پرەمەر-مينيستر اۋىل شارۋاشىلىعى مينيسترلىگىن سىنعا الدى

نۇر-سۇلتان. قازاقپارات - اۋىل شارۋاشىلىعى مينيسترلىگى اتقارىلىپ جاتقان جۇمىستى دۇرىس تۇسىندىرمەيدى.

بۇل تۋرالى ق ر پرەمەر- ءمينيسترى ءاليحان سمايىلوۆ ايتتى، دەپ حابارلايدى قازاقپارات.

Primeminister.kz سايتىندا ءمالىم ەتىلگەندەي، بۇگىن ۇكىمەت باسشىسى بەينەكونفەرەنتسيا رەجيمىندە جەكە بيزنەس وكىلدەرىنىڭ، «اتامەكەن» ۇ ك پ جانە ورتالىق مەملەكەتتىك ورگاندار باسشىلارىنىڭ قاتىسۋىمەن وتاندىق كاسىپكەرلەر كەڭەسىنىڭ كەزەكتى وتىرىسىن وتكىزدى.

وتىرىسقا قاتىسۋشىلار ۇكىمەتتىڭ ورتا مەرزىمدى كەزەڭگە ارنالعان جاڭا ەكونوميكالىق ساياساتىنىڭ جوباسىن قارادى. ول ەداۋىر ەكونوميكالىق ەركىندىكتى قامتاماسىز ەتۋدى، ەكونوميكانى ءارتاراپتاندىرۋدى، ەكسپورتتىق الەۋەتتى جانە ەڭبەك ونىمدىلىگىن ارتتىرۋدى، ماكروەكونوميكالىق تۇراقتىلىقتى قامتاماسىز ەتۋدى، دەنساۋلىق ساقتاۋ، ءبىلىم بەرۋ جانە الەۋمەتتىك قورعاۋدى دامىتۋدى كوزدەيدى.

«ءبىز ءۇشىن ەكونوميكالىق ءوسىمنىڭ ارقاسىندا ازاماتتاردىڭ ءال-اۋقاتىنىڭ ارتۋى، تابىسىنىڭ ءوسۋى ماڭىزدى. بۇل ورايدا ەكونوميكالىق ءوسۋ تۇراقتى بولۋى كەرەك. وسىعان بايلانىستى، ءبىرىنشى كەزەكتە كاسىپكەرلىكتى دامىتۋعا باسا نازار اۋدارعىمىز كەلەدى. سونىمەن قاتار بارلىق باسقا سالالار دا قۇرىلىمدالىپ، وسى قۇجاتتا كورسەتىلگەن. ەگەر بيزنەس وكىلدەرىنىڭ ناقتى ۇسىنىستارى بولسا، ولاردى ەسكەرۋگە دايىنبىز»، - دەدى پرەمەر- مينيستر.

سونداي-اق ول بيزنەس- قاۋىمداستىق پەن ازاماتتىق قوعامدى تالقىلاۋعا بەلسەندى تۇردە قاتىسۋعا شاقىردى. سونىمەن قاتار وتىرىستا اگروونەركاسىپ كەشەنىن، تاۋ- كەن مەتاللۋرگياسىن، كولىك سالاسىن، ەنەرگەتيكانى جانە سالىقتىق اكىمشىلەندىرۋدى دامىتۋ ماسەلەلەرى قارالدى.

اتاپ ايتقاندا، بيزنەستىڭ پروبلەمالىق ماسەلەلەرىن «ەPG Education» ج ش س ديرەكتورى دوسىم بەسباي، «ولجا اگرو» ج ش س ديرەكتورى ايداربەك قوجانازاروۆ، «اتامەكەن» ۇ ك پ ءتورالقاسىنىڭ گەولوگيا سالاسى، تاۋ- كەن، كومىر ءوندىرۋ جانە مەتاللۋرگيا ونەركاسىبى كوميتەتىنىڭ ءتوراعاسى نيكولاي رادوستوۆەتس جانە «ۆيزور قازاقستان» ينۆەستيتسيالىق كومپانياسىنىڭ سەرىكتەسى الماس چۋكين كوتەردى. اۋىل شارۋاشىلىعىن رەتتەۋ ماسەلەلەرىن تالقىلاۋ اياسىندا پرەمەر- مينيستر سالالىق مينيسترلىك تاراپىنان جىبەرىلگەن كەمشىلىكتەرگە نازار اۋداردى.

«اۋىل شارۋاشىلىعى مينيسترلىگى اتقارىلىپ جاتقان جۇمىستى دۇرىس تۇسىندىرمەيدى. سوندىقتان كاسىپكەرلەردە نە بولىپ جاتقانى تۋرالى قاتە تۇسىنىك قالىپتاسادى. بيدايدى شىعارۋعا ەشقانداي تىيىم سالىنعان جوق! ءبىز كۆوتا تۇرىندە شەكتەۋلەر ەنگىزدىك، ءبىراق ونى ادەتتەگى ەكسپورت كولەمىنەن جوعارى قويدىق»، - دەدى ءاليحان سمايىلوۆ.

ۇكىمەت باسشىسىنىڭ ايتۋىنشا، ەگەر قازاقستان ايىنا شامامەن 350 مىڭ توننا استىق ەكسپورتتاپ وتىرعان بولسا، كۆوتا بيىلعى قىركۇيەك ايىنىڭ سوڭىنا دەيىن قولدانىستاعى ەكسپورتتىق كەلىسىمشارتتاردى شەكتەمەي، ازىقتىق استىقتى باقىلاۋسىز جاپپاي شىعارۋدىڭ الدىن الۋدى قامتاماسىز ەتۋ ءۇشىن ايىنا 500 مىڭ توننادان جوعارى دەڭگەيدە بەلگىلەندى. سونداي-اق ءاليحان سمايىلوۆ اوك سۋبسيديالاۋ جۇيەسىن رەفورمالاۋ تاقىرىبىن قوزعادى.

«ءبىز بارلىق بيۋدجەت شىعىستارىن ولاردىڭ تيىمدىلىگىن ارتتىرۋ بولىگىندە، ونىڭ ىشىندە اۋىل شارۋاشىلىعى سالاسى بويىنشا قايتا قاراپ جاتىرمىز. قارجىنى اۋىل شارۋاشىلىعى تاۋار وندىرۋشىلەرىن ىنتالاندىرۋعا باعىتتاعىمىز كەلەدى. بۇل ينۆەستيتسيالىق سۋبسيديالار، نەسيەلەر بويىنشا پايىزدىق مولشەرلەمەنى ارزانداتۋ، ولاردى ودان دا قولجەتىمدى ەتكىمىز كەلەدى. اۋىل شارۋاشىلىعىن قارجىلاندىرۋدى قىسقارتقىمىز جوق. كەرىسىنشە، ونى ۇلعايتقىمىز كەلەدى. الايدا ودان ەكونوميكا ءۇشىن، جالپى ەل ءۇشىن پايدا بولۋى كەرەك، ءاربىر بيۋدجەتتىك تەڭگەنىڭ قايتارىمىن ارتتىرعىمىز كەلەدى»، - دەدى پرەمەر- مينيستر.

وتىرىستى قورىتىندىلاي كەلە، ءاليحان سمايىلوۆ بارلىق قاتىسۋشىلارعا ايتىلعان ەسكەرتۋلەر مەن ۇسىنىستار ءۇشىن العىس ايتتى.

«ءبىز بىرلەسىپ العا جىلجۋىمىز كەرەك. قانداي دا ءبىر سىندارلى ۇسىنىستار بولسا، ولارعا ءارقاشان قۇلاق اسىپ، ءوز جۇمىسىمىزدا ەسكەرەتىن بولامىز. بارلىق جوسپارلانعان وزگەرىستەردى جۇزەگە اسىرۋدا بيزنەسكە جەتەكشى ءرول بەرىلەتىنىن تاعى دا راستاعىم كەلەدى. ۇكىمەت كاسىپكەرلىك قوعامداستىعىمەن بىرلەسىپ، بيزنەستى جۇرگىزۋ جاعدايىن جاقسارتۋدى جانە ەلىمىزدىڭ ەكونوميكاسىنىڭ ءوسۋى مەن دامۋى، ازاماتتاردىڭ ءال- اۋقاتىن ارتتىرۋ ءۇشىن العىشارتتار جاساۋدى جالعاستىرادى»، - دەپ تۇيىندەدى پرەمەر- مينيستر.

ەسكە سالايىق، پرەزيدەنت قاسىم-جومارت توقايەۆ اۋىل شارۋاشىلىعى ءمينيسترى ەربول قاراشوكەيەۆكە سوگىس جاريالاعان بولاتىن.