ەلىمىزدە باۋىر وبىرىن زاماناۋي ادىسپەن ەمدەيدى
10 تامىز 10:22

ەلىمىزدە باۋىر وبىرىن زاماناۋي ادىسپەن ەمدەيدى

نۇر-سۇلتان.قازاقپارات - ونكولوگتار قاتەرلى ىسىكتى عانا جوياتىن حيميالىق پرەپەرات ەنگىزىپ جاتىر. باعدال سايفوللا ەسىمدى ازامات بۇگىن وپەراتسيا ۇستەلىنە وسىمەن 6 - رەت جاتتى.

وسىدان ءبىر جىل بۇرىن باۋىرىندا ىسىك بارىن بىلگەلى دارىگەردىڭ باقىلاۋىندا. وبىردى بىردەن سىلىپ تاستاۋعا كەلمەيدى. سەبەبى كولەمى ۇلعايىپ كەتكەن. سوندىقتان وپەراتسيانى بىرنەشە مارتە جاساۋعا تۋرا كەلگەن.

باعدال سايفوللا، قالا تۇرعىنى:

- مەن وسى اۋرۋمەن اۋىرعالى ءبىر جىل بولدى. بۇرىن شەتەلدە جاسايدى دەيتىن وپەراتسيانى. قازىر مىنە وسى اۋرۋحانادا جاساپ جاتىر. دەنساۋلىعىم جاقسارىپ قالدى.

مەديتسينادا بۇل باۋىر ارتەرياسىن حيميوەمبوليزاتسيالاۋ دەپ اتالادى. ياعني، وبىردى پىشاقسىز، ەشقانداي تىلىكسىز جويىپ جىبەرۋ ءادىسى. ناۋقاس وپەراتسيا ۇستىندە ەسىن ءبىلىپ، دارىگەرلەرمەن تىلدەسىپ جاتادى. ماماندار مۇنداي ەمدەۋ ءادىسىن كوپشىلىكتىڭ بىلە بەرمەيتىنىن ايتادى. سودان بولار شەت ەل اسىپ ەم ىزدەگەندەر كوپ، دەيدى.

نياز مالايەۆ، ونكولوگ دارىگەر:

- بۇل ونكولوگيالىق اۋرۋلاردى ەمدەۋدىڭ ەرەكشە جانە ەڭ ءتيىمدى ءادىسى. مۇنداي وپەراتسيا قازاقستان ازاماتتارىنا تەگىن جاسالادى. تەك سونى كوپتەگەن ادام بىلە بەرمەيدى. قاتەرلى ىسىكتىڭ باستاپقى ساتىسىن ەمدەۋگە دە شەتەل اسىپ جاتادى. ءوزىمىزدىڭ دارىگەرلەر ابدەن ماماندانىپ العان. بۇگىن مىنە وزبەكستاننان ارىپتەستەرىمىز كەلىپ، ساباق الىپ جاتىر.

ستاتيستيكالىق مالىمەتتەرگە سۇيەنسەك، ونداعى اقپارات جاعا ۇستاتارلىق. قازىر ەلىمىزدە 200 مىڭ ادام اتى جامان اۋرۋمەن كۇرەسىپ ءجۇر. ال، جىل سايىن 35 مىڭ ادام قاتەرلى ىسىكتىڭ شىرماۋىنا ىلىنەدى ەكەن. بيىلعى جارتى جىلدىڭ وزىندە 19 مىڭنان استام ادامنان وبىر دەرتى انىقتالعان. اۆتورلارى: اينۇر قۋات قىزى مۇرات ءارىپحانوۆ

www.24.kz


جاڭالىقتار