اندوررا سىرتقى ىستەر ءمينيسترى قازاقستاندا تاۋ شاڭعىسى تۋريزمىن دامىتۋعا مۇددەلىلىك تانىتتى
تاراپتار ساۋدا-ەكونوميكالىق جانە ينۆەستيتسيالىق ىنتىماقتاستىق، تۋريزم سالاسىنداعى ءوزارا ءىس-قيمىل، سونداي-اق حالىقارالىق ۇيىمدار شەڭبەرىندە ەكىجاقتى ديالوگتى نىعايتۋ ماسەلەلەرىن تالقىلادى.
ءاليحان سمايىلوۆ قازاقستان مەن اندوررا اراسىنداعى ساۋدا-ينۆەستيتسيالىق ىنتىماقتاستىقتى دامىتۋ الەۋەتى تولىق اشىلماعانىن اتاپ ءوتتى.
پرەمەر-ءمينيستردىڭ پىكىرىنشە، بۇل رەتتە تۋريزم سالاسىنداعى ەكىجاقتى بايلانىستاردى كەڭەيتۋ ەرەكشە قىزىعۋشىلىق تۋدىرادى.
«قازاقستان تۋريزمنىڭ بارلىق ءتۇرىن دامىتۋ ءۇشىن ايتارلىقتاي الەۋەتكە يە. وسى باعىتتاعى تاجىريبەلەرىڭىزدى ەسكەرە وتىرىپ، ءوزارا ءتيىمدى بىرلەسكەن جوبالاردى ىسكە اسىرۋعا شاقىرامىز»، - دەدى ءاليحان سمايىلوۆ.
ۇكىمەت باسشىسى بۇگىن قول قويىلعان ازاماتتاردىڭ ساپارلارى كەزىندە ۆيزالىق تالاپتاردان ءوزارا بوساتۋ تۋرالى كەلىسىمنىڭ ماڭىزدىلىعىن اتاپ ءوتتى.
«بۇل قۇجات ەكىجاقتى بايلانىستاردى ودان ءارى دامىتۋعا جانە تۋريستىك اعىندى ارتتىرۋعا قوسىمشا سەرپىن بەرەتىنىنە سەنىمدىمىن»، - دەدى پرەمەر-مينيستر.
ءوز كەزەگىندە ماريا ۋباح اندوررا دا ءوزارا كووپەراتسيانى نىعايتۋ ءۇشىن جاڭا مۇمكىندىكتەر ىزدەۋگە مۇددەلى ەكەنىن اتاپ ءوتتى.
«ءبىزدىڭ ويىمىزشا، تاۋ شاڭعىسى تۋريزمىن دامىتۋ - پەرسپەكتيۆالى باعىت. نۇر-سۇلتانعا دەيىن مەن الماتىدا، ونىڭ ىشىندە تۋريستەر اراسىندا كەڭىنەن تانىمال «شىمبۇلاق» كۋرورتىندا بولدىم. وسى سالادا جاڭا بايلانىستار ورناتا الامىز دەپ ويلايمىن»، - دەدى ماريا ۋباح.
كەزدەسۋ سوڭىندا ءاليحان سمايىلوۆ ماريا ۋباحتىڭ ساپارى اندوررانىڭ قازاقستانمەن ىنتىماقتاستىقتى دامىتۋعا جانە ەكونوميكالىق بايلانىستاردى نىعايتۋعا مۇددەلى ەكەندىگىنىڭ ماڭىزدى ايعاعى ەكەنىن اتاپ ءوتتى.