وزبەكستاننىڭ ەرلەر قۇراماسى تۇڭعىش رەت شاحمات وليمپياداسىنىڭ جەڭىمپازى اتاندى
9 تامىز 19:58

وزبەكستاننىڭ ەرلەر قۇراماسى تۇڭعىش رەت شاحمات وليمپياداسىنىڭ جەڭىمپازى اتاندى

تاشكەنت. قازاقپارات - وزبەكستاننىڭ ەرلەر قۇراماسى ءۇندىستاننىڭ چەنناي قالاسىندا وتكەن شاحمات وليمپياداسىنىڭ اقتىق كەزەڭىندە نيدەرلاند قۇراماسىن جەڭىپ، تاريحتا تۇڭعىش رەت تۋرنير چەمپيونى اتاندى.

بۇل تۋرالى وزبەكستان شاحمات فەدەراتسياسىنىڭ پرەزيدەنتى الىشەر سادۋللايەۆ Telegram ارقىلى مالىمدەدى، دەپ حابارلايدى قازاقپارات مەنشىكتى ءتىلشىسى.

بۇگىن 44- شاحمات وليمپياداسىنىڭ سوڭعى 11-تۋرىندا وزبەكستان نيدەرلاند قۇراماسىن 2,5:1,5 ەسەبىمەن جەڭدى. گروسسمەيستەرلەر نوديربەك ياكۋببويەۆ، دجاۆوحير سينداروۆ جانە نوديربەك ابدۋساتتوروۆ ءوز قارسىلاستارىمەن تەڭ ويىن جۇرگىزدى. شەشۋشى كەزدەسۋدە جاحونگير ۆاحيدوۆ ماكس ۋوردەردامدى جەڭىپ، ەلدىڭ ۇلتتىق قۇراماسىنا وليمپيادانىڭ تۇڭعىش التىن مەدالىن اپەردى.

«تاعى ءبىر تاماشا جاڭالىق: وزبەكستان قۇراماسى وسى وليمپيادادا بىردە-ءبىر جەڭىلىس كورمەگەن جالعىز كوماندا بولدى. بارشا وتانداستارىمىزدى تاريحي جەڭىسىمەن قۇتتىقتايمىن!» - دەپ جازدى الىشەر سادۋللايەۆ.

44- دۇنيەجۇزىلىك شاحمات وليمپياداسى 29- شىلدە مەن 9- تامىز ارالىعىندا ءۇندىستاننىڭ چەنناي قالاسىندا ءوتتى. جابىلۋ سالتاناتى ەرتەڭ، 10- تامىزدا بولادى.

بۇعان دەيىن دۇنيەجۇزىلىك شاحمات وليمپياداسى 2026-جىلى وزبەكستاندا وتەتىنى حابارلانعان بولاتىن. رەسپۋبليكا بۇل جارىستى العاش رەت وتكىزەدى. وليمپيادا وتكىزىلۋى مۇمكىن قالالار - تاشكەنت نەمەسە سامارقان.

ەسكە سالساق، دۇنيەجۇزىلىك شاحمات وليمپياداسىنىڭ اشىلۋىندا قازاقستان تۋى بولماعان ەدى. وسىعان بايلانىستى ق ر شاحمات فەدەراتسياسىنىڭ باسپا ءسوز قىزمەتى تۇسىنىك بەردى.

جاڭالىقتار