استانالىق پوليتسەيلەر عيماراتتان سەكىرمەك بولعان ايەلدى قۇتقارىپ قالدى

نۇر-سۇلتان. قازاقپارات - ەلوردادا ايەل عيمارات ۇستىنە شىعىپ سەكىرمەك بولعان، دەپ حابارلايدى قازاقپارات ءتىلشىسى نۇر-سۇلتان قالاسى پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

«1- تامىز كۇنى ساعات 15:02 دە «102» كانالىنا بەيبىتشىلىك كوشەسىندە ورنالاسقان عيماراتقا شىعىپ العان ايەلدىڭ سەكىرمەك بولىپ جاتقانى تۋرالى حابار كەلدى. وقيعا ورنىنا جەدەل قىزمەت جىبەرىلىپ، ايەلدى قۇتقارۋدىڭ ءساتى ءتۇستى»، - دەپ حابارلايدى پوليتسيا دەپارتامەنتىنىڭ باسپا ءسوز قىزمەتىنەن.

سونداي-اق، رەسمي حابارلامادا سۋيتسيد جاساماق بولعان ايەلگە پسيحولوگيالىق كومەك كورسەتىلگەنى ايتىلعان.

بولعان وقيعاعا قاتىستى تەكسەرۋ شاراسى ءجۇرىپ جاتىر.

ايتا كەتسەك، بيىل اقپاندا ەلوردا پوليتسەيلەرى كوپىردەن سەكىرمەك بولعان بويجەتكەندى امان الىپ قالعان ەدى.

ەسكە سالا كەتسەك، دۇنيەجۇزىلىك دەنساۋلىق ساقتاۋ ۇيىمىنىڭ ستاتيستيكاسى بويىنشا جەر بەتىندە ءاربىر 40 سەكۋند سايىن ءبىر ادام وزىنە قول جۇمسايدى ەكەن.

ال قازاقستان سۋيتسيد سانى بويىنشا الەمدە 20-ورىندا تۇر، سونىڭ ىشىندە 10-19 جاستاعى جاس وسپىرىمدەر اراسىندا 10-ورىنعا تۇراقتاعان.