اكىمدەر حالىقپەن كەزدەسۋدى جاڭا فورماتتا وتكىزۋگە تۇبەگەيلى كوشۋى كەرەك - ۇكىمەت باسشىسى

نۇر-سۇلتان. قازاقپارات - كەيبىر وڭىرلەردە باسشىلاردىڭ حالىقپەن كەزدەسۋدىڭ جاڭا فورماتىنا بەيىمدەلمەي، ەسكى سۇرلەۋدەن شىعا الماي وتىرعاندار دا بار.

بۇل تۋرالى ۇكىمەت وتىرىسىندا پرەمەر- مينيستر ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

«مەملەكەت باسشىسىنىڭ تاپسىرماسى بويىنشا ورتالىق جانە جەرگىلىكتى اتقارۋشى ورگاندار باسشىلارىنىڭ حالىقپەن كەزدەسۋ كەستەسى بەكىتىلدى. جاڭا فورماتقا سايكەس كەزدەسۋلەر «جۇزبە- ءجۇز، اشىق تىلدەسۋ» تۇرىندە وتكىزىلەدى. وعان دەيىن باسپا سوزدە جانە الەۋمەتتىك جەلىلەردە اقپاراتتىق- ءتۇسىندىرۋ جۇمىستارى جۇرگىزىلەدى. وڭىرلەرگە جۇمىس ساپارى كەزىندە مينيسترلەر ازاماتتاردى جەكە قابىلدايدى، قوعامدىق بىرلەستىكتەردىڭ وكىلدەرىمەن كەزدەسەدى. جوسپارلانعان كەزدەسۋلەرگە وراي ازاماتتاردىڭ وتىنىشتەرىنە ارنايى الدىن الا تالداۋ جۇرگىزىلدى. مۇنىڭ بارلىعى پروبلەمالاردى مۇقيات زەردەلەۋگە، ولاردى اكىمدىك دەڭگەيىندە نەمەسە ۆەدومستۆوارالىق ءوزارا ءىس- قيمىل اياسىندا شەشۋ جولدارىن قاراستىرۋعا مۇمكىندىك بەرەدى»، - دەدى ءا. سمايىلوۆ.

وسى ورايدا ۇكىمەت باسشىسى مينيسترلەرگە قالالار مەن اۋىلدى ەلدى مەكەندەردەگى ۇيالى بايلانىس پەن ينتەرنەتتىڭ ساپاسى، ەلەكتر قۋاتىن بەرۋ، گازداندىرۋ، اۋىز سۋمەن قامتاماسىز ەتۋ، الەۋمەتتىك پروبلەمالار بويىنشا ءبىراز سۇراق قويىلعانىن اتاپ ءوتتى.

«جاڭا فورماتقا سايكەس اتالعان پروبلەمالاردىڭ شەشىمى مەملەكەتتىك ورگانداردىڭ رەسمي ينتەرنەت- رەسۋرستارىندا دا ورنالاستىرىلاتىن بولادى. حالىقپەن كەزدەسۋدەن سوڭ، بارلىق دەڭگەيدەگى اكىمدەر پروبلەمالاردى جۇيەلەيدى، ال ولاردى قارجىلاندىرۋ مۇمكىندىكتەرى ءماسليحات سەسسيالارىندا قارالادى. سونىمەن قاتار، كەيبىر وڭىرلەردە كەزدەسۋدىڭ جاڭا فورماتىنا بەيىمدەلمەي، ەسكى سۇرلەۋدەن شىعا الماي وتىرعاندار دا بار. كەزدەسۋلەرگە ەركىن كىرۋ ءپرينتسيپى ساقتالۋى كەرەك»، - دەدى پرەمەر- مينيستر