مينيستر: ماۋسىمدىق اللەرگيا ۆاكسيناتسياعا قارسى مەديتسينالىق كورسەتكىش ەمەس

نۇر-سۇلتان. قازاقپارات – ق ر دەنساۋلىق ساقتاۋ ءمينيسترى اجار عينيات ماۋسىمدىق اللەرگياسى بارلارعا نەگە ۆاكسينا ەگۋگە بولاتىنىن ءتۇسىندىردى، دەپ حابارلايدى قازاقپارات ءتىلشىسى.

«ماۋسىمدىق اللەرگيالار ۆاكسيناتسياعا قارسى مەديتسينالىق كورسەتىلىم بولىپ ەسەپتەلمەيدى. قارسى كورسەتىلىم بولۋ ءۇشىن اۋىر اللەرگيالىق اۋرۋ بولۋى كەرەك. قاراپايىم ەرىتىندىنىڭ وزىنە رەاكسيا بەرەتىن جايتتار دا بولادى. دارىگەر ءار ەمدەلۋشىنى قاراپ، قۇجاتتارىن تەكسەرگەن كەزدە اۋىر اللەرگيالىق اۋرۋى بار ما، ەكپەگە قارسى رەاكسياسى بار ما، انىقتايدى. ماۋسىمدىق اللەرگيا بولعان جاعدايدا ەمدەلۋشىنىڭ دەنساۋلىعىندا كۇردەلى اۋىتقۋ بولماسا، قان تالداماسى قالىپتى بولسا، دارىگەر ءار جاعدايدى جەكە قاراپ، ۆاكسيناتسياعا جىبەرۋ تۋرالى شەشىم قابىلدايدى دەپ ويلايمىن»، - دەدى اجار عينيات.

ءمينيستردىڭ مالىمەتى بويىنشا، ەلوردادا مەملەكەتتىك قىزمەتكەرلەردىڭ كوروناۆيرۋس جۇقتىرۋى جيىلەگەن.

«ءبىز پرەزيدەنت ءىس باسقارماسىنىڭ مەديتسينالىق قىزمەتىنەن ستاتيستيكا الىپ وتىرامىز. مەملەكەتتىك قىزمەتشىلەردىڭ دەنساۋلىعىن سول قىزمەت قاداعالايدى. مەملەكەتتىك قىزمەتشىلەر اراسىندا ءوسىم بار ەكەنىن كورىپ وتىرمىز. نۇر-سۇلتاننىڭ «سارى» ايماققا كىرگەنىن بىلەسىزدەر. بۇعان دەيىن 10 عا جەتپەيتىن ساۋساقپەن سانارلىق جايتتار تىركەلىپ كەلگەن. قازىر مەملەكەتتىك قىزمەتشىلەر اراسىندا تاۋلىك سايىن ناۋقاستانۋدىڭ 100 جاعدايى تىركەلەدى»، - دەدى ۆەدومستۆو باسشىسى.