جەكەمەنشىك بالاباقشالاردىڭ جۇمىسىنا قاتىستى شاعىمدار ءتۇسىپ جاتىر - مينيسترلىك
اتا-انالار بالاباقشالاردىڭ قىزمەتىن ەشكىم رەتتەمەيتىنىن ايتىپ، شارا قولدانۋدى تالاپ ەتىپ جاتىر، دەپ حابارلايدى قازاقپارات ق ر وقۋ- اعارتۋ مينيسترلىگىنىڭ باسپا ءسوز قىزمەتىنە سىلتەمە جاساپ.
قوستانايدا بالاباقشا تاربيەشىسى ءۇش جاسار ءبۇلدىرشىندى قاتتى تارتىپ، سالدارىنان ونىڭ سۇيەگى سىنىپ كەتكەن. تاربيەشى جۇمىستان بوساتىلدى، ال بالاباقشا ديرەكتورى اكىمشىلىك جاۋاپقا تارتىلدى.
وقيعا ورال قالاسىنداعى جەكەمەنشىك بالاباقشادا دا بولعان، وندا تاربيەشى كىشكەنتاي قىزدى سوققىعا جىققان.
اتا-انالاردان ورالداعى تاعى ءبىر جەكەمەنشىك بالاباقشانىڭ تاربيەشىسىنە قاتىستى شاعىم ءتۇستى. بالالار اتا-انالارىنا تاربيەشىنىڭ ۇرعانىن ايتىپ شاعىمدانعان. تاربيەلەنۋشىلەردىڭ ايتۋىنشا، ولاردى بىرنەشە اي بويى ۇرىپ-سوعىپ كەلگەن. بالالار تاربيەشىسىنەن قورىققاندىقتان وسى ۋاقىتقا دەيىن اتا-انالارىنا ەشتەڭە ايتپاي كەلگەن. ونىڭ بالالاردى قاتاڭ جازامەن قورقىتقانى بەلگىلى بولدى. بالاباقشا قىزمەتكەرىنە قاتىستى قىلمىستىق ءىس قوزعالدى.
ءبىلىم بەرۋ سالاسىنداعى ساپانى قامتاماسىز ەتۋ جونىندەگى اۋماقتىق باسقارمالارعا بالاباقشاداعى بۇلدىرشىندەردىڭ ءتۇرلى جاراقاتتارى تۋرالى اقپارات كۇن سايىن ءتۇسىپ جاتىر. بۇل پەداگوگتەردىڭ بالالارعا دۇرىس قارامايتىنىن كورسەتەدى.
قىزىلوردادا جەكەمەنشىك بالاباقشادا بۇلدىرشىندەردى قاراۋسىز قالدىرۋ فاكتىلەرى تىركەلدى. دالاعا ءوز بەتىمەن شىعىپ كەتكەن بالالاردى قالانىڭ تۇرعىندارى تاۋىپ العان. ءدال وسىنداي جاعداي ەلوردالىق بالاباقشادا دا بولعان. تاربيەشىلەر تارتىپتىك جاۋاپقا تارتىلدى.
«قۇقىق بۇزۋشىلىقتاردىڭ سانىن ازايتۋ جانە بالاباقشالاردىڭ جۇمىسىن رەتكە كەلتىرۋ ءۇشىن ءبىز ليتسەنزيا بەرۋدى ەنگىزۋدى قولعا الىپ وتىرمىز. بۇل بالالاردىڭ بالاباقشاداعى قاۋىپسىزدىگىن جاقسارتادى. ەگەر بالاباقشا تالاپقا ساي بولسا، وندا قىسقا ۋاقىت ىشىندە تسيفرلى ليتسەنزيا الادى. ال ەگەر ساي بولماسا، كەمشىلىكتەردى جويۋعا ۋاقىت بەرىلەدى. ليتسەنزيا بەرۋ تالاپتارى قاراپايىم. ودان قورقۋدىڭ قاجەتى جوق. جۇمىس ىستەپ تۇرعان بالاباقشالاردىڭ باسىم كوپشىلىگى ليتسەنزيانى وڭاي الا الادى. ءبىز بالالاردى ساپالى مەكتەپكە دەيىنگى تاربيە مەن وقىتۋمەن قامتاماسىز ەتۋگە مۇددەلىمىز»، - دەدى وقۋ- اعارتۋ مينيسترلىگى ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ ءتوراعاسى گۇلزات كوبەنوۆا.