ەلوردادا قاي ازىق-تۇلىك ءونىمى كوبىرەك قىمباتتادى؟
بۇل تۋرالى نۇر-سۇلتان قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسىنىڭ باسشىسى ەرجان بالتايەۆ ايتتى، دەپ حابارلايدى قازاقپارات ءتىلشىسى.
«جىل باسىنان بەرى كوكونىس ونىمدەرىنىڭ باعاسى ەلەۋلى دەڭگەيدە ءوستى، ياعني پياز، كارتوپ جانە ءسابىز باعاسى كوتەرىلدى. سونىمەن قاتار، قانت باعاسى دا ءوستى»، - دەدى ە. بالتايەۆ قالالىق ءماسليحاتتاعى تۇراقتى كوميسسيانىڭ وتىرىسىندا.
بارشا الەمدە ازىق-تۇلىك باعاسىنىڭ ءوسۋى بايقالىپ وتىرعانىنا توقتالعان ول، ف ا و مالىمەتى بويىنشا ازىق-تۇلىك تاۋارلارىنا باعا يندەكسى بىلتىرمەن سالىستىرعاندا ماۋسىم ايىندا 20 پايىزدان استام دەڭگەيگە وسكەنىن ايتتى.
«بۇل تۇرعىدا باستى سەبەپتەردىڭ ءبىرى رەتىندە گەوساياسي احۋال مەن لوگيستيكادا تاۋار تىزبەگىنىڭ بۇزىلۋىن اتاپ وتۋگە بولادى»، - دەدى ول.
سونىمەن قاتار باسقارما باسشىسى الەۋمەتتىك ماڭىزداعى تاۋارلار ەلدىڭ ىشكى ءوندىرىسى ەسەبىنەن قامتاماسىز ەتىلىپ وتىرعانىن، الايدا قۇس ەتى جانە قانتپەن، ىرىمشىكپەن قامتۋ ءتيىستى دەڭگەيدە ەمەس ەكەنىن اتاپ ءوتتى.
بۇل تۇرعىدا جەتىسپەيتىن كولەم يمپورتتالىپ كەلەدى. بۇدان بۇرىن حابارلانعانداي، ەلوردادا حالىقتىڭ الەۋمەتتىك وسال توپتارىنا ازىق-تۇلىك ارنايى كارتا ارقىلى وتكىزىلەدى.