گەرمانيا گاز تاپشىلىعىنان قۇتىلۋدىڭ جولىن ىزدەپ جاتىر
11 تامىز 09:32

گەرمانيا گاز تاپشىلىعىنان قۇتىلۋدىڭ جولىن ىزدەپ جاتىر

نۇر-سۇلتان.قازاقپارات - بۇل ەل تۇتىناتىن گازدىڭ باسىم بولىگىن سولتۇستىك اعىن-1 قۇبىرىمەن جەتكىزەتىن. الايدا سوڭعى كەزدە كوگىلدىر وتىندى جەتكىزۋدە ىركىلىس جيىلەگەن.

شىلدە ايىندا جوندەۋ جۇمىستارىن وتكىزگەننەن كەيىن گازپروم قۇبىر ارقىلى جەتكىزەتىن گاز كولەمىن 20 پروتسەنتكە دەيىن ازايتتى. ءبىرقاتار ساراپشىلار گەرمانيا بۇل تاۋەلدىلىكتەن قۇتىلا الادى دەگەن پىكىردە. الايدا بۇل ءۇشىن گاز تۇتىنۋدى 25 پروتسەنتكە ازايتۋى كەرەك. گەرمانيادا ءۇي شارۋاشىلىقتارىنىڭ جارتىسى گازبەن جىلىتىلادى. سوندىقتان ەل تۇرعىندارى قالاي قىستاپ شىعاتىنىن ۋايىمداپ ءجۇر. ءتىپتى بىلتىر كوۆيدتى جۇقتىرعان ادامدار سانىن باقىلاپ جۇرسەك، ەندى باس نازارىمىز گاز قويمالارىنا اۋىستى دەپ ازىلدەيدى. بۇگىندە ولار 72 جارىم پروتسەنتكە تولعان. 1 -قىركۇيەككە دەيىن 75 پروتسەنتكە، ال قاراشا ايىنا دەيىن %95 كە تولتىرۋ كوزدەلگەن. الايدا رەسەيلىك گازدى جەتكىزۋدەگى ىركىلىس بۇعان كەدەرگى كەلتىرىپ تۇر.

قازىر گازپروم كوگىلدىر وتىن تاسىمالىن 5 ەسە ازايتتى. ساياسات تانۋشىلاردىڭ كوبىسى مۇنى بوپسالاۋ دەپ اتاپ، بالامالى ەنەرگەتيكانى دامىتۋعا شاقىرىپ وتىر.

ولاف شولتس، گەرمانيا كانتسلەرى:

- نەمىس ەكونوميكاسى ەنەرگيا ءوندىرۋ مەن ونى پايدالانۋ ءتاسىلىن وزگەرتەدى. ەلەكتر قۋاتىن ءوندىرۋ ءۇشىن جاڭعىرتىلاتىن ەنەرگيا كوزدەرىن كوپتەپ قولدانۋ قاجەت، سونداي- اق سۋتەگىن دە پايدالانامىز. بۇل ەنەرگيا كوزدەرىنىڭ يمپورتىنان، اسىرەسە رەسەيدەن قانشالىقتى تاۋەلدى ەكەنىمىز كورىنىپ تۇرعان كەزدە اسا ماڭىزدى بولىپ تۇر.

حيميا، مەتالل قۇيۋ، فارماتسيەۆتيكا سەكىلدى ونەركاسىپ سالالارى تولىعىمەن گازعا تاۋەلدى. كومپانيالاردىڭ كوبىسى كوگىلدىر وتىندى ۇنەمدەيتىنىن جاريالاپ، ءوندىرىستى توقتاتپايتىنىنا سەندىردى.

گەرد رەدەرس، مەتالل قۇيۋ سەحىنىڭ ديرەكتورى:

- مەتالل قۇيۋ سەحىن قوسۋ جانە پەشتى قىزدىرۋ - وتە كوپ ەنەرگيانى قاجەت ەتەتىن ءىس. سوندىقتان كۇندە پەشتى جاعىپ، ءسوندىرىپ وتىرۋ قىمباتقا تۇسپەك. قازىر ءبىز نە ءۇش اۋىسىممەن جۇمىس ىستەيمىز نەمەسە ءوندىرىستى تولىق توقتاتامىز. باعانى دا كوتەرۋگە ءماجبۇر بولدىق. بيىل ءبىر پەشىمىزدى سۋتەككە اۋىستىرعىمىز كەلەدى. گازدى سۋتەكپەن ارالاستىرىپ كورەمىز. الايدا ءبارىن ءبىر رەتكە كەلتىرۋ ءۇشىن جىلدار قاجەت.

قازىر گەرمانيا گازدى نيدەرلاندتاعى جانە نورۆەگياداعى كەنىشتەردەن جانە بەلگياداعى سۇيىتىلعان گاز تەرمينالدارىنان جەتكىزەدى. ال رەسەيلىك گازدان تاۋەلدىلىگىنەن قۇتىلۋ ءۇشىن گەرمانيا سۇيىتىلعان گاز قابىلدايتىن 5 تەرمينال سالۋدى كوزدەپ وتىر. ونىڭ ۇشەۋى بيىل ىسكە قوسىلادى.

www.24.kz

جاڭالىقتار