قىتايدا جاڭا ۆيرۋس شىقتى

نۇر-سۇلتان. قازاقپارات - قىتايلىق جانە سينگاپۋرلىق زەرتتەۋشىلەر گەنيپاۆيرۋستىڭ بۇعان دەيىن بەلگىسىز بولعان ءتۇرىن انىقتادى.

ۆيرۋستى 35 ادام جۇقتىرعان. زەرتتەۋ New England Medicine (NEJM) مەديتسينالىق جۋرنالىندا جاريالاندى، - دەپ حابارلايدى Tengrinews.kz.

بەيجىڭ ميكروبيولوگيالىق ەپيدەميولوگيا ينستيتۋتى مەن سينگاپۋر ۇلتتىق ۋنيۆەرسيتەتىنىڭ عالىمدارى بىرلەسىپ دايىنداعان ماقالادا گەنيپاۆيرۋستىڭ زوونوزدى، جانۋارلاردان شىققان جاڭا ءتۇرى ادامدارعا دا جۇعاتىنى جانە شاندۋن مەن قىتايدىڭ حىنان پروۆينسياسىنان انىقتالعانى جازىلعان. اۆتورلار ۆيرۋسقا لانيا (Langya henipavirus, LayV) گەنيپاۆيرۋسى دەگەن اتاۋ قويعان.

اۋرۋدىڭ نەگىزگى سيمپتومدارى: قىزبا، ميالگيا، جوتەل، شارشاۋ، بۇلشىقەت اۋرۋى جانە جۇرەك اينۋى. زەرتتەۋشىلەر ازىرگە ۆيرۋستى اۋىر وتكىزگەن نە قايتىس بولعان ادامدى تىركەمەدى. لانيا ۆيرۋسى پاراميكسوۆيرۋستار تۇقىمداسىنا جاتادى.

گەنيپاۆيرۋستىڭ ەكى ءتۇرى ادامعا جۇعاتىنى بەلگىلى، ول - نيپاح جانە حەندرا ۆيرۋستارى.

ايتا كەتەيىك، دۇنيەجۇزىندە گەنيپاۆيرۋسقا قارسى ۆاكسينا جوق. ۆيرۋستى ەمدەۋدىڭ جالعىز جولى - اۋرۋدىڭ اسقىنۋىن بولدىرماۋ ءۇشىن جاسالاتىن تەراپيا.