كوپبالالى وتباسىنان شىققان وقۋشىلاردى مەكتەپكە دايىنداۋ ءۇشىن قاراجات بولىنەدى
بۇل تۋرالى قازاقپارات ءتىلشىسىنىڭ ساۋالىنا جاۋاپ بەرگەن وقۋ- اعارتۋ مينيسترلىگى بالالاردىڭ قۇقىقتارىن قورعاۋ كوميتەتى ءتوراعاسىنىڭ ورىنباسارى دۋلات جەكەبايەۆ مالىمدەدى.
بالالار جىلىندا وقۋ- اعارتۋ مينيسترلىگى «جالپىعا مىندەتتى ءبىلىم بەرۋ» قورى اياسىندا وقۋشىلارعا كورسەتىلەتىن ماتەريالدىق كومەك ەرەجەلەرىنە وزگەرىستەر ەنگىزدى. وسىنىڭ ناتيجەسىندە الەۋمەتتىك وسال ساناتىنداعى 400 مىڭنان استام بالانى مەكتەپكە دايىنداۋ ءۇشىن مەملەكەت قارجىلاي قولداۋ كورسەتەدى.
«بۇعان دەيىن ارنايى ساناتتاعى بالالاردى مەكتەپكە دايىنداۋ ءۇشىن مەملەكەت ەسەبىنەن بولىنەتىن قاراجات مولشەرى 17-40 مىڭ تەڭگە ارالىعىندا بولاتىن. تاياۋدا بۇل نورماعا مينيسترلىك ۇسىنىسى بويىنشا وزگەرىستەر ەنگىزىلدى. ەندى ەڭ تومەنگى كومەك - 37389 تەڭگە بولادى. سونداي-اق، جەرگىلىكتى اتقارۋشى ورگانداردىڭ ۇسىنىسىمەن كومەك كورسەتۋ تەتىگىنە وزگەرىستەر ەنگىزىلدى. ەندى اقشا اتا-انالاردىڭ شوتىنا تىكەلەي اۋدارىلادى. بۇعان دەيىن قاجەتتى زاتتاردى اكىمدىكتەر ساتىپ الاتىن. سوندىقتان دا تاۋاردىڭ كولەمىنە، ساپاسىنا بايلانىستى ماسەلەلەر تۋىندايتىن»، - دەدى دۋلات جەكەبايەۆ ءتىلشى ساۋالىنا وراي.
مينيسترلىك وكىلىنىڭ مالىمەتىنشە، بيىل اتاۋلى الەۋمەتتىك كومەك الاتىن وتباسىلاردىڭ بالالارىنا، سونداي- اق ا ا ك المايتىن، ءبىراق ورتاشا تابىسى كۇنكورىس دەڭگەيىنەن تومەن وتباسىلاردىڭ بالالارىنا ماتەريالدىق كومەك كورسەتىلەدى.
«وقۋ- اعارتۋ مينيسترلىگىنىڭ وكىلدەرى كوپبالالى انالارمەن بىرنەشە رەت كەزدەسىپ، اكىمدىكتەرمەن بىرلەسە ماسەلەلەردى تالقىلادى. ناتيجەسىندە الەۋمەتتىك وسال توپقا جاتاتىن بالالارعا كومەك كورسەتۋ ەرەجەلەرىن وزگەرتۋ ءۇشىن باستاما كوتەردى. نەگىزگى قولداۋ شارالارىن اكىمدىكتەر جۇزەگە اسىراتىندىقتان، بيىل ولار قارجىلاي كومەك الاتىن بارلىق بالاعا 37389 تەڭگە كولەمىندە قاراجات بولەدى. بۇگىنگى تاڭدا بۇل سومادان دا ارتىق قارجى بولەتىن جەرگىلىكتى اتقارۋشى ورگاندار بار. ءبىز مۇنى تەك قۇپتايمىز. قاراجاتتىڭ ۇلعايۋى - بۇل كومەكتى الاتىن 418 مىڭنان استام بالاعا وڭ اسەر ەتەدى»، - دەدى بالالاردىڭ قۇقىقتارىن قورعاۋ كوميتەتى ءتوراعاسىنىڭ ورىنباسارى.
سونداي-اق، دۋلات جەكەبايەۆ جاڭا وقۋ جىلى قارساڭىندا جەتىمدەر ءۇيىنىڭ تاربيلەنۋشىلەرى مەن اتا-اناسىنىڭ قامقورلىعىنسىز قالعان بالالار جانە توتەنشە جاعدايعا تاپ وقۋشىلارعا دا ماتەريالدىق كومەك كورسەتىلەتىنىن جەتكىزدى.