تابيعات اياسىندا كاۋاپتان باسقا نە دايىنداۋعا بولادى؟

نۇر-سۇلتان. قازاقپارات - تابيعات اياسىنا شىقساق بولدى، كاۋاپ دايىنداۋ ادەتىمىزگە اينالعان. باسقا تاماق جاساۋعا بولاتىنىن ۇمىتىپ كەتەمىز.

ەندەشە كاۋاپتان باسقا نە پىسىرۋگە بولادى، سونى قاراستىرىپ كورەيىك.

وڭاي دايىندالاتىن تاعامنىڭ ءبىرى. قويدىڭ ەتى مەن كوكونىستەر بولسا جەتكىلىكتى. كاۋاپ سياقتى مارينات جاساپ، ونى كۇتىپ، كەيىن وتقا قاقتاپ قاراپ وتىرۋدىڭ دىم دا قاجەتى جوق.

قازانعا سۋ قۇيىپ، ىشىنە قويدىڭ ەتىن جىلىكتەپ ءبولىپ سالىپ، پياز، كارتوپتى مولىنان سالىپ وتقا قويساڭىز بولعانى. 1-2 ساعاتتا پىسەدى. جاس مالدىڭ ەتىن سالساڭىز، 1 ساعاتتا-اق پىسەدى.

تۇتىنگە، كۇيە باسقان قازاندا پىسكەن سورپا سونداي ءدامدى بولادى. تابيعات اياسىندا ىشكەن استىڭ ءسىڭىمى دە جۇعىمدى بولادى.

سىرنە

قازاقتىڭ تاعى ءبىر جاقسى كورەتىن، تابيعات اياسىندا جەۋدى قالايتىن تاعامى.

بۇل استى ازىرلەۋگە كوپ ۋاقىت كەتپەيدى. سىرنەنى ءار وڭىردە ءارتۇرلى دايىندايدى. بۇل جەڭسىك اس كوبىنە قوزىنىڭ قوم جيناعان شاعىندا دايىندالادى. سوندىقتان جەر كوگەرىپ، كوكتەمنىڭ قۇلپىرعان شاعىندا سىرنە جاساۋ ادەتكە اينالعان. جاس ءتولدىڭ ەتى وتە جۇمساق ءارى ءسىڭىرسىز سىرەسىپ پىسەتىندىكتەن دە سىرنە اتالادى.

سىرنەنى دايىنداۋ ءۇشىن: ءتولدىڭ ەتى، سۇيىق ماي، دامدەۋىشتەر، پياز، اسكوك (ۋكروپ، پەترۋشكا ت. ب)، پياز، تۇز، بۇرىش، قويۋ قايماق نەمەسە بيە ءسۇتى كەرەك، ەگەر جوق بولسا ورنىنا كارتوپ، ءسابىز قوسادى.

قازانعا 1 ليتردەي سۇيىق ماي قۇيىپ، ابدەن قىزعان كەزدە تۋرالعان ەتتى سۇيەگىمەن سالاسىز. جاقسىلاپ قۋىرىلعان ەتتىڭ ۇستىنە دامدەۋىشتەر ياعني پياز، اسكوك، كوك پيازدى دا سالىپ، قاجەتىنشە بۇرىشتاپ، تۇزدايسىز.

كارتوپ ءپىسىرۋ

كارتوپتى فولگاعا وراپ سىر مەن پياز قوسىپ پىسىرۋگە بولادى كۇلگە. ول ءۇشىن مىقتىراق تاعامعا ارنالعان فولگا كەرەك. ءاربىر ادامعا 50*50 كولەمدى فولگا الىڭىز.

كارتوپتى جۋىپ تازالاپ، جۇقالاپ كەسەمىز. پيازدى دا دوڭگەلەك ءتارىزدى ەتىپ كەسە سالىڭىز. سىردى ۇككىشتەن وتكىزىپ، اسكوكپەن ارالاستىرىپ سەبىڭىز. ۇستىنە تۇز بەن بۇرىش سەبەمىز، سوۋس قۇيامىز. مۇنىڭ ءبارىن ۇيدەن دايىنداپ اكەلسەڭىز، ءتىپتى جاقسى.

فولگانى جاقسىلاپ وراپ، كۇلدىڭ ىشىنە تىعىپ جىبەرسەڭىز، 40 مينۋتتا اس دايىن بولادى.

massaget.kz