 8-ناۋرىز كوشەسىندە ورنالاسقان كوپقاباتتى ۇيلەردىڭ ءبىرىنىڭ اۋلاسىنان تاۋىپ العان. بالا ورىندىقتا جىلاپ جاتقان.

«يۋۆەنالدى پوليتسيا ينسپەكتورلارى دەرەۋ جەدەل جاردەم شاقىرىپ، بالانىڭ دەنساۋلىعىن تەكسەرىپ، ءسابيدى «ءۇمىت» بالالار ۇيىنە ورنالاستىردى. ارادا ءبىر ساعاتقا جۋىق ۋاقىت وتكەن سوڭ پوليتسياعا 1997 -جىلى تۋعان اناسى تەلەفون شالىپ، بالاسىنىڭ جوعالىپ كەتكەنىن ايتقان. پوليتسەيلەر اناسىن تاۋىپ، الكوگولدىك ىشىمدىك ىشكەنىن تىركەپ، تۇرمىسى ناشار وتباسى رەتىندە ەسەپكە الدى. بالانىڭ اكەسى تۋرالى مالىمەت جوق. الداعى ۋاقىتتا ينسپەكتورلار ايەلدىڭ ءتارتىبىن قالا اكىمدىگى جانىنداعى كامەلەتكە تولماعانداردىڭ قۇقىعىن قورعاۋ جونىندەگى كوميسسيا وتىرىسىندا قارايدى»، - دەپ حابارلادى وبلىستىق پ د باسپا ءسوز قىزمەتى.

ايتا كەتەيىك، بالا قازىر «ءۇمىت» بالالار ۇيىندە. بالانى اناسىنا قايتا بەرۋ، بەرمەۋ ماسەلەسىن قالا اكىمدىگى جانىنداعى كامەلەتكە تولماعانداردىڭ قۇقىعىن قورعاۋ جونىندەگى كوميسسيا شەشەدى.

سوڭعى جاڭالىقتار