ماۋسىمنان بەرى تەڭگە باعامى سىرتقى نەگىزگى كورسەتكىشتەرگە تاۋەلدى ەمەس - ساراپشى
8 تامىز 19:29

ماۋسىمنان بەرى تەڭگە باعامى سىرتقى نەگىزگى كورسەتكىشتەرگە تاۋەلدى ەمەس - ساراپشى

نۇر-سۇلتان. قازاقپارات - قارجى ساراپشىسى اندرەي چەبوتاريەۆ تەڭگە باعامىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«ماۋسىمنان بەرى تەڭگە باعامىنا سىرتقى نەگىزگى كورسەتكىشتەر اسەر ەتىپ جاتقان جوق. تەڭگە باعامى رەسمي تۇردە 4 نەگىزگى فاكتورعا - مۇناي باعاسىنا، رەسەيلىك رۋبل باعامىنا، ىشكى فاكتورلارعا جانە دوللار يندەكسىنە بايلانىستى قالىپتاسادى»، - دەدى اندرەي چەبوتاريەۆ اگەنتتىك تىلشىسىنە بەرگەن سۇحباتىندا.

ونىڭ اتاپ وتۋىنشە، وسى جىلدىڭ ماۋسىمىندا تەڭگە باعامى اتالعان فاكتورلاردىڭ بارلىعىنان تاۋەلسىز قالىپتاسا باستادى.

«ماۋسىمدا ول بۇكىل فاكتورلاردان اجىرادى. تەڭگە ءتىپتى مۇناي باعاسى قىمبات بولعان كەزدە دە، رۋبل نىعايعاندا دا جانە ۇزاق ۋاقىتتان بەرى العاش رەت اعىمداعى تولەم ەسەپشوتىندا پروفيتسيت بولعاندا دا السىرەدى. ياعني، مۇناي باعاسىنىڭ ارقاسىندا ۇزاق ۋاقىتتان بەرى العاش رەت ساتىپ العاننان گورى ەكسپورتقا تاۋاردى كوپ شىعاردىق، ونىڭ قۇنى - 2,2 ميلليارد ا ق ش دوللارى بولدى. ساۋدا بالانسى ەسەبىنەن پروفيتسيت قالىپتاستى»، - دەپ تۇسىندىرەدى ساراپشى.

اندرەي چەبوتاريەۆتىڭ ايتۋىنشا، قازىرگى ۋاقىتتا مۇناي باعاسىنىڭ قۇلدىراۋىنا قاراماستان تەڭگە قۇنسىزدانعان جوق.

«قازىر مۇناي باعاسى 106 دوللاردان 92-93 دوللارعا دەيىن قۇلدىراعانىنا قاراماستان تەڭگە السىرەگەن جوق. مەنىڭشە، بۇل ادەيى جاسالىپ وتىر. ۇلتتىق بانكتە مۇنداي تاجىريبە بۇعان دەيىن دە بولعان. ءبىز «ءالسىز» تەڭگە ساياساتىن قولدانامىز. بۇل تەڭگە باعامى بولجامدى بولۋى ءۇشىن ادەيى جاسالادى»، - دەدى اندرەي چەبوتاريەۆ.

جاڭالىقتار