قازاقستان بەنزينى قىرعىزستانعا كونتراباندالىق جولمەن تاسىمالدانىپ جاتىر
10 تامىز 12:43

قازاقستان بەنزينى قىرعىزستانعا كونتراباندالىق جولمەن تاسىمالدانىپ جاتىر

بىشكەك. قازاقپارات - 2022 - جىلعى 12- شىلدەدەن باستاپ قازاقستان رەسپۋبليكاسىنىڭ اۋماعىنان اۆتوموبيل كولىگىمەن بەنزيندى، ديزەل وتىنىن جانە مۇناي ونىمدەرىنىڭ جەكەلەگەن تۇرلەرىن بەلگىلەنگەن نورمادان ارتىق شىعارۋعا تىيىم سالىندى.

ەنگىزىلگەن شەكتەۋلەرگە قاراماستان، قىرعىزستانمەن شەكارالاس ايماقتا قازاقستاندىق جانارمايدى كونتراباندالىق جولمەن ساۋدالاۋ توقتاماي تۇر، دەپ حابارلايدى قازاقپارات مەنشىكتى ءتىلشىسى.


قىرعىز تاراپىنان «قورداي» شەكارالىق وتكەلىنە ىرگەلەس ەلدى مەكەندەردە جول جيەگىندە پلاستيكالىق ىدىستا اي- 92 ماركالى قازاقستاندىق بەنزيندى 1 ليتر ءۇشىن 55 سوم باعامەن، سونداي- اق اي-95 1 ليتر ءۇشىن 58 سوم باعامەن ساتۋ ورىندارى ۇيىمداستىرىلعان. قىرعىزستانداعى جانارماي قۇيۋ بەكەتتەرىندە ولاردىڭ قۇنى شامامەن 60 جانە 63 سومدى قۇرايدى.

كونترافاكتىنى ساتۋشىلاردىڭ ايتۋىنشا، جانار- جاعارمايدى ولارعا جەرگىلىكتى جەتكىزۋشىلەر دە، قازاقستاندىقتار دا جەتكىزەدى. ولار ءۇشىن شەكارا ارقىلى بەنزين تاسىمالداۋ - بيزنەس جانە تۇراقتى قوسىمشا تابىس كوزى بولىپ وتىر. ويتكەنى قازاقستانداعى وتىن باعاسى ايتارلىقتاي ارزان.

كوپتەگەن جۇرگىزۋشىلەر وتىندى زاڭسىز ساتۋ ماقساتىندا جەكە كولىكتەرىمەن شەكارادان جانارماي تاسىمالدايدى. ولار جانارماي باكتارىن كوبەيتۋ ارقىلى اۆتوموبيلدەرىنىڭ تەحنيكالىق سيپاتتامالارىنا ءوز بەتىنشە وزگەرىستەر ەنگىزەدى. جانار- جاعارماي تاسىمالداۋشىلارىنىڭ قاۋىپسىزدىك تەحنيكاسىن ورەسكەل بۇزۋى اۆتوكولىك قۇرالدارىنىڭ جانۋىنا جانە قايعىلى سالدارعا اكەلۋى مۇمكىن.

اۆتور اياۋلىم التىنبەك



جاڭالىقتار