ەلوردادا تاعى ءبىر ساياباق پايدا بولادى
بۇگىن ونىڭ تۇجىرىمداماسىن ازىرلەۋ بويىنشا كونكۋرس جاريالاندى.
بۇل تۋرالى فورۋمنىڭ رەسمي وكىلى نازىم جانعازينوۆا ءوزىنىڭ Facebook پاراقشاسىندا جازدى، دەپ حابارلايدى قازاقپارات ءتىلشىسى.
«سەزدى وتكىزۋ اياسىندا قازاقستانداعى ءتۇرلى كونفەسسيالار مەن ەتنوستار اراسىنداعى بىرلىكتىڭ، ىنتىماقتاستىق پەن دوستىقتىڭ سيمۆولى بولاتىن تابيعي-رەكرەاتسيالىق پارك سالىنادى. ساياباق ەل استاناسىن اباتتاندىرۋ مەن كوگالداندىرۋ ىسىنە دە ىقپال ەتەدى»، - دەپ جازدى نازىم جانعازينوۆا.
وسىعان بايلانىستى سەزد حاتشىلىعى مەن ەلوردا اكىمدىگى ەلىمىزدىڭ ساۋلەتشىلەرىن، لاندشافت ديزاينەرلەرى مەن ۋربانيست ماماندارىن ەسىل بويىنان ورىن تەبەتىن ساياباق تۇجىرىمداماسىن ازىرلەۋ كونكۋرسىنا قاتىسۋعا شاقىرادى.
ەسكيزدىك ۇسىنىستار 20- تامىزعا دەيىن قابىلدانادى.
ايتا كەتسەك، ەلوردادا 14-15- قىركۇيەك كۇندەرى الەمدىك جانە ءداستۇرلى دىندەر كوشباسشىلارىنىڭ VII سەزى وتەدى.
مەملەكەت باسشىسى قاسىم-جومارت توقايەۆتىڭ قابىلداۋىندا بولعان پارلامەنت سەناتىنىڭ ءتوراعاسى ماۋلەن اشىمبايەۆ اتالعان شاراعا دايىندىق بارىسى جونىندە اقپارات بەردى. سونداي-اق، پرەزيدەنت قاسىم-جومارت توقايەۆتىڭ شاقىرۋىمەن الەمدىك جانە ءداستۇرلى دىندەر كوشباسشىلارىنىڭ VII سەزىنە قاتىسۋ ءۇشىن ريم پاپاسى فرانتسيسك قازاقستانعا مەملەكەتتىك ساپارمەن كەلەدى.
ق ر سىرتقى ىستەر مينيسترلىگى ريم پاپاسى فرانتسيسكتىڭ 13-15- قىركۇيەككە جوسپارلانعان قازاقستانعا مەملەكەتتىك ساپارىنىڭ باعدارلاماسىن جاريالاعان بولاتىن.