قازاقستاندىق اۋە كومپانيالارى قىتاي مەن وزبەكستانعا رەيستەر سانىن ارتتىرماق

نۇر- سۇلتان. قازاقپارات - قازاقستاندىق اۋە كومپانيالارى قىتاي مەن وزبەكستانعا رەيستەر سانىن ارتتىرۋدى كوزدەپ وتىر، دەپ حابارلايدى قازاقپارات ق ر يندۋستريا جانە ينفراقۇرىلىمدىق دامۋ مينيسترلىگىنىڭ باسپا ءسوز قىزمەتىنە سىلتەمە جاساپ.

باسپا ء سوز قىزمەتىنىڭ مالىمەتتەرىنە قاراعاندا، ق م ر يندۋستريا جانە ينفراقۇرىلىمدىق دامۋ مينيسترلىگىنىڭ «اشىق ساعات الاڭىنداعى» كەزەكتى جيىن اۋە تاسىمالىنداعى وزەكتى ساۋالدارعا ارنالدى.

اتاپ ايتقاندا، Zoom جەلىسىندە ۇيىمداستىرىلعان باسقوسۋدا تۇراقتى حالىقارالىق جاڭا اۋە رەيستەرىن اشۋ مەن وسى ورايدا تۋىنداعان ءتۇرلى ماسەلەلەر نازارعا الىندى.

بەينەبايلانىس رەجيمىندەگى جيىندا «ەير استانا» ، «SCAT اۋە كومپانياسى» جانە «Qazaq Air» سىندى وتاندىق اۆياكومپانيالاردىڭ وكىلدەرى پاندەمياعا بايلانىستى توقىراۋعا ۇشىراعان حالىقارالىق تۇراقتى اۋە جەلىلەرىن قايتا قالپىنا كەلتىرۋ جانە ۇشۋ گەوگرافياسى اۋماعىن كەڭەيتۋ بارىسىنداعى ءىس- شارالاردى اتاپ ءوتتى.

اۋە تاسىمالداۋشى كومپانيا وكىلدەرىنىڭ ايتۋىنشا، ۇشۋدى قايتا قالپىنا كەلتىرۋ جۇمىستارى جۇيەلى جۇزەگە اسىرىلۋدا جانە بۇل تاراپتا قازاقستاننىڭ اۋە بيلىگىنىڭ كومەگىنە ايتارلىقتاي مۇقتاج ەمەس.

بۇگىندە حالىقارالىق اۋە تاسىمالى 28 مەملەكەتكە 115 باعىت بويىنشا اپتاسىنا 518 جيىلىكتە ورىندالادى. اۋە قاتىناسى ورنىقتى جولعا قويىلعان ەلدەر قاتارىنا ازەربايجان، ارمەنيا، بەلارۋس، ۇلى بريتانيا، گەرمانيا، گرەتسيا، ەگيپەت، ءۇندىستان، يران، يتاليا، كاتار، قىتاي، كۋۆەيت، قىرعىزستان، مالديۆ ارالدارى، موڭعوليا، نيدەرلاندى، ب ا ءا، پولشا، رف، ساۋد اراۆياسى، تاجىكستان، تايلاند، تۇركيا، وزبەكستان، چەحيا جانە وڭتۇستىك كورەيا كىرەدى.

قازاقستاندىق اۆيا تاسىمالداۋشىلار 2022 -جىلدىڭ العاشقى جارتىجىلدىعىندا حالىقارالىق اۋە جەلىلەرى ارقىلى 1,2 ميلليون جولاۋشى تاسىمالداعان. بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 60 پايىزعا جوعارى (0,7 ميلليون).

ق ر ي ي د م ازاماتتىق اۆياتسيا كوميتەتى وتاندىق اۋە تاسىمالداۋشى كومپانيالارعا ۇشۋ گەوگرافياسى اۋماعان كەڭەيتۋدى تالاپ ەتۋدە. قازىرگى كۇندە بۇل تاراپتا ءبىرقاتار جۇمىستار اتقارىلۋدا. اتاپ ايتقاندا، پاكىستانمەن اۋە قاتىناسىن ورناتۋ بويىنشا جۇمىستار جۇرگىزىلۋدە. سونداي- اق سۇرانىستىڭ ارتۋىنا بايلانىستى قازاقستان، وزبەكستان جانە قىتايدىڭ ءبىرقاتار قالاسىنا جاڭا باعىتتار اشۋ كوزدەلىپ وتىر. دەسە دە جولاۋشىلار سۇرانىسىن ءتيىستى دەڭگەيدە قاناعاتتاندىرۋ مۇمكىن بولماي وتىر.

ماسەلەن، كارانتيندىك شەكتەۋلەرگە بايلانىستى بۇگىندە قىتايعا اپتاسىنا 3 رەيس قانا جاسالادى. ال پاندەمياعا دەيىن 40 تان استام اۋە تاسىمالى جۇزەگە اسىرىلاتىن. ءوز كەزەگىندە سۇرانىستىڭ ارتۋى بيلەت باعاسىنا دا ءوز اسەرىن تيگىزۋدە.

«ءبىز قىتايدىڭ ازاماتتىق اۆياتسيا بيلىگىنە رەيس سانىن ارتتىرۋ بويىنشا بىرنەشە رەت سۇرانىس حات جولدادىق. سونىمەن قاتار جاڭا اۋە باعىتتارى مەن رەيستەر سانىن كوبەيتۋ بويىنشا وزبەكستاندىق ارىپتەستەرىمىزگە دە ۇسىنىس بىلدىردىك. جۋىق ارادا قىتاي، وزبەكستان جانە پاكىستاننىڭ اۆياتسيا بيلىگىنە اتالعان ماسەلەلەردى جەدەل شەشۋگە ىقپال ەتۋدى قايتا سۇرايتىن بولامىز»، - دەدى ازاماتتىق اۆياتسيا كوميتەتى ءتوراعاسىنىڭ ورىنباسارى سالتانات تومپيەۆا.

جيىن بارىسىندا بۇقارالىق اقپارات قۇرالدارىنىڭ وكىلدەرى تاقىرىپ توڭىرەگىندە سالا ماماندارىنا ءوز سۇراقتارىن قويۋعا مۇمكىندىك بەرىلدى.

اتاپ ايتقاندا، orda.kz اقپاراتتىق- ساراپتامالىق پورتالىنىڭ ءتىلشىسى ۇشاقتاردىڭ كەشىگۋىنە بايلانىستى ورىن العان وقيعالار تۋراسىندا حابارلاپ، رەيستەر كەستەسىن جوسپاردان تىس وزگەرتەتىن جانە توقتاتاتىن اۆياكومپانيالارعا قولدانىلاتىن شارالار جايىن قاۋزادى. سونداي- اق ول كەشىككەن رەيستەردىڭ جولاۋشىلارىنا كورسەتىلەتىن قوسىمشا قىزمەتتەر زاڭدىلىعىنىڭ بۇزىلۋىنا بايلانىستى ماسەلەگە نازار اۋداردى.

ب ا ق وكىلىنىڭ ساۋالىنا سالتانات تومپيەۆا جان- جاقتى ءارى تولىققاندى جاۋاپ بەردى

«كوممەرتسيالىق اۆياكومپانيا ءۇشىن ۇشاقتىڭ اۋەدە بولعانى ماڭىزدى. سەبەبى سوندا عانا ول قارجى اكەلەدى. ال ونىڭ جەردە بولۋى شىعىن ەكەندىگى بەلگىلى. بۇل تاراپتا اۋە تاسىمالداۋشى كومپانيالار ۇشۋ رەيستەرىنىڭ كەشىگۋى نەمەسە توقتاتىلۋىنا مۇددەلى ەمەس. بۇل - باسى ارتىق شىعىن»، - دەپ اتاپ ءوتتى ق ر ي ي د م وكىلى.

سالتانات تومپيەۆا ءوز سوزىندە زاڭدا ۇشۋ قاۋىپسىزدىگى تالاپتارىن قامتاماسىز ەتۋ ماقساتىندا رەيستەردى كەشىكتىرگەن اۆياكومپانيالار كوپ جاعدايدا جولاۋشىلارعا مىندەتتى قىزمەتتەردى ءتيىستى دەڭگەيدە ورىندامايتىنىن العا تارتتى. سايكەسىنشە ولارعا زاڭناماعا سايكەس شارا قولدانىلاتىن بولادى.

«ارينە، ۇشۋدىڭ كەشىگۋى نەمەسە اۋىستىرىلۋى كوپتەگەن قولايسىزدىقتار تۋدىرادى. الايدا تەحنيكالىق اقاۋلىقتار كەز كەلگەن كەزدە بولۋى مۇمكىن. تاسىمالداۋشىلار جولاۋشىلاردى رەيستىڭ ۇشۋىن ەكى ساعاتتان ارتىق كۇتۋ كەزىندە الكوگولسىز سۋسىندارمەن قامتاماسىز ەتۋگە مىندەتتى. ال رەيستىڭ ۇشۋىن ءتورت ساعاتتان ارتىق كۇتكەن كەزدە ىستىق تاماق بەرىلۋى ءتيىس»، - دەدى سالتانات تومپيەۆا.

رەيستى كۇندىز التى ساعات، تۇندە سەگىز ساعات كۇتكەن كەزدە جولۋشىلارعا تاسىمالداۋشى ۇسىنعان قوناقۇيدە تۇرۋعا جانە تاسىمالداۋشى ۇسىنعان كولىكپەن اۋەجايدان قوناقۇيگە جانە كەرى قايتۋ قىزمەتتەرى كورسەتىلۋى قاجەت. تاسىمالداۋشىنىڭ كىناسىنەن رەيس كەيىنگە قالدىرىلعان نەمەسە 10 ساعاتتان استام مەرزىمگە كىدىرتىلگەن جاعدايدا، جولاۋشىنىڭ قالاۋى بويىنشا اۋەكومپانيا جوعارىدا اتالعان قىزمەتتەردىڭ بارلىعىن كورسەتە وتىرىپ، جولاۋشىنى بيلەتتە كورسەتىلگەن مەجەلى پۋنكتكە دەيىن جاقىن ارادا ۇشاتىن رەيسپەن تاسىمالداۋدى قامتاماسىز ەتۋگە مىندەتتى.

«بۇل قىزمەتتەردىڭ بارلىعى جولاۋشىلارعا قولدانىستاعى زاڭناماعا سايكەس تەگىن كورسەتىلەدى. ەگەر دە تاسىمالداۋشى كومپانيا ءوز مىندەتىن ورىنداماعان جاعدايدا جولاۋشىلار ازاماتتىق اۆياتسيا كوميتەتىنە شاعىمدانا الادى. ءبىز كەلىپ تۇسكەن شاعىمداردى زەردەلەپ، ءتيىستى شەشىم قابىلدايتىن بولامىز، - دەپ اتاپ ءوتتى ازاماتتىق اۆياتسيا كوميتەتى ءتوراعاسىنىڭ ورىنباسارى.