كارى كۇيەۋ وقيعاسى

نۇر- سۇلتان. قازاقپارات - داڭقتى باتىر باۋىرجاننىڭ سوڭىنان ەرگەن اڭىز كوپ. ولاردىڭ ءبىر پاراسىن ەل- جۇرت اۋزىنىڭ سۋى قۇرىپ ايتادى.

باتىردىڭ كوزىن كورگەندەر ونىڭ قانداي ادام بولعانى جايىندا بىرنەشە ەستەلىك جازعان ەدى. سونداي قىزىقتى ەستەلىكتەردىڭ ءبىرى - «كارى كۇيەۋ» وقيعاسى. ول قالاي بولدى؟

1970 -جىلى ابايدىڭ ءجۇز جيىرما بەس جىلدىعى اتالىپ ءوتتى. اۋەلى استانامىز الماتىدا باستالعان مەرەكە سەمەيدەگى، ودان كەيىن شىڭعىستاۋداعى تويمەن ۇلاسقان- دى. اباي ۇرپاقتارىنىڭ قادىرلى قوناقتارىنىڭ ءبىرى - باۋىرجان مومىش ۇلىنا ارنايى اق شاڭقاي ءۇي تىگىلىپ، ەرەكشە قۇرمەت- ءىلتيپات كورسەتىلدى.

سول ءۇيدىڭ قوجاسى - ءبىر سوۆحوزدىڭ ديرەكتورى ەكەن، باۋىرجاننىڭ قولىنا سۋدى ءوزى اكەپ قۇيدى. ورامالدى ءوزى اكەلىپ ۇسىندى. بار مۇشەسى تۇگەل تاباقتى دا ءوزى اكەلىپ قوناعىنىڭ الدىنا تارتقان- دى. الدىندا سەمەي قالاسىندا الدەنەگە رەنجىپ قالعان مومىش ۇلىنىڭ اشۋى ءالى تارقاماعان بولسا كەرەك. ءمىن تاعۋ ءۇشىن قايتسە دە ىلىك ىزدەيدى عوي باياعى. بۋى بۇرقىراپ كەلگەن دامگە كوز جۇگىرتسە، ىشىندە ءتوس جوق. ال باۋىرجاننىڭ جاڭا قوسىلعان جارى - كامەش وسى سەمەي ەلىنىڭ قىزى. ولاي بولسا، باۋىرجان - ءيسى سەمەي ەلىنە كۇيەۋ. ىلىك تابىلدى ەندەشە!

- ءاي، دەرەكتىر، مەنىڭ وسى ەلگە كۇيەۋ ەكەنىمدى بىلەسىڭ بە؟ - دەگەن عوي ادەيى قيسايتا سويلەپ.

- بىلەم، باۋكە، - دەپتى ءوز باسىنا ءۇيىرىلىپ كەلە جاتقان بۇلتقا ونشا كوپ ءمان بەرە قويماعان ديرەكتور.

- بىلسەڭ، ءتوسىم قايدا؟ ءتوستىڭ جوعىنا كوزى جەتسە دە، ديرەكتور ءبىراق ساسپاعان.

- سەن سەكىلدى كارى كۇيەۋگە باس پەن جامباس تا جەتىپ جاتىر! - دەپ باس پەن جامباستى باۋىرجاننىڭ الدىنا قويعان عوي. باۋىرجان قارقىلداپ راحاتتانا كۇلىپتى دە، سوۆحوز ديرەكتورىنا:

- ءوي، سەن ءوزىڭ تاپقىر جىگىت ەكەنسىڭ عوي! - دەپ ءوز قاسىنا وتىرعىزعان.

بۇل جەردە انىقتاي كەتەر ءبىر نارسە بار: ەگەر سوۆحوز ديرەكتورى قىسىلىپ، قىمتىرىلىپ، اس ءپىسىرىپ، داياشىلىق جاساپ جۇرگەندەرگە: ءتوستى نەگە سالماعانسىڭدار، مانا ايتقان جوق پا ەدىم، - دەپ جالتارار بولسا، - سەن ءوزىڭ قايدا ءجۇرسىڭ؟ بار كوزىمە كورىنبە! - دەۋدەن مومىش ۇلى تايىنباقشى ەمەس. باتىردىڭ داڭقىنا تابىنىپ، سىرتتاي جاقسى كورىپ جۇرسە دە، بەتپە- بەت كەزدەسە قالعاندا اۋزىنان ءسوزى، قوينىنان ءبوزى ءتۇسىپ تۇراتىن نەمەسە ونى ورىنسىز ماقتاي جونەلەتىن ازاماتتاردىڭ، كوبىنەسە، باۋىرجان الدىنان رەنجىپ، وپىق جەپ شىعاتىندارىنىڭ سىرى، مىنە، وسى سەكىلدى جايلاردا جاتسا كەرەك- تى.

باۋىرجان ويشىلدىق پەن پىكىرلىلىكتىڭ، اقىلدىلىق پەن تاپقىرلىقتىڭ قۇلى بولىپ وتكەن ادام.

سافۋان شايمەردەنوۆ «اعالاردىڭ الاقانى» كىتابىنان

Massaget.kz