كوروناۆيرۋسقا قارسى ەگىلگەن ادامدار اۋرۋعا ءتوزىمدى بولادى - دارىگەر

الماتى. قازاقپارات - الماتى قالالىق قوعامدىق دەنساۋلىق ساقتاۋ باسقارماسىنىڭ وكىلى گۇلجاينات تىلەگەن تۇرعىنداردى كوروناۆيرۋستىڭ جاڭا شتامدارىنان قورعانۋ ءۇشىن ۆاكسيناتسيا مەن رەۆاكسيناتسيادان وتۋگە شاقىردى، دەپ حابارلايدى قازاقپارات ءتىلشىسى.

ونىڭ ايتۋىنشا، كوروناۆيرۋسقا قارسى ەكپە العان ادامدار اۋرۋعا اناعۇرلىم ءتوزىمدى بولادى.

«ۆاكسينا العان ادام ءوزىن قاۋىپ- قاتەردەن قورعايدى جانە اۋرۋدى جەڭىل تۇردە قابىلدايدى. زەرتتەۋلەر كوروناۆيرۋس ينفەكتسياسىنان قورعانىس ۆاكسينالاردىڭ العاشقى دوزالارىن العاننان كەيىن، اسىرەسە ءارتۇرلى شتامداردىڭ باسىم بولۋىنا بايلانىستى ۋاقىت وتە كەلە تومەندەي باستايتىنىن دالەلدەگەن. ءبىز بىرنەشە كورونوۆيرۋس تولقىنىن، جاڭا شتامداردى باستان وتكەردىك. كورىپ وتىرعانىمىزداي، ۆيرۋس ءاربىر تولقىندا السىرەپ، مۋتاتسياعا ۇشىرايدى. ەكپە العان ادامدار اناعۇرلىم اۋرۋعا ءتوزىمدى. يممۋنيتەتتىڭ السىرەۋى ەكپەدەن سوڭ 6-12 ايدان كەيىن باستالادى. ۆاكتسينادان كەيىنگى يممۋندىق رەاكسيانى كۇشەيتۋ ءۇشىن رەۆاكسيناتسيا قاجەت»، - دەپ ءتۇسىندىردى باسقارما وكىلى.

سونىمەن قاتار، ول بۇگىنگى كۇنى قالادا 88 ۆاكسيناتسيا پۋنكتى جۇمىس ىستەيتىن اتاپ ءوتتى. وندا 315 ادامنان تۇراتىن 99 ەگۋ بريگاداسى بار.

«بۇگىنگى تاڭدا پرەپاراتتىڭ ءبىرىنشى كومپونەنتىمەن 1241540، ەكىنشى كومپونەنتىمەن 1207511 قالا تۇرعىنى ەگىلدى. Pfizer (Comirnaty) ۆاكسيناسىمەن 119065 ادام ەگىلدى، ونىڭ ىشىندە 4684 جۇكتى ايەل، 15896 بالا ەمىزەتىن انا جانە 55045 جاس ءوسپىرىم بار»، - دەدى گۇلجاينات تىلەگەن.