قايىرىمدىلىق ءۇشىن اقشا جينايتىن بلوگەرلەرگە شارت قويىلدى

نۇر-سۇلتان. قازاقپارات - ەندىگى ۋاقىتتا قايىرىمدىلىق ماقساتىندا حالىقتان جىلۋ جينايتىن بلوگەرلەر الدىن الا كومەككە مۇقتاج كىسىمەن نەمەسە ۇيىممەن كەلىسىمشارتقا قول قويۋى ءتيىس، دەپ حابارلايدى قازاقپارات ءتىلشىسى.

«بلوگەرلەر زاڭعا باعىنباي، كەلىسىمشارت جاساماي قايىرىمدىلىق ءىس ءۇشىن دەپ حالىقتان اقشا جيناسا ول زاڭسىز ارەكەت بولىپ ەسەپتەلەدى. ياعني ول الاياقتىق. ەكىجاقتى كەلىسىمگە كەلۋ قايىرىمدىلىق جاساۋ كەزىندە تۇسىنىسپەۋشىلىك، داۋ- داماي تۋىنداعان جاعدايدا ماسەلەنى زاڭمەن رەتتەۋ ءۇشىن ەنگىزىلىپ وتىر. كەلىسىمگە كەلسە قايىرىمدىلىق ءۇشىن جينالعان قارجىعا قاتىستى ەشقانداي ارتىق سۇراق تۋىندامايدى. مىسالى، بلوگەر ءبىر كىسىگە قايىرىمدىلىق جاساۋ ءۇشىن قارجى جيناۋدى باستاعان نەگىزى 7 ميلليون تەڭگە كەرەك بولعان، ناتيجەسىندە 15 ميلليون تەڭگە جينالعان. ءوز كەزەگىندە بلوگەر كومەككە مۇقتاج جانعا 7 ميلليون تەڭگە بەرىپ، قالعان سومانى باسقا ماقساتقا جۇمسايتىندىعىن ايتقان. سودان كەيىن ەكىجاقتى تۇسىنىسپەۋشىلىك تۋىنداعان»، - دەدى ق ر اقپارات جانە قوعامدىق دامۋ مينيسترلىگى ازاماتتىق قوعام ىستەرى كوميتەتىنىڭ ءتوراعاسى ماديار قوجاحمەت ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ونىڭ ايتۋىنشا، ەلىمىزدە بۇگىنگە دەيىن بلوگەرلەردىڭ حالىقتان قايىرىمدىلىق ءۇشىن قارجى جيناۋ ماسەلەسى نازاردان تىس بولعان.

«ەگەر بلوگەر قانداي دا ءبىر قايىرىمدىلىق قوردىڭ اتىنان جاقسىلىق جاساماق بولسا، وندا سول ۇيىم مەن بلوگەر اراسىندا كەلىسىم جاسالۋى ءتيىس. ال ەگەر بلوگەر وزدىگىنەن قايىرىمدىلىقپەن اينالىسسا وندا كومەك كورسەتەتىن اداممەن كەلىسىمنىڭ بولۋى مىندەتتى. ياعني كىمگە كومەك كورسەتەيىن دەپ جاتىر سول اداممەن كەلىسىم جاسالادى»، - دەدى ق ر پارلامەنتى ءماجىلىسىنىڭ دەپۋتاتى ۆەرا كيم.