قىتايدا جاڭا تەرميندەردى قازاقشاعا اۋدارۋ ماسەلەسى كوتەرىلدى - شەتەلدەگى قازاق ءتىلدى ب ا ق- قا شولۋ
8 تامىز 09:31

قىتايدا جاڭا تەرميندەردى قازاقشاعا اۋدارۋ ماسەلەسى كوتەرىلدى - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات - «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

رەكتور تۇركيادا ەكى حالىقارالىق ۇيىم باسشىسىمەن كەزدەستى - TRT

قوجا احمەت ياساۋي اتىنداعى حالىقارالىق تۇرىك- قازاق ۋنيۆەرسيتەتىنىڭ رەكتورى جانار تەمىربەكوۆا تۇرىكسويعا بارىپ، باس حاتشى سۇلتان رايەۆپەن كەزدەستى.

باس حاتشى كەڭسەسىندە وتكەن كەزدەسۋدە تاراپتار قىركۇيەك ايىندا تۇركىستان قالاسىندا «التىن كوپىر» جوباسى اياسىندا ۇيىمداستىرىلاتىن قىرعىز- تۇركيا ماناس ۋنيۆەرسيتەتىنىڭ كۇندەرىنە دايىندىق جۇمىستارى مەن قازان ايىندا وتەتىن ياساۋي ۋنيۆەرسيتەتىنىڭ 30 جىلدىق مەرەيتويىنا ارنالعان شارالاردى كەڭىنەن تالقىلادى، دەپ حابارلايدى تۇركيا راديو تەلەديدار اگەنتتىگى.

كەزدەسۋ بارىسىندا جانار تەمىربەكوۆا تۇرىكسوي باس حاتشىسى رايەۆتى ۋنيۆەرسيتەتتىڭ 30 جىلدىق مەرەيتويىنا شاقىردى. سونداي- اق وسى ساپارىندا قوجا احمەت ياساۋي اتىنداعى حالىقارالىق تۇرىك- قازاق ۋنيۆەرسيتەتىنىڭ رەكتورى جانار تەمىربەكوۆا تۇركيا رەسپۋبليكاسىنىڭ شەتەلدەگى تۇرىكتەر جانە اعايىن قاۋىمداستىقتار باسقارماسىنىڭ باسشىسى ابدۋللا ەرەنمەن كەزدەسكەنى تۋرالى تۇركيالىق ب ا ق جازدى.

بۇل كەزدەسۋ بارىسىندا رەكتور جانار تەمىربەكوۆا ابدۋللا ەرەن مىرزاعا احمەت ياساۋي ۋنيۆەرسيتەتىنىڭ «ەۋرازيا» جازعى مەكتەبىن ۇيىمداستىرۋدا كورسەتكەن كومەگى ءۇشىن العىسىن بىلدىرگەن.

ايتا كەتەيىك، بيىلعى جىلى وكىلەتتى كەڭەس باسقارماسى مەن وقۋ ورداسى ۇيىمداستىرعان «ەۋرازيا» جازعى مەكتەبىنىڭ العاشقى 70 ستۋدەنتتەن تۇراتىن توبى تۇركيا ەلىنە اتتانعان بولاتىن. وندا 20 كۇندىك باعدارلاما اياسىندا ءتۇرلى سالا بويىنشا وقۋ سەمينارلارى مەن كەزدەسۋلەر وتەدى دەپ جوسپارلانعان. سونىمەن قاتار ستۋدەنتتەر تۇركيا ەلىنىڭ ىستانبۇل، انكارا، بۋرسا جانە كونيا قالالارىنىڭ باي تاريحي جانە مادەني مۇرالارىمەن تانىسادى.

قازاقستان ءوندىرسىن ارتتىرۋعا نيەتتى - Parstoday

قازاقستاننىڭ ەنەرگەتيكا ءمينيسترى ءوز ەلىنىڭ OPEC+- تە مۇناي ءوندىرىسىن ارتتىرىپ، ونىڭ باعاسىن تۇسىرۋگە نيەتتى ەكەنىن حابارلادى. بۇل تۋرالى وسى اپتادا يراننىڭ «Parstoday» اقپاراتتىق اگەنتتىگى دە حابارلادى.

يراندىق ب ا ق قازاقستاننىڭ ەنەرگەتيكا ءمينيسترى بولات اقشولاقوۆتىڭ مۇناي باعاسى تۋرالى پىكىرىن جازعان. ايتا كەتەيىك، قازاقستاننىڭ ەنەرگەتيكا ءمينيسترى «قازاقستان 1 باررەل مۇنايدىڭ باعاسى 60-80 دوللاردىڭ اراسى بولعانىن قالايدى. جاھاندىق نارىقتا مۇناي باعاسىن ءتۇسىرۋ ءۇشىن ونى ءوندىرۋ كولەمىن ارتتىرۋعا ءماجبۇرمىز»، دەگەن بولاتىن.

«OPEC+- تەگى حاباردار ادامدار وسى توپتىڭ مۇناي وندىرىسىنە قاتىستى ساياساتىنىڭ وزگەرۋ ىقتيمالىن جوققا شىعارمادى»، دەپ تۇيىندەيدى بۇل جازبانى يراننىڭ «Parstoday» اقپاراتتىق اگەنتتىگى.

جاڭا تەرميندەردى قازاقشاعا اۋدارۋعا بايلانىستى جينالىس ءوتتى - CNR

قىتايدىڭ بەيجىڭدەگى ۇلتتار اۋدارما مەكەمەسىنىڭ 2022 -جىلعى جاڭا تەرميندەردى قازاقشاعا اۋدارىپ بەكىتۋگە ارنالعان ماماندار جينالىسى شىڭجاڭنىڭ التاي ايماعى بۋىرشىن اۋدانىندا ءوتتى.

قىتايدىڭ ۇلتتار اۋدارما مەكەمەسىنىڭ باستاماسىمەن بۋىرشىن اۋداندىق حالىق ۇكىمەتى ۇيىمداستىرعان قىتاي ۇلتتار اۋدارما مەكەمەسىنىڭ 2022 -جىلعى جاڭا اتاۋلاردى(تەرميندەردى) قازاقشاعا اۋدارىپ بەكىتۋ ماماندار جينالىسى 4-تامىز كۇنى اشىلدى، دەپ حابارلايدى قىتايدىڭ CNR باسىلىمى.

قىتايلىق ب ا ق- تىڭ كەلتىرگەن دەرەگىنە سۇيەنسەك، اتالعان عىلىمي باسقوسۋعا بەيجىڭدەگى ورتالىق راديو تەليەۆيزيا باس ستانتسياسى، ورتالىق ۇلتتار اۋدارما مەكەمەسى، ورتالىق ۇلتتار باسپاسى قاتارلى مەملەكەتتىڭ ورىنداردان جانە شىڭجاڭداعى باسپا سوزبەن وقۋ- ءبىلىم سالاسىنان كەلگەن 30 دان استام ءتىل جانە اۋدارما ماماندارى قاتىناستى. ولار بۇل جينالىستا جاڭا تەرميندەردى اۋدارۋ ماسەلەلەرىن تالقىلاپ، كەڭ كولەمدە پىكىر الماستىردى. ورتالىق ۇلتتار اۋدارما مەكەمەسى پارتكومنىڭ ءتوراعاسى، مەكەمە باستىعى لان جىچي، التاي ايماقتىق پارتكومنىڭ تۇراقتى مۇشەسى، ۇگىت ءبولىمىنىڭ باستىعى لان شىڭشين، بۋىرشىن اۋدانىنىڭ اكىمى نۇربەك رازبەك ۇلى قاتارلى باسشىلار بۋىرشىندا وتكەن عىلىمي جيىننىڭ اشىلۋ سالتاناتىنا قاتىناستى.

ايتا كەتەيىك، بۇل جينالىستى ورتالىق ۇلتتار اۋدارما مەكەمەسىنىڭ ورىنباسار باستىعى باۋىرجان نۇرمولدا ۇلى باسقاردى. اتالعان جينالىسقا قاتىسقان ورتالىق اۋدارما مەكەمەسى پارتكومنىڭ ءتوراعاسى لان جىچي اتاۋ- تەرميندەردى اۋدارۋدىڭ ماڭىزدىلىعىنا توقتالدى. ونىڭ ايتۋىنشا، ءتىل، جازۋ ىستەرى - قوعامدىق، جالپى بۇقارالىق سيپات الاتىن ماڭىزدى سالانىڭ ءبىرى. اۋدارما قىزمەتىن ويداعىداي ىستەۋ قىتايداعى از ساندى ۇلتتار ءۇشىن وتە ماڭىزدى. ءساتتى اۋدارىلعان اتاۋلار مەن تەرميندەر ارقىلى قاراپايىم حالىق زاڭ- ەرەجەلەردى دۇرىس تۇسىنە الادى. الداعى ۋاقىتتا جاڭا تەرميندەردى دۇرىس اۋدارىپ، ۇلتتىق اۋدارما قىزمەتىنىڭ ماڭىزدىلىعىن ارتتىرۋ كەرەك. سول ارقىلى ءار ۇلت وكىلدەرىنىڭ مەملەكەتتىك، تاريحي، ۇلتتىق كوزقاراسى جانە مادەنيەت، ءدىني ۇستانىمىن دۇرىس ورناتۋىنا جەتەكشىلىك ەتۋگە بولادى.

وسى جولعى تەرميندەردى قازاقشاعا اۋدارۋعا بايلانىستى جينالىس مەملەكەتتىڭ ۇلت قىزمەتى ساياساتىن دۇرىس جۇرگىزۋدەگى ناقتى شارالارىنىڭ ءبىرى. بۇل عىلىمي كونفەرەنسيا جاڭا اتاۋ تەرميندەردى اۋدارۋدى عىلىمي ولشەمگە ءتۇسىرىپ، ەلدەگى قازاق ءتىلى اۋدارما ىستەرىنىڭ دامۋى جونىنەن بەلسەندى رول اتقارادى دەپ قورتىندىلايدى قىتايلىق ب ا ق.

قازاقستاندا حالىق سانى ارتتى - Parstoday

قازاقستان حالقىنىڭ سانى 2022 -جىلدىڭ ءبىرىنشى جارتىسىندا 124000 ادامعا ارتتى. حالىق سانى اعىمداعى جىلدىڭ 1-شىلدەسىنە دەيىن 19 ميلليون 246 مىڭ ادامعا جەتتى. ياعني، جىل باسىنان بەرى 124 مىڭ ادامعا ارتتى. بۇل تۋرالى وسى اپتادا Parstoday اقپارات اگەنتتىگى قازاقستاننىڭ ۇلتتىق ستاتيستيكا اگەنتتىگى سىلتەمە جاساپ حابارلاپتى.

يراندىق ب ا ق- تىڭ كەلتىرگەن دەرەگىنە سۇيەنسەك، قازاقستان حالقىنىڭ سانى اعىمداعى جىلدىڭ ءبىرىنشى جارتىسىندا 0,65 پايىزعا وسكەن. تۇرعىندار سانى بارىنەن بۇرىن ەل استاناسى نۇر- سۇلتاندا ارتقان. نۇر- سۇلتان قالاسىنىڭ تۇرعىندار سانى 2022 -جىلدىڭ 1-شىلدەسىندە 1267005 ادامعا، الماتىدا 2053009 ادامعا، شىمكەنتتە 1127003 ادامعا جەتتى.

بايان- ولگي ايماعىنىڭ فۋتبول كومانداسى موڭعوليا چەمپيونى اتاندى – Kaznews

فۋتبولدان موڭعوليا پرەزيدەنتى باستاماسىمەن ءوتىپ جاتقان 21 ايماق اراسىنداعى ەل چەمپيوناتىنىڭ 1-ليگا ويىندارىنىڭ جارتىلاي فينالىندا بايان- ولگي ايماعىنىڭ كومانداسى سەلەنگە ايماعىنىڭ كومانداسىن 4:1 ەسەبىمەن ۇتىپ، العاش رەت فينالعا جولداما الدى، دەپ حابارلايدى موڭعوليالىق Kaznews اقپارات اگەنتتىگى.

موڭعوليالىق ب ا ق- تىڭ كەلتىرگەن دەرەگىنە سۇيەنسەك، ماتچتىڭ 28 مينۋتىندا د. نۋرشاريفتىڭ پەنالتيدەن سوققان دوبى قارسىلاس كوماندانىڭ قاقپاسىنا توعىتىلدى. سونداي- اق، كوماندا كاپيتانى ب. مۋستافا 54 جانە 72 مينۋتتا، د. نۋرشاريف 69 مينۋتتا گول سوقتى. سەلەنگە ايماعىنىڭ سپورتشىسى ە. داشداۆاا قارىمتا شابۋىلدا ويىننىڭ 64 مينۋتىندا 1 گول سوققان. ال 6-تامىز كۇنى 1-ليگا ويىندارىنىڭ فينالدىق كەزدەسۋى وتەدى دەپ جوسپارلانعان.

فينالدا بايان- ولگيلىك اياقدوپشىلار ءتوۆ ايماعىنىڭ كومانداسىمەن سايىسقا تۇسەتىنى ايتىلعان بولاتىن. بۇگىن موڭعوليالىق قانداسىمىز ومىربەك قاباي facebook-تەگى پاراقشاسىندا بايان- ولگي ايماعى قۇراما كومانداسىنىڭ موڭعوليا چەمپيونى بولعانى تۋرالى حابارلاعان.

«بايان- ولگي ايماعىنىڭ قۇراما كومانداسى فۋتبولدان موڭعوليا چەمپيونى اتاندى. فينالدا 2:1 ەسەبىمەن ءتوۆ ايماعىنىڭ كومانداسىنان باسىم ءتۇستى. 2023 -جىلى جوعارعى ليگادا ونەر كورسەتەتىن بولادى»، دەپ جازدى ءو. قاباي.

اۆتور بەيسەن سۇلتان

جاڭالىقتار