قاراعاندىلىق دارىگەرلەر قولقا تامىرى ۇزىلگەن ناۋقاستىڭ ءومىرىن ساقتاپ قالدى
11 تامىز 08:02

قاراعاندىلىق دارىگەرلەر قولقا تامىرى ۇزىلگەن ناۋقاستىڭ ءومىرىن ساقتاپ قالدى

قاراعاندى. قازاقپارات - قاراعاندى قالاسىنداعى كارديوحيرۋرگيا ورتالىعىندا كۇردەلى وتا جاسالدى. ماماندار قولقا تامىرى ۇزىلگەن ناۋقاستىڭ ءومىرىن ساقتاپ قالدى، دەپ حابارلايدى قازاقپارات ءتىلشىسى.

قاراعاندىلىق كارديوحيرۋرگ دارىگەرلەر قولقا تامىرى ۇزىلگەن 58 جاستاعى ناۋقاستىڭ ءومىرىن ساقتاپ قالدى.

قاراعاندىلىق ۆيكتور بوجەنكوعا اورتانىڭ جارىلۋى دياگنوزى قويىلدى.

«تامىردىڭ جارىلۋى ەكى كەزەڭنەن تۇرادى. كەيدە اورتا ءۇزىلىپ كەتەدى دە، ادام كوز جۇمادى. ال كەيدە ىشكى بولىك جارىلىپ، تامىر سىرتقى قاباتىندا ۇستالىپ تۇرادى. بۇل امان قالۋعا مۇمكىندىگى بار پاتسيەنتتەر، ءبىز جىرتىلعان جەردى پروتەزدەۋ جۇمىستارىن جۇرگىزەمىز. بۇل ناۋقاستا اورتانىڭ كوتەرىلىپ كەلە جاتقان بولىگى عانا زاقىمدالماي، تامىردىڭ ءۇزىلۋى جوعارىعا شىعىپ كەتكەن. بۇل اۋماقتى پروتەزدەۋ قيىن، مۇندا تامىرلار كوپ»، - دەيدى جوعارى ساناتتى كارديوحيرۋرگ، كارديوورتالىقتىڭ ديرەكتورى ارىستان ماعزۇموۆ.

جوعارعى ءبولىم مەن اورتا دوعاسىن پروتەزدەۋ وپەراتسياسى شامامەن بەس ساعاتقا سوزىلدى. ناۋقاس جاساندى قان اينالىم اپپاراتىنا قوسىلدى، جۇرەك ءبىراز ۋاقىتقا توقتاپ، دەنەنى 18 گرادۋسقا دەيىن سالقىنداتتى. ۆيكتور ەكى اپتاعا جۋىق جان ساقتاۋ بولىمىندە بولدى. سودان كەيىن وڭالتۋ كۋرسىنان ءوتتى.

«قازىر قالپىما كەلىپ جاتىرمىن. مەنىڭ ويىمشا، بۇل جاعدايدا ماعان تاعدىر ەكى رەت سىيلىق جاسادى. جەدەل جاردەم فەلدشەرى وتە تاجىريبەلى بولىپ شىقتى جانە بىردەن كارديولوگيالىق ورتالىققا جىبەرۋگە شەشىم قابىلدادى. ەكىنشى رەت باعىمنىڭ اشىلعانى وسىنداي حيرۋرگتارعا تۇسكەنىم»، - دەيدى ۆيكتور.

جىل باسىنان بەرى وبلىستىق كارديوحيرۋرگيا ورتالىعىندا اورتاسى ۇزىلگەن بەس ناۋقاسقا وتا جاسالدى. دارىگەرلەر بۇل پاتولوگيانىڭ قاۋىپتى توبىنا ەمدەۋدەن وتپەيتىن جوعارى قان قىسىمى بار جانە اتەروسكلەروزى بار ادامدار جاتقىزىلاتىنىن ايتادى. ايتا كەتۋ كەرەك، اورتانىڭ جىرتىلۋ جاعدايلارىنىڭ %80 ى ولىممەن اياقتالادى، ويتكەنى بۇل ەڭ ۇلكەن تامىر جانە ونىڭ قابىعى تولىق جىرتىلسا، ادام كوپ قان جوعالتادى.

«بۇل پاتولوگيانىڭ كۇردەلىلىگى مەن قاۋىپتىلىگى - وعان ءتان كەلمەيتىن بەلگىلەر. ارنايى ادىستەرسىز - كومپيۋتەرلىك توموگرافيا، كارديوسكوپيا، كلينيكالىق دياگنوز قويۋ وتە قيىن. دياگنوزدان كەيىن ءبىر عانا شەشىم بار - ادام مۇمكىندىگىنشە تەزىرەك وپەراتسياعا بارۋى كەرەك»، - دەيدى كارديوحيرۋرگيا ءبولىمىنىڭ مەڭگەرۋشىسى سەرگەي سوي.

جاڭالىقتار