قازاقستاندىق وقۋشىلار بايقوڭىرعا جولداما الدى

بايقوڭىر. قازاقپارات - «بايقوڭىر» عارىش كەشەنىندە جۇمىس ساپارىمەن جۇرگەن ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين عارىش ايلاعىنان كەمەنىڭ ۇشىرىلۋىن باقىلاۋعا كەلگەن قازاقستاندىق وقۋشىلارمەن كەزدەستى، دەپ حابارلايدى قازاقپارات ءتىلشىسى.

عارىش كەمەسىنىڭ ۇشىرىلۋىن كورۋ جانە مينيسترمەن كەزدەسۋ مۇمكىندىگى ون ءبىر قازاقستاندىق وقۋشىعا بۇيىرعان. ولاردىڭ بارلىعى - تەحنيكالىق عىلىمدار بويىنشا رەسپۋبليكالىق وليمپيادالاردىڭ جەڭىمپازدارى.

بەلگىلى بولعانداي، مينيسترلىككە تەحنيكالىق دارىندى بالالاردى اتى اڭىزعا اينالعان «بايقوڭىر» عارىش ايلاعىنا ساياحاتتاۋعا ىنتالاندىرۋ تۋرالى ۇسىنىستى بالالار قۇقىقتارى جونىندەگى ۋاكىل ارۋجان سايىن بىلدىرگەن. بۇل باستاما قولداۋعا يە بولىپ، بالالار عارىش كەمەسىنىڭ ۇشىرىلعانىن كورىپ قانا قويماي، مينيستر باعدات مۋسين، عارىشكەر ايدىن ايىمبەتوۆ، قازاقستان رەسپۋبليكاسى پرەزيدەنتىنىڭ «بايقوڭىر» كەشەنىندەگى ارنايى وكىلى قايرات نۇرتايمەن كەزدەسىپ، اڭگىمەلەستى.

بالالار «بايقوڭىرعا» جاسالعان تانىمدىق باعدارلامانىڭ شارىقتاۋ شەگىنە اينالعان ستارتتان العان تاماشا اسەرلەرىمەن ءبولىستى.

«بۇل ساياحات - ءبىز ءۇشىن شىن مانىندە زور سىيلىق. جاڭا جەڭىستەرگە، بىلىمگە، قازاقستاندىق عارىشتىق تەحنولوگيالاردى، ەڭ الدىمەن «بايقوڭىر» عارىش ايلاعىن دامىتۋعا ىنتالاندىرۋ»، - دەدى الماتى قالاسىنان كەلگەن 11-سىنىپ وقۋشىسى، «جەر جانە عارىش تۋرالى عىلىم» رەسپۋبليكالىق عىلىمي جوبالار بايقاۋىنىڭ جەڭىمپازى كاميليا جۇمابايەۆا.

سپۋتنيكتەر توبى بار «سويۋز 2.1ب» زىمىران- تاسىعىشى بۇگىن، 9- تامىزدا نۇر-سۇلتان ۋاقىتى بويىنشا ساعات 11:52 دە ۇشىرىلدى. بارلىق عارىش اپپاراتتارى ماقساتتى وربيتاعا شىعارىلدى.