الماتىدا جاڭا دەمالىس ورىندارى اشىلادى

الماتى. قازاقپارات - «ماياك» شاعىن اۋدانى، «جەلتوقسان» ساياباعى جانە ەسەنتاي وزەنىنىڭ جاعالاۋىندا جاڭا دەمالىس ورىندارى اشىلادى، دەپ حابارلايدى قازاقپارات ءتىلشىسى.

الماتى قالاسى ەكولوگيا جانە قورشاعان ورتا باسقارماسى باسشىسىنىڭ ورىنباسارى ۇلان ابدۋلدايەۆتىڭ ايتۋىنشا، قالا شەكاراسىنىڭ كەڭەيۋى، كولىك ينفراقۇرىلىمىنىڭ دامۋى، تۇرعىن ءۇي قۇرىلىسى، سونداي-اق حالىق سانىنىڭ وسۋىنە بايلانىستى جاڭا قوعامدىق ايماقتاردى ۇيىمداستىرۋعا قاجەتتىلىك تۋىنداپ وتىر.

«ءبىرىنشى كەزەكتە قالانىڭ تومەنگى بولىگىندە جاڭا قوعامدىق جاسىل ايماقتار قۇرىلادى. بۇل رەتتە جاڭا ساياباقتار مەن الاڭداردى جابدىقتاۋ بويىنشا 10 جوبا ازىرلەنىپ جاتىر. جوبالىق-سمەتالىق قۇجات ازىرلەۋگە قاراجات بولۋگە ءوتىنىم بەرىلدى»، - دەدى ول.

سونداي-اق، جالپى اۋدانى 206,6 گەكتار بولاتىن جاڭا دەمالىس ايماقتارىن قۇرۋ ءۇشىن جوبالىق- سمەتالىق قۇجاتتار ازىرلەنىپ جاتىر. الداعى ۋاقىتتا سايران كولىنىڭ جاعاسىندا جاڭا قوعامدىق ايماق قۇرىلماق جانە باۋم توعايى اباتتاندىرىلادى.

«بيىلعى جىلدىڭ سوڭىنا دەيىن الماتىدا 4 جاڭا ساياباق الاڭى قۇرىلىپ، 4 ساياباق قايتا قالپىنا كەلتىرىلەدى»، - دەدى ۇلان ابدۋلدايەۆ.

ايتا كەتەيىك، قازىرگى تاڭدا الماتىدا بارلىعى 211 قوعامدىق نىسان (ساياباقتار، جاعالاۋلار جانە ت. ب.)، سونداي-اق 4 تابيعي ايماق («مەدەۋ» مۇزايدىنى، «باۋم» توعايى، «ىلە الاتاۋ» ۇلتتىق تابيعي پاركى - 12219 گەكتار، بوتانيكالىق باق) بار.