سەمەيدە اباي كۇنىنە وراي قانداي شارالار وتەدى
8-تامىز كۇنى، ياعني دۇيسەنبى ساعات 15:00 دە اباي وبلىستىق نيەۆزوروۆتار وتباسى اتىنداعى بەينەلەۋ ونەرى مۇراجايىندا قوس مۋزەيدىڭ بىرلەسكەن « ۇلىلار ۇندەسكەندە» (ۆەرنيساج) كورمەسى اشىلادى.
9-تامىز كۇنى ساعات 10:00 دە وبلىستىق اباي اتىنداعى امبەباپ كىتاپحاناسىندا «بارلىق دانالىق كىتاپتا» اتتى ادەبي ەكسپوزيتسيالار توپتاماسى وتەدى. وندا «اباي الەمى» بىرەگەي باسىلىمدار كىتاپحاناسى»، «قازاق دالاسىنىڭ ۇلى پەرزەنتى»، « عاسىرلار ۇندەستىگىندەگى رۋحاني مۇرا» توپتامالارى ۇسىنىلماق.
10-تامىز ساعات 11:30 دا «قازاق كونتسەرت» مەملەكەتتىك كونسەرتتىك ۇيىمىنىڭ «ەل بىرلىگى - جاڭا قازاقستان» گاسترولدىك ساپارى سەمەيدە باستالادى.
ابايدىڭ «جيدەباي- ءبورىلى» مەملەكەتتىك تاريحي- مادەني جانە ادەبي- مەموريالدىق قورىق- مۋزەيىندە مۇحتار اۋەزوۆتىڭ 125 جىلدىعىنا ارنالعان «اۋەزوۆ الەمى» اتتى دوڭگەلەك ۇستەل وتىرىسى وتەدى. سونداي- اق «قازاق كونتسەرتتىڭ» شىعارماشىلىق ۇجىمى جەرگىلىكتى زيالى قاۋىم وكىلدەرىمەن كەزدەسەدى. شىعارماشىلىق ۇجىم قۇرامىندا «قازاق كونتسەرتتىڭ» سوليستەرى - قازاقستاننىڭ حالىق ءارتىسى، قازاقستاننىڭ ەڭبەك ەرى روزا رىمبايەۆا، قازاقستاننىڭ ەڭبەك سىڭىرگەن قايراتكەرلەرى ەرلان رىسقالي، راۋشان ورازبايەۆا، ازامات جالتىرگوزوۆ، مەدەت شوتابايەۆ، سالتانات احمەتوۆا، جاننا ورىنباساروۆا، ق ر مادەنيەت سالاسىنىڭ ۇزدىگى پەريزات تۇراروۆا، «دارىن» مەملەكەتتىك جاستار سىيلىعىنىڭ لاۋرەاتتارى اسقار مۇقيات، ارداق ەلەۋسىز، حالىقارالىق جانە رەسپۋبليكالىق بايقاۋلاردىڭ لاۋرەاتتارى دارىن قۇدايبەرگەن، الىبەك الماديەۆ، ايگەرىم التىنبەك، گۇلسىم مىرزابەكوۆا، ديدار ءابدىحالىق بار.
بۇدان بولەك، باسپا ءسوز ءماسليحاتى مەن «ۇلى دالا - ۇلى اباي» گالا- كونسەرتى جوسپارلانعان. 11-تامىزدا ساعات 17:00 دە اباي اتىنداعى قازاق مۋزىكالىق- دراما تەاترىندا «جاس اباي» (اۆتورى ت. يبراگيموۆ) قويىلىمى كورسەتىلەدى.
12-تامىزدا سەمەي وبلىستىق تاريحي- ولكەتانۋ مۋزەيىندە «ابايدىڭ اقىندىق مەكتەبى جانە ساپارعالي الىمبەتوۆ»، «تاڭىربەرگەن امىرەنوۆ - ابايدىڭ اقىندىق ءداستۇرىن جالعاستىرۋشى» دارىستەرى ءوتىپ، «سەمەي دەسە اباي دەپ قارايدى ادام.. .» اتتى كورمە اشىلادى.
13-تامىزدا دوستويەۆسكي اتىنداعى دراما تەاترىندا «قارا سوزدەر» پوەتيكالىق قويىلىمى كورسەتىلەدى.
14-تامىزدا نيەۆزوروۆتار وتباسى اتىنداعى بەينەلەۋ ونەرى مۇراجايىندا « ۇلىلار ۇندەسكەندە» كورمەسىنە ەكسكۋرسيا وتكىزىلەدى: ساعات 12:00 دە - قازاق تىلىندە، 14:00 دە - ورىس تىلىندە. 15-تامىزدا «داريعا- اي» جاستار تەاترى مۇحتار اۋەزوۆتىڭ «عاجايىپ تراگەدياسى» سپەكتاكلىن ساحنالايدى.
16-تامىزدا ف. م. دوستويەۆسكي اتىنداعى ادەبي- مەموريالدىق مۇراجايدا اباي ءومىرى مەن شىعارماشىلىعىنا ارنالعان ءدارىس وتەدى. سەمەيدەگى اباي كۇنىنە ارنالعان ءىس- شارالار لەگى 17 -تامىزدا امىرە قاشاۋبايەۆ اتىنداعى مەملەكەتتىك فيلارمونيانىڭ «قالىڭ ەلىم قازاعىم قايران جۇرتىم» اتتى كونسەرتىمەن اياقتالادى.