بيزنەس اشۋ ءۇشىن بەرىلەتىن مەملەكەتتىك گرانتتى كىمدەر الا الادى

نۇر-سۇلتان. قازاقپارات - ەلوردا اكىمدىگىندە وتكەن بريفينگ بارىسىندا ماماندار بيزنەس يدەيالاردى ىسكە اسىرۋعا ارنالعان گرانت كىمدەرگە بەرىلەتىنىن ايتتى، دەپ دەپ حابارلايدى قازاقپارات ءتىلشىسى.

«جاڭا بيزنەس يدەيالاردى ىسكە اسىرۋعا گرانت الۋ ءۇشىن قاتىسۋشى business.enbek كاسىپكەرلىك باستامالاردى قولداۋ پورتالى ارقىلى ءوتىنىش بەرە الادى. گرانت ۇسىنىلاتىن ادامنان «باستاۋ بيزنەس» جوباسى بويىنشا وقىعانىن ايعاقتايتىن سەرتيفيكات، ۇمىتكەردىڭ پورتالدا بەلگىلەنگەن تالاپتارعا سايكەستىگىن راستايتىن ناتيجەلەرى جانە كوميسسيانىڭ وڭ شەشىمىنىڭ بولۋى تالاپ ەتىلەدى»، - دەدى نۇر-سۇلتان قالاسى حالىقتى جۇمىسپەن قامتۋ ورتالىعىنىڭ كاسىپكەرلىك باستامالاردى قولداۋ ءبولىمى باسشىسىنىڭ مىندەتىن اتقارۋشى باقىت بەكەنوۆ.

قۇزىرلى ورگان اقپاراتىنا سايكەس، جوباعا مىنا ساناتتاعى ازاماتتار قاتىسا الادى:

• 29 جاسقا دەيىنگى جاستار؛

• الەۋمەتتىك از قامتىلعان وتباسى مۇشەلەرى، ياعني اتاۋلى الەۋمەتتىك كومەك الۋشىلار؛

• كوپبالالى وتباسى جاعدايى بويىنشا جاردەماقى الۋشىلار؛

• قانداستار مەن قونىس اۋدارۋشىلار؛

• مۇگەدەك بالا تاربيەلەپ وتىرعان تۇلعالار؛

• ەڭبەككە قابىلەتتى مۇگەدەكتىگى بار ادامدار؛

• اسىراۋشىسىنان ايىرىلعانىنا بايلانىستى الەۋمەتتىك جاردەماقى الۋشىلار.

ەسكە سالا كەتسەك، بۇعان دەيىن كاسىپ اشۋ ءۇشىن ازاماتتارعا بەرىلەتىن مەملەكەتتىك گرانت سوماسى ۇلعايعانىن حابارلاپ ەدىك.