قازاقستاندا نەكەنى تىركەۋ مەرزىمى قىسقارتىلادى
مۇنداي جاڭاشىلدىق ق ر ادىلەت مينيسترلىگىنىڭ جاڭا بۇيرىعىندا كوزدەلگەن، دەپ حابارلايدى قازاقپارات ءتىلشىسى.
مينيسترلىكتىڭ وسى جىلدىڭ 28-شىلدەسىندە قول قويىلعان بۇيرىعىنا سايكەس، نەكەگە وتىرۋعا (ەرلى- زايىپتى بولۋعا) تىلەك بىلدىرگەن ادامداردىڭ كەلىسىمى بويىنشا تىركەۋشى ورگان نەكەنى تىركەۋ كۇنىن تاعايىندايدى.
بۇل تۋرالى وتىنىشتە، سونداي-اق وتىنىشتەردى ەسەپكە الۋ جۋرنالىندا بەلگى قويىلادى. نەكە بىرلەسكەن ءوتىنىش بەرىلگەننەن كەيىن كەلەسى جۇمىس كۇنىنەن باستاپ ەسەپتەلەتىن كۇنتىزبەلىك ون بەسىنشى كۇنى تىركەلەدى. ەگەر مەرزىمنىڭ اياقتالۋى جۇمىس كۇنىنە تۋرا كەلمەسە، وندا ودان كەيىنگى جۇمىس كۇنى مەرزىمنىڭ اياقتالعان كۇنى بولىپ ەسەپتەلەدى. دەگەنمەن، تىركەۋشى ورگان باستىعىنىڭ شەشىمىمەن نەكە كەلەسى جاعدايلاردا 15 كۇنگە دەيىن قيىلۋى مۇمكىن: جۇكتىلىك، بالانىڭ تۋۋى، تاراپتاردىڭ ءبىرىنىڭ ومىرىنە تىكەلەي قاتەر ءتونۋى جانە باسقا دا ەرەكشە ءمان- جايلار. بارلىعى قۇجات جۇزىندە راستالۋى ءتيىس. تىركەۋشى ورگان باستىعى نەكەگە تۇرۋ مەرزىمىن ۇزارتا دا الادى. ءبىراق ول كۇنتىزبەلىك ون بەس كۇننەن اسپاۋعا ءتيىس.
«جەكەلەگەن جاعدايلاردا نەكە قيۋدى مەملەكەتتىك تىركەۋدى كۇتۋ مەرزىمى نەكە قيۋدى مەملەكەتتىك تىركەۋگە كەدەرگى كەلتىرەتىن ءمان- جايلار بولعان كەزدە عانا تىركەۋشى ورگاننىڭ باستاماسى بويىنشا ۇزارتىلۋى مۇمكىن. كۇنتىزبەلىك ون بەس كۇندى قىسقارتۋ تۋرالى نەمەسە ۇلعايتۋ تۋرالى رۇقساتتى تىركەۋشى ورگاننىڭ باستىعى، ال ول بولماعان كەزدە ونىڭ مىندەتىن اتقارۋشى ادام نەكە قيۋ تۋرالى وتىنىشكە قارار تۇرىندە بەرەدى»، - دەلىنگەن قۇجاتتا.
بۇيرىق العاشقى رەسمي جاريالانعان كۇنىنەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى.