شەتەلدەن اسىل تۇقىمدى مال اكەلەتىندەرگە سالىق جەڭىلدىگى بار

نۇر-سۇلتان. قازاقپارات - پەستيتسيد، اسىل تۇقىمدى مال جانە ءتىرى ءىرى قارا مالدى يمپورتتاۋشىلارعا ارنالعان سالىق جەڭىلدىگى قالپىنا كەلدى، دەپ حابارلايدى قازاقپارات.

قازاقستان رەسپۋبليكاسىنىڭ 2022-جىلعى 11- شىلدەدەگى 135№ -VII ق ر زاڭىمەن سالىق كودەكسىنە قوسىلعان قۇن سالىعىن اكىمشىلەندىرۋگە وزگەرىستەر ەنگىزىلگەن. بۇل تۋرالى ق ر ق م مەملەكەتتىك كىرىستەر كوميتەتى ءمالىم ەتتى.

مۇنداي وزگەرىستەر سالىق كودەكسىنىڭ 427 جانە 428-باپتارىنا ەنگىزىلىپ، 2022-جىلدىڭ 1- قاڭتارىنان باستاپ قولدانىسقا ەنەدى.

تۇزەتۋلەرگە سايكەس، پەستيتسيدتەر (ۋلى حيميكاتتار)، اسىل تۇقىمدى مال، قولدان ۇرىقتاندىرۋعا ارنالعان جابدىقتار جانە ءتىرى ءىرى قارا مال يمپورتتاۋ كەزىندە ەسەپكە الۋ ادىسىمەن قوسىلعان قۇن سالىعى تولەنەتىن تاۋارلار تىزىمىنە ەندى.

تۇزەتۋلەر بيزنەس-قاۋىمداستىعىنىڭ ۇسىنىسى نەگىزىندە ەنگىزىلگەن.

وسىعان دەيىن 2021-جىلعى 20- جەلتوقسانداعى قر زاڭىمەن اتالعان تاۋارلار جەڭىلدىكتەر تىزىلىمىنەن الىنىپ تاستالعان بولاتىن.

سونداي-اق، يمپورتتاۋ كەزىندە ەسەپكە الۋ ادىسىمەن قوسىلعان قۇن سالىعى تولەنەتىن تاۋارلار بويىنشا تالاپ قويۋ مەرزىمى 5 جىلعا دەيىن ۇزارتىلدى.

اتالعان وزگەرىس 2022-جىلدىڭ 1- شىلدەسىنەن باستاپ قولدانىسقا ەنەدى.

سونىمەن قاتار، سالىق كودەكسىنىڭ 434-بابىننىڭ 2-تارماعىنا قوسىلعان قۇن سالىعىن قايتارۋدى اكىمشىلەندىرۋ بولىگىندە رەداكتسيالىق تۇزەتۋلەر ەنگىزىلدى.

وعان سايكەس، «ايىرباستاۋدى جۇزەگە اسىرعان كاسىپكەرلىك سۋبەكتىلەرى» دەگەن سوزدەردى «ايىرباستاۋ كەزىندە شيكىزاتتى ەكسپورتتاۋشىلار» دەگەن سوزدەرمەن اۋىستىرىلدى جانە «شيكىزات ەكسپورتىنان» دەگەن سوزدەر الىنىپ تاستالدى.

بۇل نورمالار شيكىزات ەكسپورتىنان تۇسكەن ۆاليۋتالىق تابىستىڭ %50 تەن كەم ەمەس بولىگىن ۇلتتىق ۆاليۋتاعا ايىرباستاعان تۇلعالار ءۇشىن قوسىلعان قۇن سالىعىنىڭ اسىپ كەتكەن سوماسىن وڭايلاتىلعان تارتىپتەن قايتارۋعا مۇمكىندىك بەرەدى.

اتالعان وزگەرىس 2022-جىلدىڭ 1- شىلدەسىنەن باستاپ قولدانىسقا ەندى.