ءبىز قانشالىقتى كەدەيمىز؟

نۇر-سۇلتان. قازاقپارات - بىردە ءبىر باي ادام ەل ارالاماق بولىپتى. قاسىنا بالاسىن ەرتىپ الىپتى. كىشكەنە بالاسىنا كەدەي- جارلىلاردىڭ قالاي ءومىر سۇرەتىنىن كورسەتكىسى كەلگەن ەكەن.

بىرنەشە كۇن الىس اۋىلداعى قىستاۋعا بارىپ تۇرىپتى. ونداعى كەدەي وتباسى بۇلاردى قۇشاق جايا قارسى الىپ، بارىمەن بازار بولعان كورىنەدى. ۇيگە ورالعان سوڭ اكەسى بالاسىنان سۇرايدى: «ءبىزدىڭ ساياحاتىمىز ساعان ۇنادى ما؟» دەپ. «ۇنادى، اكە» ، - دەپتى بالاسى. «ادامداردىڭ قانشالىقتى كەدەي بولاتىنىن كوردىڭ بە؟» دەپتى اكەسى. «البەتتە، اكە!» دەپ جاۋاپ قاتادى بالاسى. «نەشە كۇن كورگەندەرىڭنەن نە بايقادىڭ، كوكەيگە نە ءتۇيدىڭ؟» دەپ اكەسى تىقاقتاپ قويمايدى.

سوندا بالاسى بىلاي دەپتى: «مەنىڭ بايقاعانىم كوپ، ءبىزدىڭ ءبىر ءيتىمىز بار، ولاردىڭ ءتورت ءيتى بار ەكەن. ءبىزدىڭ باقتا كىشىگىرىم حاۋىزىمىز بار، ولاردىڭ ۇشى- قيىرى جوق اساۋ وزەنى بار. ءبىزدىڭ باۋ- باقشادا شەتەلدىك شامشىراقتار جانادى، ولاردىڭ تۇنگى اسپانىندا مىڭداعان جۇلدىز سامالاداي سامساپ تۇر. ءبىزدىڭ اۋلادان كوشەگە دەيىن جول توسەلگەن، ال ولاردىڭ ەسىك الدىنان كوكجيەككە ءسىڭىپ كەتەتىن كەڭ دالا سوزىلىپ جاتىر. ءبىزدىڭ از عانا جەرىمىز بار. ونى قورشاپ تاستايمىز. ال ولاردىڭ ۇلان- بايتاق القاپتارى بار. كوز ۇشىندا مۇنارتادى. ءبىز ازىق- تۇلىكتى ساتىپ الىپ ىشەمىز. ولار وزدەرى وسىرەدى. ءبىزدىڭ ءۇيدىڭ اينالاسى تاس قورشاۋ. ولاردىڭ اينالاسى دوس- جاراندار». بالانىڭ اكەسى ءلام- ميم دەي الماي، سۇلق تۇرىپ قالىپتى.

سوندا بالاسى قاراپ تۇرماي تاعى دا بىلاي دەگەن ەكەن: «مەن ءبىزدىڭ قانشالىقتى كەدەي ەكەنىمىزدى انىق ءتۇسىندىم».

ادام بالاسى كوبىنە قولدا باردىڭ قادىرىنە جەتپەي، وزىندە جوققا قۇمارتادى. ءبىر ادام ءۇشىن ارزان كورىنگەن دۇنيە، وزگەلەر ءۇشىن باعالى سىي. ءبارى دە قاي قيىردان قاراپ، قانداي كوزقاراسپەن باعالاۋىڭىزعا بايلانىستى. كەيدە بالانىڭ ءسوزى ومىردە شىن مانىندە نە ماڭىزدى ەكەنىنە كوزىمىزدى اشا تۇسەتىندەي ...

Massaget.kz