انتيكور باسشىسى پرەزيدەنتكە ەسەپ بەردى
10 تامىز 18:45

انتيكور باسشىسى پرەزيدەنتكە ەسەپ بەردى

نۇر-سۇلتان. قازاقپارات - مەملەكەت باسشىسى سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى ولجاس بەكتەنوۆتى قابىلدادى، دەپ حابارلايدى قازاقپارات.

پرەزيدەنت باسپا ءسوز قىزمەتىنىڭ مالىمەتىنە قاراعاندا، قاسىم-جومارت توقايەۆقا ەلدەگى سىبايلاس جەمقورلىققا قارسى ءىس-قيمىل بويىنشا قابىلدانىپ جاتقان شارالار باياندالعان.

اتاپ ايتقاندا بيىلعى 7 ايدا 1400 دەن استام سىبايلاس جەمقورلىق قىلمىسى تىركەلىپ، جەمقورلىق فاكتىسىمەن 900 گە جۋىق تۇلعا اشكەرەلەندى.

پرەزيدەنتكە سىبايلاس جەمقورلىق قىلمىستارىنا جول بەرمەۋ جونىندەگى پروفيلاكتيكالىق جانە الدىن الۋ شارالارى تۋرالى مالىمەت بەرىلدى.

ولجاس بەكتەنوۆتىڭ ايتۋىنشا، اتالعان شارالار اياسىندا كولىكتىك باقىلاۋ، الەۋمەتتىك كاسىپكەرلىك كورپوراتسيالارى، سونداي-اق يندۋستريا جانە ينفراقۇرىلىمدىق دامۋ مينيسترلىگىنىڭ مەملەكەتتىك قورعانىستىق تاپسىرىس كوميتەتى سالالارىنداعى سىرتقى تالداۋدىڭ اياقتالعانىن حابارلادى.

سىبايلاس جەمقورلىق قاۋىپتەرى مەملەكەتتىك قورعانىس تاپسىرىسىن قالىپتاستىرۋدىڭ ءونىم كولەمىن جوسپارلاۋدان باستاپ شارت مىندەتتەمەلەرىن ورىنداۋعا دەيىنگى بارلىق ساتىسىندا كەزدەسەدى.

پرەزيدەنتتىڭ تاپسىرماسىنا سايكەس اگەنتتىك سىبايلاس جەمقورلىققا قارسى قىزمەت بولىمشەلەرىنىڭ جۇمىسىن باعالاۋ تاسىلدەرىن قايتا قارادى.

ستاتيستيكالىق كورسەتكىشتەر ءۇشىن عانا جاسالاتىن ارەكەتتەر الىنىپ تاستالدى.

ۆەدومستۆونىڭ قىزمەتىندە باعدار رەتىندە سىبايلاس جەمقورلىق قاۋىپتەرىنىڭ كارتاسى ايقىندالىپ، وعان پروتسەستەردىڭ اشىق بولماۋىنا، اكىمشىلىك كەدەرگىلەرگە جانە جەرگىلىكتى جەرلەردەگى مەملەكەتتىك قىزمەتشىلەردىڭ ءوز مىندەتتەرىن ءتيىستى دەڭگەيدە ورىنداماۋىنا بايلانىستى حالىق پەن بيزنەستى تولعاندىراتىن كوكەيكەستى ماسەلەلەر ەنگىزىلدى.

مەملەكەت باسشىسى سىبايلاس جەمقورلىققا قارسى قىزمەتتىڭ جۇمىسىن كۇشەيتۋ جونىندە ءبىرقاتار مىندەت جۇكتەدى.

جاڭالىقتار