ون ءوڭىر جاڭا مەكتەپ سالۋ جوسپارىن تولىق ورىنداماي وتىر
بۇل تۋرالى بۇگىن ۇكىمەت وتىرىسىندا وقۋ- اعارتۋ ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«ءبىلىم ساپاسىن ارتتىرۋدا مەكتەپتەردىڭ زاماناۋي پاندىك كابينەتتەرمەن قامتاماسىز ەتىلۋى ماڭىزدى ءرول اتقارادى. 2021 -جىلى جوسپار بويىنشا 949 مەكتەپكە 1825 ءپان كابينەتى ساتىپ الىنىپ، جوسپار ورىندالدى. بيىلعى جىلى فيزيكا، حيميا، بيولوگيا، STEM پاندىك كابينەتتەرمەن مەكتەپتەردىڭ 70 پايىزى قامتىلاتىن بولادى. الايدا بىزدەگى اقپاراتقا سايكەس ۇلىتاۋ، جامبىل وبلىستارىندا ءتيىستى قاراجاتتى ءبولۋ شەشىمىن تاپپاعان، اكىمدىكتەردەن بۇل ماسەلەنى قولعا الۋدى سۇرايمىن. جىلدىڭ سوڭىنا دەيىن ۋاقىت بار، وسى جۇمىستى باقىلاۋعا الۋعا ءوتىنىش بىلدىرەمىن»، - دەدى مينيستر.
ونىڭ دەرەگىنشە، مەكتەپتەردى جايلى، قاۋىپسىز ءارى زاماناۋي ءبىلىم بەرۋ ورتاسىمەن قامتاماسىز ەتۋ ماقساتىندا 2021 -جىلى جوسپارلانعان 200 مەكتەپتىڭ ورنىنا 277 ءبىلىم ورداسى اشىلدى. بۇعان جەكە سەكتوردىڭ بەلسەندى قاتىسۋى سەبەپ بولدى.
«سونىمەن قاتار، 10 ءوڭىر 42 جاڭا مەكتەپ پەن 21 مىڭ وقۋشى ورنىن ىسكە قوسۋ بويىنشا جوسپاردى تولىق ورىندامادى. ءبىز جەكەمەنشىك مەكتەپتەردىڭ جەلىسىن ارتتىرۋدامىز. ەندى بيىل 214 مىڭ ورىنعا ارنالعان 225 مەكتەپ سالۋ جوسپارلانىپ وتىر. ونىڭ ىشىندە قازىرگى ۋاقىتتا 22 مىڭ ورىنعا 49 مەكتەپ پايدالانۋعا بەرىلدى. ءار ءوڭىر، ءار اۋىل مەن قالا بويىنشا ناقتى كورسەتكىشتەر بەكىتىلگەن. وسى تاۋەكەلدەردى بولدىرماۋ ءۇشىن اكىمدىكتەر مەكتەپتەردى ىسكە قوسۋ مەرزىمدەرىنىڭ بۇزىلۋىنا جول بەرمەۋلەرىن سۇرايمىن»، - دەدى ول.