اتىراۋدا باقىتگۇل حامەنوۆاعا قاتىستى سوت ءوتىپ جاتىر - فوتو

اتىراۋ. قازاقپارات - اتىراۋدا وبلىس اكىمىنىڭ ورىنباسارى باقىتگۇل حامەنوۆاعا قاتىستى سوت ءوتىپ جاتىر، دەپ حابارلايدى قازاقپارات.

بۇگىن، 11-تامىزدا اتىراۋدا وبلىس اكىمىنىڭ ورىنباسارى باقىتگۇل حامەنوۆاعا، اتىراۋ وبلىسى مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى اقىلبەك رىسقاليەۆكە جانە «بالقىتۋ» ج ش س ديرەكتورى ءومىرتاي اداموۆقا قاتىستى سوت پروتسەسى باستالدى.

سوت اتىراۋداعى №2-قالالىق سوتتا ءوتىپ جاتىر.

باقىتگۇل حامەنوۆا مەن اقىلبەك رىسقاليەۆتىڭ ءىسى ق ر قىلمىستىق كودەكسىنىڭ 366-بابىنىڭ 3-بولىگىنىڭ 3-تارماعىمەن تەرگەلگەن. ال، «بالقىتۋ» ج ش س ديرەكتورى ءومىرتاي اداموۆ ق ر قىلمىستىق كودەكستىڭ 367-بابىنىڭ 2-بولىگىمەن تەرگەۋگە الىنعان.

اتىراۋ وبلىسى اكىمىنىڭ ورىنباسارى قىزمەتىن اتقارعان باقىتگۇل حامەنوۆا اباي ەسكەرتكىشىن ورناتۋعا بولىنگەن قاراجاتتان پارا الدى دەگەن كۇدىكپەن ۇستالدى. ول بىلتىرعى جەلتوقسان ايىندا ۇستالىپ، تەرگەۋ يزولياتورىنا قاماۋعا الىندى.

باقىتگۇل حامەنوۆا 2020 -جىلدىڭ ناۋرىز ايىندا اتىراۋ وبلىسى اكىمىنىڭ ورىنباسارى بولىپ تاعايىندالعان ەدى. ول بۇل تاعايىنداۋعا دەيىن پارلامەنت ءماجىلىسىنىڭ دەپۋتاتى بولعان.

اۆتور بەك مۇستافا