داۋىلدا ارىپتەستەرىن قۇتقارىپ ءجۇرىپ مەرت بولعان جاۋىنگەر ماراپاتقا ۇسىنىلدى

نۇر-سۇلتان. قازاقپارات - داۋىلدا ارىپتەستەرىن قۇتقارىپ ءجۇرىپ كوز جۇمعان ۇلتتىق ۇلاننىڭ جاۋىنگەرى الماس شاحيموۆ ماراپاتقا ۇسىنىلدى.

بۇل تۋرالى ۇلتتىق ۇلاننىڭ باسپا ءسوز قىزمەتىنەن ءمالىم بولدى، دەپ حابارلايدى قازاقپارات ءتىلشىسى.

ايتا كەتەيىك، قايعىلى وقيعا كەشە الماتى وبلىسىنداعى 5571 اسكەري بولىمىندە بولعان.

ۆەدومستۆو دەرەگىنشە، 1-جەدەل ماقساتتاعى باتالوننىڭ جەكە قۇرامى دالالىق جاتتىعۋدا جۇرگەندە داۋىل كوتەرىلىپ، ساربازدار ورنالاسقان شاتىر بۇزىلا باستاعان.

وسى ۋاقىتتا قاتارداعى جاۋىنگەر ا. ن. شاحيموۆ ارىپتەستەرىنىڭ قاۋىپسىز ورىنعا شىعۋىنا كومەكتەسىپ ءجۇرىپ، باسىنا شاتىردىڭ تەمىر جاقتاۋى ءتيىپ، جاراقات العان.

وعان دەرەۋ العاشقى مەديتسينالىق كومەك كورسەتىلگەن. دەگەنمەن ونى اجالدان امان الىپ قالۋ مۇمكىن بولمادى.

«جاۋىنگەر ا. ن. شاحيموۆ ءوزىنىڭ قارۋلاستارىن قۇتقارۋ بارىسىندا جانقيارلىق تانىتىپ، مەرت بولدى. مارۇمنىڭ دەنەسى الماتىدان كوكشەتاۋعا اسكەري بورتپەن جىبەرىلەتىن بولادى. جاۋىنگەردىڭ اتا-اناسىنا زاڭناماعا سايكەس، 500 ا ە ك (1531500 تەڭگە) جانە 80 ا ە ك (245040 تەڭگە) ماتەريالدىق كومەك كورسەتىلەدى. سونداي-اق، الماس شاحيموۆ ماراپاتقا ۇسىنىلادى»، - دەلىنگەن قۇزىرلى ورگان تاراتقان حابارلامادا.

ۇلتتىق ۇلان اقپاراتىنا ساي، جاۋىنگەر الماس شاحيموۆ 2003 -جىلى تۋعان.

اقمولا وبلىسى كوكشەتاۋ قالاسىنىڭ قورعانىس ىستەرى جونىندەگى دەپارتامەنتىمەن 2022 -جىلدىڭ كوكتەمىندە شاقىرىلعان.

ەسكە سالا كەتسەك، الماس قازا تاپقان داۋىل كەزىندە تاعى 14 اسكەري قىزمەتشى جاراقات العان. ولارعا ءتيىستى مەديتسينالىق كومەك كورسەتىلگەن.