زەينەتاقىلار مەن جاردەماقىلاردى تاعايىنداۋ كەزىندە قانداستار كەيدە جالعان قۇجاتتار ۇسىنادى - مينيسترلىك
10 تامىز 11:41

زەينەتاقىلار مەن جاردەماقىلاردى تاعايىنداۋ كەزىندە قانداستار كەيدە جالعان قۇجاتتار ۇسىنادى - مينيسترلىك

نۇر- سۇلتان. قازاقپارات – ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ەڭبەك جانە الەۋمەتتىك قورعاۋ كوميتەتىنىڭ اۋماقتىق دەپارتامەنتتەرىنىڭ باسشىلارىمەن كەڭەس وتكىزدى، دەپ حابارلايدى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ.

كەڭەس بارىسىندا ازاماتتاردى زەينەتاقىمەن جانە الەۋمەتتىك قامسىزداندىرۋ، مەديتسينالىق- الەۋمەتتىك ساراپتاما جۇرگىزۋ، مۇگەدەكتىگى بار ادامداردى الەۋمەتتىك قورعاۋ سالاسىندا جانە ارناۋلى الەۋمەتتىك قىزمەتتەر كورسەتۋ سالاسىندا مەملەكەتتىك باقىلاۋدى جۇزەگە اسىرۋ ماسەلەلەرى قارالدى.

ءبىرىنشى جارتىجىلدىقتىڭ قورىتىندىسى بويىنشا قازاقستاندا 3 ميلليون 558 مىڭ زەينەتاقى مەن جاردەماقى الۋشى تىركەلگەن. وسى جىلدىڭ 6 ايىندا اۋماقتىق دەپارتامەنتتەر زەينەتاقى مەن جاردەماقى تاعايىنداۋعا ارنالعان 1 ميلليون 233 مىڭ ءىس ماكەتىن قارادى، بۇل وتكەن جىلدىڭ سايكەس كەزەڭىندەگى كورسەتكىشتەن % 12,7 - عا ارتىق.

زەينەتاقىلار مەن جاردەماقىلاردى تاعايىنداۋ كەزىندەگى نەگىزگى پروبلەمالىق ماسەلەلەر ازاماتتاردىڭ زەينەتكە شىعار الدىندا تابىسىن جوعارى ەتىپ كورسەتۋى، جاسىنا بايلانىستى بەرىلەتىن زەينەتاقىنى ەكى رەت - قازاقستاننان جانە رەسەيدەن الۋى، قىتايدان كەلگەن قانداستاردىڭ ەڭبەك قىزمەتى تۋرالى جالعان قۇجاتتاردى ۇسىنۋى بولىپ تابىلادى.

بۇل ماسەلەلەردى شەشۋ جولدارى قارجى، سىرتقى ىستەر، ىشكى ىستەر مينيسترلىكتەرىنىڭ جانە «ازاماتتارعا ارنالعان ۇكىمەت» مەملەكەتتىك كورپوراتسياسى» ك ە ا ق وكىلدەرىمەن بىرگە تالقىلاندى.

كەڭەس بارىسىندا مۇگەدەكتىكتى انىقتاۋ بويىنشا مەديتسينالىق- الەۋمەتتىك ساراپتاما جۇرگىزۋ ماسەلەسى دە قارالدى. مينيستر مۇگەدەكتىگى بار ادامداردى سىرتتاي كۋالاندىرۋ بويىنشا پيلوتتىق جوبانى ىسكە اسىرۋدىڭ وڭ ناتيجەلەرىن اتاپ ءوتتى. 2022 -جىلدىڭ باسىنان بەرى قازاقستاننىڭ بارلىق وڭىرلەرىنەن 31,9 مىڭعا جۋىق ءوتىنىم قارالدى. مۇگەدەكتىكتى بەلگىلەۋ بويىنشا سىرتتاي قىزمەت كورسەتۋ % 22- دى قۇرادى، بۇل وسى جىلعا جوسپارلانعان كورسەتكىشتەن % 2- عا ارتىق.

سىرتتاي كۋالاندىرۋعا كوشۋ: اكىمشىلىك جانە بيۋروكراتيالىق كەدەرگىلەردى جويادى؛ ساراپتامالىق شەشىمدەردىڭ اشىقتىعىن قامتاماسىز ەتەدى؛ ۇيدەن شىقپاي- اق مۇگەدەكتىكتى بەلگىلەۋ جانە مۇگەدەكتىگى بار ادامداردى الەۋمەتتىك قورعاۋ شارالارىن ايقىنداۋ بويىنشا قىزمەتتەر الۋعا مۇمكىندىك بەرەدى؛ كورسەتىلەتىن قىزمەتتى الۋشىنىڭ كورسەتىلەتىن قىزمەتتى بەرۋشىمەن تىكەلەي بايلانىسىن بولدىرمايدى، وسىلايشا سىبايلاس جەمقورلىق تاۋەكەلدەرىن بارىنشا ازايتادى.

سونداي- اق، كەڭەستە مۇگەدەكتىگى بار ادامداردى الەۋمەتتىك قورعاۋ سالاسىنداعى تەكسەرۋ ناتيجەلەرى تالقىلاندى. 2022 -جىلدىڭ ءبىرىنشى جارتىجىلدىعىندا 606 تەكسەرۋ جۇرگىزىلدى، ونىڭ بارىسىندا 2,6 مىڭ زاڭبۇزۋشىلىق انىقتالدى. 497 ۇيعارىم بەرىلدى، 146 باقىلاۋ سۋبەكتىسىنە جالپى سوماسى 27,8 ميلليون تەڭگەگە ايىپپۇل سالىندى.

«وسى ماسەلەلەردى تالقىلاعاننان كەيىن تامارا دۇيسەنوۆا ەڭبەك جانە الەۋمەتتىك قورعاۋ كوميتەتىنىڭ اۋماقتىق دەپارتامەنتتەرىنىڭ جۇمىس ساپاسىن ارتتىرۋعا، حالىقتى زەينەتاقىمەن جانە الەۋمەتتىك قامسىزداندىرۋ سالاسىندا كورسەتىلەتىن مەملەكەتتىك قىزمەتتەردىڭ ساپاسىن ارتتىرۋعا باعىتتالعان ءبىرقاتار تاپسىرما بەردى»، - دەلىنگەن حابارلامادا.

رەداكتور ايدار وسپاناليەۆ


جاڭالىقتار