يراندى ش ى ۇ مۇشەلىگىنە قابىلداۋ ماسەلەسى سامارقاندتاعى پرەزيدەنتتەر سامميتىندە قارالادى

None
None
تاشكەنت. قازاقپارات - يران يسلام رەسپۋبليكاسىنا شاڭحاي ىنتىماقتاستىعى ۇيىمىنا (ش ى ۇ) مۇشە مەملەكەت مارتەبەسىن بەرۋ ماسەلەسى سامارقاندتا وتەتىن ش ى ۇ ەلدەرى پرەزيدەنتتەرىنىڭ سامميتىندە قارالادى، دەپ حابارلايدى قازاقپارات.

بۇگىن قازاقستان رەسپۋبليكاسى پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى باستاعان قازاقستاندىق دەلەگاتسيا وزبەكستان رەسپۋبليكاسىنىڭ ءتوراعالىق ەتۋىمەن شاڭحاي ىنتىماقتاستىق ۇيىمىنا مۇشە مەملەكەتتەردىڭ سىرتقى ىستەر مينيسترلەرى كەڭەسىنىڭ كەزەكتى وتىرىسىنا قاتىستى.

ش ى ۇ ەلدەرىنىڭ سىرتقى ساياسي ۆەدومستۆولارىنىڭ باسشىلارى بيىلعى قىركۇيەكتە سامارقاند قالاسىندا وتەتىن ش ى ۇ- عا مۇشە مەملەكەتتەر باسشىلارىنىڭ سامميتىنە دايىندىق شەڭبەرىندە ۇيىم قىزمەتىنىڭ ءتۇرلى باعىتتارىنداعى ءوزارا ءىس-قيمىلدىڭ اعىمداعى جاي-كۇيى مەن دامۋ پەرسپەكتيۆالارىن، ونىڭ حالىقارالىق جانە وڭىرلىك ىستەردەگى ءرولى مەن ورنىن ارتتىرۋدى تالقىلادى.

قازاقستان، قىتاي، قىرعىزستان، پاكىستان، وزبەكستان، رەسەي، تاجىكستان جانە ءۇندىستان سىرتقى ىستەر مينيسترلەرى سامارقاند دەكلاراتسياسى ساياسي قۇجاتىنىڭ جوباسىن قاراپ، نەگىزگە الدى، سونداي-اق ۇيىمنىڭ قازىرگى قىزمەتى بويىنشا ءبىرقاتار باسقا شەشىمدەرگە قول قويدى.

بۇدان بولەك، شاراعا قاتىسۋشىلار ش ى ۇ- عا مۇشە مەملەكەت مارتەبەسىن الۋ ماقساتىندا يران يسلام رەسپۋبليكاسىنىڭ مىندەتتەمەلەرى تۋرالى مەموراندۋمعا قول قويۋ تۋرالى ماسەلەنى مەملەكەتتەر باسشىلارى كەڭەسىنىڭ قاراۋىنا ەنگىزۋ تۋرالى شەشىم قابىلدادى.

مينيسترلەر ش ى ۇ- نىڭ مىسىر اراب رەسپۋبليكاسىمەن، ساۋد ارابياسى كورولدىگىمەن جانە كاتار مەملەكەتىمەن ديالوگ بويىنشا ارىپتەس مارتەبەسىن بەرۋ تۋرالى مەموراندۋمدارعا قول قويىلۋىن قۇپتادى.

ش ى ۇ ەلدەرى دەلەگاتسيالارىنىڭ باسشىلارىن وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆ قابىلدادى.

سۇحبات بارىسىندا وڭىردەگى احۋال مەن ش ى ۇ اياسىنداعى ءوزارا ءىس-قيمىل جونىندەگى وزەكتى ماسەلەلەر، سونداي-اق ۇيىمنىڭ الداعى سامميتىنە دايىندىق بارىسى قوزعالدى.

سوڭعى جاڭالىقتار