ەۋروپا ەلدەرى ەنەرگيانى ۇنەمدەۋ شارالارىنا كوشكەن

نۇر-سۇلتان.قازاقپارات - ەنەرگيانىڭ قىمباتتاۋى كوپ ەلدە ينفلياتسيانى ءورشىتتى. اسىرەسە كارى قۇرلىققا وڭاي بولماي تۇر.

ويتكەنى ۋكرايناداعى شيەلەنىسكە بايلانىستى ەۋرووداق رەسەيلىك مۇناي، گاز بەن كومىر يمپورتىن شەكتەدى. ەندى رەسەيدەن جەتكىزىلەتىن شيكىزاتقا تاۋەلدىلىكتى ازايتۋ ءۇشىن بىرلەستىك گازدى تۇتىنۋ مولشەرىن 15 پروتسەنتكە ازايتۋدى قولعا الدى. وداققا مۇشە ەلدەر ودان دا باسقا ۇنەمدەۋ شارالارىن ىسكە اسىرۋعا كوشكەن.

يسپانيادا ەندى كەڭسەلەر، دۇكەندەر مەن قوناق ۇيلەردە كونديتسيونەرلەردەگى تەمپەراتۋرانى 27 گرادۋستان تومەن سۋىتۋعا بولمايدى. ال قىستا 19 گرادۋستان جوعارى كوتەرۋگە رۇقسات جوق. ساۋدا ورىندارىنىڭ سورەلەرىندە تۇنگى وننان كەيىن جارىق سوندىرىلۋگە ءتيىس. بيلىك وسىلايشا ەلەكتر ەنەرگياسىن ۇنەمدەۋدى كوزدەپ وتىر. بۇعان دەيىن مەملەكەتتىك مەكەمەلەرگە دە ءتيىستى تالاپ قويىلعان. ال ەندى كەشەدەن بەرى گازدى تۇتىنۋ مولشەرىن ازايتۋ جوسپارى كۇشىنە ەندى.

پەدرو سانچەس، يسپانيانىڭ پرەمەر- ءمينيسترى:

- گەرمانيا، يتاليا سەكىلدى ەلدەر رەسەيلىك ەنەرگيا كوزدەرىنە قاتتى تاۋەلدى. ەۋرووداقتىڭ وزگە ەلدەرىمەن سالىستىرعاندا يسپانيانىڭ گەوگرافيالىق ورنالاسۋىنا بايلانىستى بىزدە ونداي تاۋەلدىلىك جوق. دەسە دە ءبىز نيەتتەستىك تانىتىپ، بىرلەستىكتىڭ باسقا مەملەكەتتەرى سەكىلدى ۇنەمدەۋ شارالارىن ورىندايتىن بولامىز.

« الايدا بيلىكتىڭ بۇل جوسپارىمەن تۇرعىندار كەلىسپەيدى. ويتكەنى يسپانيا ەۋروپاداعى ەڭ ىستىق ەلدەردىڭ ءبىرى سانالادى. سوندىقتان كۇن شىجىپ تۇرعىندا كونديتسيونەردى قولدانۋ بويىنشا شەكتەۋ تۇرعىندارعا ىڭعايسىزدىق تۋدىرۋى مۇمكىن. شىلدەدە اۋا تەمپەراتۋراسى 40 گرادۋستان تۇسپەي قويعان. ەندى الداعى كۇندەرى تاعى دا سولاي بولادى دەگەن بولجام بار.

www.24.kz