مينيسترلەر ەلىمىزدىڭ قاي وڭىرلەرىنە از بارعانى بەلگىلى بولدى
بۇل تۋرالى ۇكىمەت وتىرىسىندا ق ر اقپارات جانە قوعامدىق دامۋ ءمينيسترى اسقار وماروۆ ايتتى، دەپ حابارلايدى قازاقپارات ءتىلشىسى.
«2022 -جىلعا بارلىعى 227 كەزدەسۋ وتكىزۋ جوسپارلانعان، ونىڭ 55 ى - ءبىرىنشى، 172 سى ەكىنشى جارتىجىلدىقتا وتەدى. جىل باسىنان ماۋسىم ايىنا دەيىن 45 كەزدەسۋ وتكىزىلگەن. مينيسترلەر نەگىزىنەن اقتوبە، قاراعاندى جانە پاۆلودار وبلىستارىنا بارعان. سونىمەن قاتار الماتى، قوستاناي، ماڭعىستاۋ جانە سولتۇستىك قازاقستان وبلىستارىندا كەزدەسۋلەر از بولعان. كەزدەسۋلەردى وتكىزۋدىڭ مەرزىم ءتارتىبىن ساقتاماۋ فاكتىلەرىنىڭ بولعانىن اتاپ ءوتۋ كەرەك»، - دەدى ا. وماروۆ.
سونىمەن قاتار، مينيستر تاعى ءبىر ماڭىزدى ماسەلە وسى كەزدەسۋلەر تۋرالى اقپارات تاراتۋعا قاتىستى بولىپ تۇرعانىن ايتتى.
«اقپاراتتىق مونيتورينگ كەزدەسۋلەردىڭ رەسپۋبليكالىق جانە وڭىرلىك تەلەارنالار مەن باسپا سوزدە، الەۋمەتتىك جەلىلەردە كەڭ جاريالانعانىن كورسەتتى. مەملەكەتتىك ورگاندار وتكەلى وتىرعان كەزدەسۋلەر تۋرالى انونستاردى رەسمي ينتەرنەت- رەسۋرستار مەن الەۋمەتتىك جەلىلەردەگى اككاۋنتتاردا جاريالادى»، - دەدى ۆەدومستۆو باسشىسى.
ونىڭ ايتۋىنشا، اقپارات مينيسترلىگىندە بارلىق قاجەتتى رەسۋرس بار جانە ءاربىر كەزدەسۋدى جاريالاۋعا دايىن.
«تاعى ءبىر ماڭىزدى ماسەلە - جارلىق تالاپتارىن ساقتاۋ. حالىقتان سۇراقتاردى الدىن الا جيناۋ، ونلاين ترانسلياتسيا، ب ا ق-قا ارنالعان بريفينگ وتكىزۋ، ازاماتتاردى جەكە قابىلداۋ، كوممەرتسيالىق ەمەس ۇيىمدارمەن كەزدەسۋ، پروبلەمالىق ماسەلەلەر بويىنشا ءىس- ارەكەت جوسپارىن دايىنداۋ. تالداۋ كورسەتكەندەي، مەملەكەتتىك ورگاندار جالپى جارلىق تالاپتارىن ورىنداعان. الايدا مەملەكەتتىك ورگاندار كەزدەسۋلەردىڭ الەۋمەتتىك جەلىلەردەگى ونلاين- ترانسلياتسيالارىن جانە جۋرناليستەرگە ارنالعان بريفينگىلەردى ءاردايىم وتكىزبەيدى. كەيبىر كەزدەسۋلەردىڭ قورىتىندىلارى بويىنشا پروبلەمالىق ماسەلەلەر تىزبەسى بار ءىس- ارەكەت جوسپارلارى جاسالماعان نەمەسە اشىق تۇردە ورنالاستىرىلماعان»، - دەدى مينيستر.
بۇدان بۇرىن حابارلانعانداي، ۇكىمەت باسشىسى كەيبىر وڭىرلەردە باسشىلار حالىقپەن كەزدەسۋدىڭ جاڭا فورماتىنا بەيىمدەلمەي، ەسكى سۇرلەۋدەن شىعا الماي وتىرعانىن سىنادى. ۇكىمەت وتىرىسىندا بيىلدان باستاپ ورتالىق جانە جەرگىلىكتى اتقارۋشى ورگان باسشىلارىنىڭ وڭىرلەرگە بارىپ، حالىقپەن جۇزبە-ءجۇز كەزدەسۋ وتكىزۋدىڭ جاڭا ءتارتىبى جۇزەگە اسىرىلىپ جاتقانى ايتىلدى.