ەكى ايەلىم بار. ورالدىق كاسىپكەردى ءولتىردى دەگەن كۇدىكتى بوساتۋدى سۇرادى
ءىس ماتەريالدارىندا وقيعا قالاي وربىگەنى جازىلعان. كۇدىكتىلەر 6-تامىزدا «راحات لۋكۋم» كاراوكە- مەيرامحاناسىنىڭ عيماراتىندا بولىپ، مەكەمە يەسى ەركىن مۇحانعاليەۆپەن كەزدەسكەن. ولاردىڭ اراسىندا جانجال تۋىنداعان، سول كەزدە قوجانتايەۆ ونىڭ مويىن جانە كەۋدە تۇسىنداعى ومىرلىك ماڭىزدى مۇشەلەرىنە كەم دەگەندە ءۇش رەت پىشاق سالعان. وسى كەزدە تۋرا قاسىندا تۇرىپ امانگەلدى دە پىشاق الىپ شىققان. ول پىشاعىن كورسەتىپ، مەكەمە اكىمشىسىنە جولدى جاۋىپ تاستاعان.
«مۇحانعاليەۆ ءوز ءومىرىن ساقتاۋ ءۇشىن اشىق تۇرعان تەرەزەدەن سەكىرمەك بولعان. وسى كەزدە قوجانتايەۆ ونىڭ بەل ايماعىنان تاعى بىرنەشە سوققى جاساعان. ودان ءارى جارالى مۇحانعاليەۆ ورتالىق ستاديونعا قاراما-قارسى تۇرعان كولىك تۇراعىنا قاراي جۇگىرگەن. كۇدىكتىلەر ونى قۋىپ جەتىپ، امانگەلدى ونى جەرگە قۇلاتىپ، دەنەسىنەن بىرنەشە رەت تەپكىلەگەن. وسى كەزدە قوجانتايەۆ جۇگىرىپ كەلىپ، ودان پىشاق سۇرايدى. امانگەلدى وعان پىشاق بەردى، ول تاعى التى رەت پىشاق سالدى. مۇحانعاليەۆ العان جاراقاتتارىنان وقيعا ورنىندا كوز جۇمدى. قوجانتايەۆ پەن امانگەلدى قىلمىس ورنىنان قاشىپ كەتكەن»، - دەدى پروكۋرور تاجعاليەۆا.
ساراپشىنىڭ ايتۋىنشا، مۇحانعاليەۆتىڭ ولىمىنە مويىن، كەۋدە، بەل ايماعىنداعى پىشاق جاراقاتتارى، سول جاق ۇيقى ارتەرياسىنىڭ، وڭ بۇيرەكتىڭ زاقىمدانۋى جانە ماڭداي سۇيەكتەرىنىڭ سىنۋى سەبەپ بولعان.
«قوجانتايەۆ پەن امانگەلدىنىڭ تۇراقتى تابىس كوزى جوعىن، ولاردىڭ اسا اۋىر قىلمىس جاساعانىن، سودان كەيىن قىلمىستىق قۋدالاۋ ورگاندارىنان جاسىرىنعانىن ەسكەرە وتىرىپ، ولار تاعى دا جاسىرىنىپ، تەرگەۋگە كەدەرگى كەلتىرۋى، جابىرلەنۋشىلەر مەن كۋاگەرلەرگە قىسىم كورسەتۋى مۇمكىن دەگەنگە جەتكىلىكتى نەگىز بار. سوتتان پوليتسيا دەپارتامەنتى تەرگەۋشىسىنىڭ ءوتىنىشىن قاناعاتتاندىرىپ، قوجانتايەۆ پەن امانگەلدىنى ەكى ايعا قاماۋعا الۋدى سانكتسيالاۋدى سۇرايمىن»، - دەپ وقىدى مەملەكەتتىك ايىپتاۋشى.
رۋسلان قوجانتايەۆ تەرگەۋ دالەلدەرىمەن كەلىسپەدى. ول ەكى ايەلى (بىرەۋى جۇكتىلىكتىڭ سوڭعى ايىندا)، بالالارى جانە ءۇيى بارىن ايتقان. ەر ادام سوتتان ءوزىن ەكى ايعا قاماۋعا الماۋدى سۇرادى.
ال تۇرلان امانگەلدى سوتتا رۋسلان قوجانتايەۆ قىسىم كورسەتكەنىن، سول كۇنى وزىمەن بىرگە بارۋعا ماجبۇرلەگەنىن ايتتى. ەكى ايىپتالۋشى دا بۇرىن سوتتالماعان.
ەسكە سالايىق، وقيعا 6-تامىزدا كەشكە بولعان ەدى. ەركىن مۇحانعاليەۆتىڭ ءمايىتى پ. اتويان اتىنداعى ستاديون تۇراعىنان تابىلعان بولاتىن. سونىمەن قاتار، كاسىپكەرگە كافەدە شابۋىل جاسالعانى انىقتالعان.
كەيىنىرەك كۇدىكتىلەردىڭ جەكە باسى انىقتالدى، ولار - كىسى ولتىرگەننەن كەيىن وقيعا ورنىنان قاشىپ كەتكەن 31 جاستاعى رۋسلان قوجانتايەۆ پەن 21 جاستاعى تۇرلان امانگەلدى.
پوليتسەيلەر ورالدان شىعاتىن جانە كىرەتىن جولداردى تەكسەرگەن، كۇدىكتىلەر بارۋى مۇمكىن دەگەن جەرلەر تەكسەرىلگەن. قىلمىسكەرلەردى ۇستاۋعا كۇش قۇرىلىمدارى جۇمىلدىرىلعان.
ارتىنشا ورالدىق كاسىپكەردى ولتىرگەن ءساتتىڭ ۆيدەوسى تاراعان ەدى. كادردا كاسىپكەردىڭ ەكى جىگىتپەن ءدامحانادا سويلەسىپ جاتقانى كورسەتىلگەن.
8-تامىزدا كاسىپكەردى ءولتىردى دەگەن كۇدىكتىلەر ۇستالعانى حابارلانعان. كەيىن ولار ۇستالعان ءساتتىڭ سۋرەتتەرى جاريالانعان بولاتىن.
اقپارات دەرەككوزى: https://massaget.kz/basty-zhaalytar-438/70502/