بيىل قىمبات. بالانى مەكتەپكە دايىنداۋعا قانشا قاراجات كەرەك؟
Massaget.kz ءتىلشىسى جاڭا وقۋ جىلىنا قانشا اقشا كەتەدى دەگەن ءداستۇرلى ەسەبىن جۇرگىزىپ، الماتىدا مەكتەپ فورماسىن ساتاتىن بازارلار مەن ساۋدا ۇيىندەگى باعالاردى شولىپ كوردى.
«اقبۇلاق» بازارى
بازاردا اپتانىڭ ورتاسى بولعاندىقتان با حالىق كوپ ەمەس. مەكتەپ فورماسى كۇندەلىكتى قاجەتتى زاتتار ساتاتىن ساتۋشىلاردا عانا تۇر، ارنايى فورما ساتىپ وتىرعانداردى كوزىمىز شالمادى.
بارلىق بازاردى ارالاپ، ارنايى مەكتەپ فورماسىن ساتاتىن ساتۋشى تاپپاعاندىقتان، كۇندەلىكتى قاجەت زاتتارمەن بىرگە ساتىپ وتىرعان ساتۋشىنى سوزگە تارتتىق.
ءوزىن بۋتيكتىڭ يەسى رەتىندە تانىستىرعان ساتۋشى، بيىل مەكتەپ فورماسى قىمباتتاعانىن، بازارعا كەلۋشىلەر از ەكەنىن ايتادى.
«اتا- انالار مەكتەپ فورماسىن الۋعا 10-تامىزدان كەيىن كەلەدى عوي. ازىرگە ادام قاراسى از. كەلگەندەردىڭ ءوزى باعاسى قىمبات دەپ الماي كەتىپ جاتىر. مەن تاۋاردى بىشكەكتەن الىپ كەلەمىن. تۇركيا مەن بەيجىڭنەن الىپ كەلگەندى قاراپايىم حالىقتىڭ قالتاسى كوتەرە بەرمەيدى. حالىقتىڭ جاعدايىنا قارايمىز عوي. قىزدار مەن ۇلدارعا قىرعىزستاننان الىپ كەلگەن قىسقا جەڭدى جەيدەلەردى 4 مىڭ تەڭگەدەن، شالبارلاردى 5 مىڭنان ساتىپ جاتىرمىن»، - دەدى دۇكەن يەسى.
شىنىندا دا، بازاردان تومەن باعا بايقامادىق. مەكتەپ فورماسىنىڭ قازاقستاندا شىعاتىن، سونداي- اق، تۇركيادان، بەيجىڭنەن، بىشكەك پەن وزبەكستاننان كەلەتىن تۇرلەرى بار ەكەن. بازاردا كوبىنە بىشكەكتىڭ كيىمدەرى تۇر.
«مەن كيىمدەردى تۇركيادان الىپ كەلەمىن. ارينە، قىرعىزستاننان كەلەتىن تاۋارعا قاراعاندا قىمبات، ءبىراق ساپالى. بيىل باعا كوتەرىلگەن. بىلتىر 4 مىڭ تەڭگەگە ساتىلعان جەيدەلەر قازىر 6-6,5 مىڭ تەڭگە تۇرادى. شىلدەگە دەيىن بۇرىنعى باعا ساقتالعان، كەيىن بىردەن كوتەرىلىپ كەتتى»، - دەيدى تاعى ءبىر بۋتيك يەسى.
ءارى قاراي بازاردى ارالاپ جۇرە بەردىك. جولاي مەكتەپ فورماسىن، اياق كيىم ساتقان دۇكەندەردەن باعاسىن سۇراي جۇردىك.
ساتۋشىلاردىڭ سوزىنشە، قىز بالانى مەكتەپكە دايىنداۋ ەر بالاعا قاراعاندا الدەقايدا قىمباتىراق. ماسەلەن، ەر بالانىڭ فورماسى (كوستيۋم، شالبار، جەيدە) 20-25 مىڭ تەڭگە بولسا، قىز بالانىڭ فورماسىنا الدەقايدا قىمبات.
بازاردا قىزدارعا ارنالعان جەيدە 4-9 مىڭ تەڭگە ارالىعىندا، سارافاندار 8-10 مىڭ تەڭگە ارالىعىندا، بەلدەمشە 5 مىڭ تەڭگە. قىز بالانىڭ سپورت فورماسى 15-18 مىڭ تەڭگە بولسا، ەر بالاعا ارنالعان سپورت كيىمى 15 مىڭ تەڭگە تۇرادى.
ساتۋشىلاردىڭ سوزىنشە، ءبىرىنشى سىنىپقا باراتىن قىز بالانى مەكتەپكە دايىنداۋ ءۇشىن شامامەن 55-60 مىڭ تەڭگە قاراجات جۇمسالادى.
بيىل سونداي- اق، اياق كيىمدەردىڭ دە باعاسى 20-30 پايىزعا قىمباتتاعان. ساتۋشىلار بۇرىن ەر بالالاردىڭ 7 مىڭ تەڭگەگە ساتىلاتىن اياق كيىمدەرى قازىر 10 مىڭنان جوعارى ەكەنىن ايتادى. ساپاسىنا قاراي تاعى قىمباتتاي بەرەدى. سونداي- اق، ۇلدارعا قاراعاندا قىزداردىڭ اياق كيىمدەرى قىمبات.
«باعانىڭ وسۋىنە كارانتين كەزىندەگى شەكارانىڭ جابىلۋى، دوللاردىڭ ءوسۋى، تۇرىك ليراسىنىڭ ءتۇسۋى اسەر ەتىپ جاتىر. سەبەبى، اياق كيىمدەردى بەيجىڭ مەن تۇركيادان الىپ كەلەمىز عوي. بىلتىر مەكتەپكە كيەتىن ەڭ ارزان اياق كيىمدەردىڭ باعاسى 3 مىڭ تەڭگەدەن باستالسا، بيىل ەڭ ارزانى 7-8 مىڭ تەڭگە»، - دەدى اياق كيىم ساتىپ تۇرعان جىگىت.
بالانىڭ اياعىنان جاعىمسىز ءيىس شىعارمايتىن، تازا بىلعارى اياق كيىم 15 مىڭ تەڭگەدەن 25 مىڭعا دەيىن بارسا، قىتاي ءوندىرىسىنىڭ اياق كيىمدەرى 7,5-10 مىڭ تەڭگە ارالىعىندا.
«قىتايدان كەلەتىن اياق كيىمدەر 7 مىڭ تەڭگەدەن باستالادى، بەيجىڭ مەن تۇركيادان كەلەتىندەر 20 مىڭنىڭ توڭىرەگىندە. اتا- انالار قالتاسىنداعى قاراجاتقا قاراي الادى عوي. بىلعارى اياق كيىمدى دە، ارزان اياق كيىمدى دە سۇراپ جاتقاندار بار. ءبىراق كارانتيننىڭ الدىنداعىداي ساۋدا جوق قوي قازىر. بىرەن- ساران ادامدار كەلىپ جاتىر»، - دەيدى ساتۋشىلاردىڭ ءبىرى.
«كوك بازار»
زەنكوۆ كوشەسىندەگى 100 جىلدان اسا تاريحى بار «كوك بازاردان» مەكتەپ فورماسىن ساتىپ تۇرعان ءبىر- ەكى جەردى عانا بايقادىق. ساتۋشىلار مەكتەپ فورماسىن ىزدەپ كەلىپ جاتقاندار از ەكەنىن ايتادى.
«بيىل وقۋشىلار ءبىرىڭعاي فورما كيەدى دەگەننەن كەيىن مەكتەپ فورماسىن الدىرمادىم. تەك جەيدە، شالبار، بەلدەمشە، كوستيۋم دەگەندەردى جەكە- جەكە ساتىپ جاتىرمىن. بىلتىرعا قاراعاندا بيىل قىمبات»، - دەيدى ساتۋشى.
بازارلاردى ارالاپ شىققاندا بايقاعانىمىز - «كوك بازارداعى» باعا «اقبۇلاققا» قاراعاندا 500-1000 تەڭگە قىمبات. تاڭداۋ از.
Abdi كەڭسە تاۋارلارى دۇكەنىندەگى Glassman
Glassman-دا تەك وتاندىق ءونىمدى ساتاتىن دۇكەن. ساتۋشىلاردىڭ ايتۋىنشا، دۇكەندەگى تاۋارلاردىڭ ماتاسى تۇركيادان اكەلىنسە، ءوزى الماتى وبلىسى تالعار اۋدانىندا تىگىلەدى.
«ءبىزدىڭ دۇكەندەگى كيىمدەر وسى الماتى قالاسىندا تىگىلەدى. ساپاسى وتە جوعارى. اياق كيىمدەر تازا بىلعارىدان جاسالادى. كيىمدەردىڭ ماتاسى تۇركيا ەلىنەن الىنادى. شىلدەنىڭ ورتاسىنان باستاپ باعا 20 پايىزعا ءوستى»، - دەيدى ساتۋشى جۇلدىز.
قىز بالاعا ارنالعان نەگىزگى ءتىزىمنىڭ Glassman-داعى باعاسى:
بلۋزكا نەمەسە اق جەيدە. ساپالى، تەز توزىپ كەتپەيتىن، دەنەگە جاعىمدى ماتەريالدى جەيدە 6 مىڭنان 10 مىڭعا دەيىن.
2. بەلدەمشە 7-8 مىڭ اراسى.
3. بەلدەمشەمەن قاتار، قىزىڭىزعا سارافان كيگىزەمىن دەسەڭىز ونىڭ باعاسى 10 مىڭ تەڭگە.
4. ءبىرىڭعاي فورمانىڭ جاكەتى 12 مىڭ
5. شالباردىڭ باعاسى 7-9 مىڭ
6. جيلەتتىڭ باعاسى 6 مىڭ تەڭگە
6. بىلعارى تۋفليدىڭ باعاسى 20 مىڭ تەڭگە
7. اق ءتۇستى شۇلىق پەن كولگوتكي 2000 دەن 2500 تەڭگەگە دەيىن.
ورتاشا ەسەپپەن قىز بالانى كيىندىرۋگە جۇمسايتىن قاراجاتىڭىز - 80 مىڭ.
ۇل بالاعا ارنالعان نەگىزگى ءتىزىم:
1. مەكتەپ فورماسى «اقبۇلاق» بازارىندا 15 مىڭنان باستالسا، بۇل جەردە 20 مىڭنان جوعارى.
2. قىسقا جەڭدى جەيدە 6 مىڭ، ۇزىن جەڭدى جەيدە 7 مىڭنان باستالادى.
3. بىلعارى تۋفلي 20 مىڭ تەڭگە
4. شالبار 7-9 مىڭ تەڭگە اراسى.
ورتاشا ەسەپپەن ۇل بالانى كيىندىرۋگە جۇمسالاتىن قاراجات - 60-65 مىڭ تەڭگە.
ءبىز الماتىداعى دۇكەندەر مەن بازارلارداعى باعالاردى سالىستىرىپ، دۇكەننەن الساڭ - 90 مىڭ، بازاردان الساڭ 70 مىڭ تەڭگە بولارىنا كوز جەتكىزدىك.