قازاقستاندىق ايەل اكۋلادان دا قورىقپاي كاتالينا بۇعازىن ءجۇزىپ ءوتتى

ورال. قازاقپارات - قازاقستاننىڭ تەمىر حانشايىمى اتانعان انەل سىتدىقوۆا ا ق ش- تا كاتالينا بۇعازىن ءجۇزىپ ءوتتى، دەپ حابارلايدى قازاقپارات ءتىلشىسى.

باتىس قازاقستان وبلىسىندا تۋىپ- وسكەن انەل الىبەك قىزى لوس- اندجەلەستە الەمدەگى ەڭ ۇزاق مارافوندىق قاشىقتىقتاردىڭ ءبىرى - كاتالينا بۇعازىن (34 شاقىرىمعا جۋىق) توقتاماستان 18 ساعات 19 مينۋتتا ءجۇزىپ ءوتتى. بۇل مارافوندىق ءجۇزۋ 4- تامىز كۇنى ساعات 23.00-باستالىپ، انەل مارەگە كەلەسى كۇنى جەتتى.

بۇل ارالىقتى امەريكالىق لا- مانش دەپ تە اتايدى. مۇنداعى قيىندىق، لا- مانشتاعىداي، سۋدىڭ سالقىندىعى جانە اعىستىڭ كۇردەلى ەكەندىگى. تولقىنعا قارسى ءجۇزۋ وڭاي ەمەس. سونىمەن قاتار ءجۇزۋ بارىسىندا ادام كيتتەرمەن، دەلفيندەرمەن، ءتىپتى اكۋلامەن كەزدەسىپ قالۋى دا مۇمكىن. وسى قيىندىقتاردىڭ بارىنەن قورىقپاي، كاتالينا بۇعازىن كەسىپ وتكەن ءا. سىتدىقوۆا قازاقستاندىق تۇڭعىش ءجۇزۋشى اتاندى.

انەلدىڭ سوزىنە قاراعاندا، ءجۇزۋ كەزىندە ونىمەن Bottom Scratcher قايىعىندا 13 ادامنان تۇراتىن توپ بىرگە ءجۇردى. ەكى تاۋەلسىز باقىلاۋشى سۋدا ءجۇزۋدىڭ بارلىق مالىمەتتەرىن جازىپ، ەرەجەلەردىڭ ساقتالۋىن قاداعالاپ وتىردى. قايىققا قول تيگىزۋگە بولمايدى جانە سۋ كوستيۋمىن پايدالانۋعا تىيىم سالىنعان. ەكى تورەشى ءۇش ساعات سايىن اۋىسادى. قايىقتاعى ءۇش ەكيپاج مۇشەسى دە ءجۇزۋشىنى باقىلايدى. قالعاندارى - قايىق كاپيتانى مەن ونىڭ كومەكشىلەرى.

بۇعان دەيىن انەل سىتدىقوۆا 2019 -جىلى لا- مانش بۇعازىن (38 شاقىرىم) 15 ساعات 15 مينۋتتا جانە بيىل مانحەتتەندەگى 20 كوپىردى اينالىپ، 48 شاقىرىم قاشىقتىقتى ءجۇزىپ وتكەن ەدى. الەمدەگى ەڭ بەدەلدى وسى ءۇش مارافوندى باعىندىرعان سپورتشىلارعا «ءۇش ءتاجدىڭ حانشايىمى» اتاعى بەرىلىپ، «ۇشتىك ءتاج» كلۋبىنىڭ مۇشەلىگىنە قابىلدانادى. انەل دە كلۋبقا كىردى. وتكەن جىلدىڭ جەلتوقسانىندا بۇل كلۋبقا مۇشە بولعاندار سانى 265 ادام ەدى.

اۆتور عايساعالي سەيتاق